অশ্লীল চিনেমাৰ ব্যৱসায় : ক্ৰাইম ব্ৰাঞ্চৰ জেৰাত কি ক’লে শিল্পা চেট্টীয়ে ?

অশ্লীল চিনেমা নিৰ্মান আৰু প্ৰচাৰৰ গোচৰত যোৱা ১৯ জুলাইত মুম্বাই আৰক্ষীয়ে গ্ৰেপ্তাৰ কৰিছিল অভিনেত্ৰী শিল্পা চেট্টীৰ স্বামী ৰাজ কুন্দ্ৰাক ৷ শণিবাৰে আৰক্ষীয়ে তেওৰ আন্ধেৰীস্থিত কাৰ্যালয়ত তালাচী চলাই এটা গোপন লকাৰ উদ্ধাৰ কৰে ৷ আৰক্ষীৰ সন্দেহ যে এই লকাৰটোত ৰাজ কুন্দ্ৰাৰ ব্যৱসায়িক আৰু ক্ৰিপ্ত’কাৰেন্সী সম্পৰ্কীয় নথি পত্ৰ লুকাই ৰখা হৈছিল ৷

শিল্পা চেট্টীক জেৰাত কি সুধিলে ?

ৰাজ কুন্দ্ৰাৰ পত্নী অভিনেত্ৰী শিল্পা চেট্টীক মুম্বাই আৰক্ষীৰ ক্ৰাইম ব্ৰাঞ্চে দীৰ্ঘসময় জেৰা কৰে ৷ জেৰাৰ সময়ত মূলত: কেইটামান বিষয়ৰ ওপৰত অধিক জোৰ দিয়া হয় ৷ প্ৰথমতে অভিনেত্ৰীগৰাকীক আৰক্ষীয়ে সোধে যে পতিৰ পৰ্ণগ্ৰাফীৰ ব্যৱসায় সম্পৰ্কে তেও অৱগত আছিল নে নাই ? দ্বিতীয় প্ৰশ্নটো আছিল – কিয় ৰাজ কুন্দ্ৰাৰ কোম্পেনীৰ পৰা পদত্যাগ কৰিছিল শিল্পা চেট্টীয়ে ? তৃতীয় প্ৰশ্ন- ৰাজ কুন্দ্ৰাৰ গ্ৰেপ্তাৰৰ পাছত তেওৰ অফিচৰ চাৰ্ভাৰৰ পৰা বহু তথ্য ডিলিট কৰা হৈছে ৷ এয়া কেনেকৈ সম্ভৱ হ’ল ?

উত্তৰত শিল্পা চেট্টীয়ে কয়- “হটচট এপৰ কনটেন্টৰৰ বিষয়ে মই একো নাজানো ৷এই এপটো লণ্ডন নিবাসী প্ৰদীপ বক্সী নামৰ লোকজনে চলায় ৷ তেও ৰাজ কুন্দ্ৰাৰ  আত্মীয় ৷ ৰাজ নিৰ্দোষী ৷ তেও পৰ্ণ নহয় , ইৰোটিক কনটেন্টৰ প্ৰডাকশ্যনৰ লগত জড়িত ৷ পৰ্ণ আৰু ইৰোটিকৰ মাজত পাৰ্থক্য আছে ৷”

ক্ৰিকেট জুৱাৰ লগতো জড়িত নেকি ৰাজ কুন্দ্ৰা ?

আৰক্ষীয়ে শিল্পা চেট্টীক সোধ পোছ কৰাৰ পাছত ৰাজ কুন্দ্ৰাৰ টকা পইচাৰ লেনদেন সম্পৰ্কীয় অনুসন্ধান আৰম্ভ কৰিছে ৷ ক্ৰাইম ব্ৰাঞ্চৰ সন্দেহ যে অশ্লীল চিনেমাৰ পৰা ৰাজ কুন্দ্ৰাই বহু টকা উপাৰ্জন কৰিছে ৷ এই টকা তেও ক্ৰিকেটৰ জুৱাত বিনিয়োগ কৰে ৷ আৰক্ষীৰ এই সন্দেহ অমূলক নহয় ৷ কিয়নো অনুসন্ধানত ‘ মাৰ্কৰী ইন্টাৰনেচনেল ‘ নামৰ এটা কোম্পেনীৰ তথ্য পোহৰলৈ আহিছে ৷এই কোম্পেনীটোৱে ক্ৰিকেটৰ জুৱাত ধন বিনিয়গ কৰে ৷ মাৰ্কৰীৰ পৰা ৰাজ কুন্দ্ৰাৰ একাউন্টলৈও বেংক অৱ আফ্ৰিকাৰ জড়িয়তে ধনৰ লেন দেন কৰা হৈছিল ৷ গতিকে এই লেন দেন  ক্ৰিকেট জুৱাৰ লগত জড়িত হোৱাৰ সম্ভাৱনাই অধিক ৷