Category সবিশেষ

গৌতম আদানী এতিয়া বিশ্বজুৰি দুৰ্নীতিৰ প্ৰতীক হৈ পৰিছে। গৌতম আদানীৰ সৈতে সম্পৰ্ক ছেদ কৰিব বিচাৰিছে বিভিন্ন দেশে। আমেৰিকাই গৌতম আদানীৰ কু-কীৰ্তি উদঙাই দিয়া পাছত কেনিয়া, বাংলাদেশ, শ্ৰীলংকা আদি দেশে আদানী গ্ৰুপৰ সৈতে থকা তেওঁলোকৰ চুক্তি সম্পৰ্কত মুখ খুলিবলৈ বাধ্য হৈ পৰিছে। আনফালে ভাৰততো এই লৈ ব্যাপক প্ৰতিক্ৰিয়া হৈছে। বিশেষকৈ অন্ধ্ৰপ্ৰদেশৰ প্ৰাক্তন মুখ্যমন্ত্ৰী জগন মোহন ৰেড্ডীৰ সৈতে গৌতম আদানীৰ সাক্ষাত্ আৰু ঘোচ দিয়াৰ প্ৰসংগ ওলোৱাৰ পাছত সন্দেহৰ আৱৰ্তত সোমাই পৰিছে অসমৰ মুখ্যমন্ত্ৰী হিমন্ত বিশ্ব শৰ্মাও। অন্ধ্ৰপ্ৰদেশৰ বৰ্তমানৰ মুখ্যমন্ত্ৰী এন চন্দ্ৰবাবু নাইডুৱে জগন মোহন আৰু আদানীৰ ঘোচ দিয়া প্ৰসংগত তদন্ত কৰাৰ লগতে কঠোৰ হ’ব বুলিও ঘোষণা কৰিছে। এনে সময়তে গৌতম আদানী সম্পৰ্কত এইবাৰ কঠোৰ হৈছে তেলেংগানা। তেলেংগানা চৰকাৰে আদানী গ্ৰুপৰ ১০০ কোটি টকাৰ অনুদানৰ প্ৰস্তাৱ নাকচ কৰিছে। আদানী গ্ৰুপে এই অনুদান ইয়ং ইণ্ডিয়া স্কিল ইউনিভাৰ্চিটিৰ বাবে প্ৰদান কৰিছিল। কিন্তু বিশ্বজুৰি কেলেংকাৰীৰ প্ৰতীক হৈ পৰা গৌতম আদানীৰ সৈতে সম্পৰ্ক ৰাখি বা তেওঁৰ কোম্পানীৰ পৰা অনুদান লৈ কোনেও নিজৰ গাত ক’লা ৰং সানিব খোজা নাই। যাৰ বাবে আদানী গ্ৰুপৰ এই অনুদান নাকচ কৰাৰ কথা সোমবাৰে এখন সংবাদমেলত সদৰি কৰে ৰাজ্যখনৰ মুখ্যমন্ত্ৰী ৰেৱন্ত ৰেড্ডীয়ে। মুখ্যমন্ত্ৰীগৰাকীয়ে কয় যে বৰ্তমান আদানী গ্ৰুপ যি বিতৰ্কত সাঙোৰ খাই পৰিছে সেই বিতৰ্কৰ বাবেই এই সিদ্ধান্ত তেওঁলোকে গ্ৰহণ কৰিছে। চান্দা গ্ৰহণ কৰিলে তেলেংগানাৰ ৰাজ্য চৰকাৰ আৰু মোৰ নিজৰ ভাবমূৰ্তিৰ ক্ষতি হ’ব পাৰে বুলি আদানী গ্ৰুপৰ এই অনুদান নস্যাত্ কৰিলে ৰাজ্যখনৰ চৰকাৰে। এই কথা জনাই দেওবাৰে আদানী গ্ৰুপলৈ এখন চিঠিও প্ৰেৰণ কৰিছে তেলেংগানা চৰকাৰে। এই চিঠি যোগে আদানী গ্ৰুপক ১০০ কোটি টকা বিশ্ববিদ্যালয়লৈ হস্তান্তৰ নকৰিবলৈ অনুৰোধ জনাইছে ৰেৱন্ত ৰেড্ডীৰ চৰকাৰে। লগতে তেওঁলোকে এই কথাও জানিবলৈ দিয়ে যে, বহু কোম্পানীয়ে বিশ্ববিদ্যালয়খনক ধন দিছে যদিও তেলেংগানা চৰকাৰে এতিয়াও কোনো গোটৰ পৰা একাউণ্টত এটকাও লোৱা নাই।
উল্লেখ্য যে, আমেৰিকাৰ আদালতত কোটি কোটি টকাৰ প্ৰৱঞ্চনা কৰাৰ অভিযোগ উত্থাপন হৈছে উদ্যোগপতি গৌতম আদানীকে ধৰি ৮ জন ব্যক্তিৰ বিৰুদ্ধে। যোৱা ২০ নৱেম্বৰত নিউয়ৰ্কৰ আদালতত অনুষ্ঠিত শুনানিত গৌতম আদানী, তেওঁৰ ভতিজা সাগৰ আদানী, বিনীত জৈন, ৰঞ্জিত গুপ্তা, এজিউৰ পাৱাৰৰ চাইৰিল কেবানিছ, সৌৰভ আগৰৱালা, দীপক মালহোত্ৰা আৰু ৰূপেশ আগৰৱালক অভিযুক্ত হিচাপে ঘোষণা কৰা হয়। সংবাদ মাধ্যমৰ প্ৰতিবেদন অনুসৰি, গৌতম আদানী আৰু সাগৰৰ আদানীৰ বিৰুদ্ধে গ্ৰেপ্তাৰী পৰোৱানাও জাৰি কৰা হৈছে। আমেৰিকাৰ এটৰ্নীৰ কাৰ্যালয়ে জনোৱা মতে, ভাৰতত সৌৰশক্তিৰ সৈতে জড়িত চুক্তি লাভৰ বাবে আদানীয়ে ভাৰতীয় ক্ষমতাশালী লোকক ২৬৫ মিলিয়ন ডলাৰ ভাৰতীয় হিচাপত প্ৰায় ২২০০ কোটি টকা উৎকোচ দিছিল বা দিবলৈ পৰিকল্পনা কৰিছিল। এই অভিযোগ উত্থাপন হোৱা পাছতেই গৌতম আদানীৰ কোম্পানীৰ সৈতে চুক্তি স্বাক্ষৰ কৰা দেশে সেই চুক্তি সন্দৰ্ভত মুখ খুলিবলৈ বাধ্য হৈছে। আনকি কেনিয়াই আদানী গ্ৰুপৰ সৈতে থকা একাধিক চুক্তি বাতিলো কৰিছে।
আনফালে গৌতম আদানী সম্পৰ্কে বিৰোধীয়ে চলিত শীতকালীন অধিৱেশনত আলোচনা বিচাৰিছে যদিও অধ্যক্ষই তেওঁলোকক আলোচনাৰ অনুমতি প্ৰদান কৰা নাই। কিন্তু কিয় ভাৰত চৰকাৰ আদানী সম্পৰ্কত ৰহস্যজনক স্থিতিত অৱস্থান লৈছে, সেয়াহে আজিৰ দিনটোত এক গুৰুত্বপূৰ্ণ প্ৰশ্ন।