অৰূপ কলিতাৰ কলমত-
৪২ বছৰ আগৰ কথা ৷
জৰুৰীকালীন সময়ৰ পাছত ইন্দিৰা গান্ধীয়ে কেৱল ক্ষমতাই হেৰুওৱা নাছিল , নিজৰ চৰকাৰী বাংলোটোও এৰিবলগীয়া হ’ল ৷ পুৰণি বন্ধুসকলেও ইতিমধ্যে সংগ এৰিছিল ৷ নিজৰ নতুন ফাৰ্ম হাউচটো তেতিয়াও সম্পূৰ্ণ হৈ উঠা নাছিল ৷ এজন অনুগতই ১২, উইলিংডন ক্ৰিছেন্টত ইন্দিৰা গান্ধীৰ পৰিয়ালটোক থাকিবলৈ ঠাই দিলে ৷ কিন্তু দলৰ কাম কাজ চলাই নিবলৈ ৰাজধানীত অকনমান ঠাইৰ অভাৱ ৷ সেই সময়ত অন্ধ্ৰপ্ৰদেশৰ সাংসদ জি ভেংকটস্বামীৰ চৰকাৰী বাংলো আছিল ২৪ , আকবৰ ৰোড ৷ এই ভৱনটোকে কংগ্ৰেছৰ কাৰ্যালয় হিচাপে ব্যৱহাৰ কৰাৰ সিদ্ধান্ত লোৱা হ’ল ৷ ভেংকটস্বামীয়ে অনুমতি দিলে ৷ ১৯৭৮ চনৰ জানুৱাৰীৰ কোনো এটা পুৱাত ইন্দিৰা গান্ধী প্ৰৱেশ কৰিলে কংগ্ৰেছৰ নতুন কাৰ্যালয়টোত ৷ লগত কেইজনমান সহযোগী – বুটা সিঙ , এ আৰ অন্তুলে আদি ৷ তেওলোক খালী হাতেৰেই এই কাৰ্যালয়ত সোমাইছিল ৷ দলৰ পতাকা , পুৰণি নথি পত্ৰ , আচ বাব একোৱেই নছিল ৷ আনকি প্ৰথমাৱস্থাত ২৪ , আকবৰ ৰোডত টাইপ ৰাইটাৰ এটাও নাছিল ৷ তেনেকৈয়ে ইন্দিৰা গান্ধীয়ে কংগ্ৰেছৰ এটা নতুন অধ্যায় আৰম্ভ কৰিছিল ৷ ঘৰটোৰ আটাইতকৈ ডাঙৰ কোঠা ডাইনিঙ হলত সভানেত্ৰীৰ টেবুল চকীৰ ব্যৱস্থা কৰা হ’ল ৷ আন আন কোঠাকেইটাত বহিল সাধাৰণ সম্পাদকসকল ক্ৰমে এ আৰ অন্তুলে , বুটা সিঙ , এ পি সিঙ , বি পি মৌৰ্য আৰু কোষাধ্যক্ষ প্ৰণৱ মুখাৰ্জী ৷ ৮ টা কোঠাৰ ২৪ , আকবৰ ৰোডৰ কাৰ্যালয়টোত না কাৰ্পেট আছিল , না ড’ৰমেট ৷ আনকি কেতিয়াবা দলীয় কৰ্মীৰ সংখ্যা বেছি হ’লে খাদ্য সংকটেও দেখা দিয়ে ৷ বুটা সিঙে পাঞ্জাবী লংগৰৰ পৰা খাদ্য যোগাৰ কৰে ৷ ২৪ আকবৰ ৰোডৰ পৰা আৰম্ভ হোৱা এই যাত্ৰা ইতিমধ্যে বহুদূৰ আগবাঢ়িছে ৷ ৮ টা কোঠাৰ ২৪ আকবৰ ৰোডত এতিয়া কোঠাৰ সংখ্যা ৩৪ টালৈ বাঢ়িল ৷বিগত ৪ টা দশক ধৰি এই ২৪ , আকবৰ ৰোড দেশৰ ৰাজনীতিৰ বহু উত্থান – পতনৰ সাক্ষী হৈ ৰৈছে ৷
- Donation -
২৪ , আকবৰ ৰোডৰ আছে আন এক ইতিহাস ৷ ১৯৬১ চনত এই বাংলোতে পিয়ানো শিকিছিল ম্যানমাৰৰ গণতন্ত্ৰ প্ৰতিষ্ঠাৰ নেত্ৰী , শান্তিৰ নোবেল বটা বিজয়ী আঙ চান চ্যু কীয়ে ৷ তেতিয়া চ্যু কীৰ বয়স প্ৰায় ১৫ ৷ ভাৰতস্থিত ম্যানমাৰৰ ৰাষ্ট্ৰদূত , মাতৃ ডৱ খিন ক্যীৰ লগত আঙ চান চ্যু কীয়ে দুবছৰ কটাইছিল ২৪ , আকবৰ ৰোডত ৷তেতিয়া এই বাংলো পৰিচিত আছিল বাৰ্মা হাউচ হিচাপে ৷ ম্যানমাৰৰ প্ৰতি সন্মান প্ৰদৰ্শনেৰে জৱাহৰলাল নেহৰুৱে এই বাংলোটোৰ নাম ৰাখিছিল বাৰ্মা হাউচ ৷ ইয়াতে এটা কোঠাত থাকি আঙ চান চ্যু কীয়ে পিয়ানো শিকিছিল আৰু স্কুলীয়া শিক্ষাৰ সমাপ্তিত নামভৰ্তি কৰিছিল লেডী শ্ৰীৰাম কলেজত ৷ ভাৰতৰ কলেজত অধ্যয়ন কৰি গণতন্ত্ৰৰ প্ৰতি তেও গভীৰভাৱে আকৃষ্ট হৈছিল ৷ পৰিচয় লাভ কৰিছিল গান্ধীৰ দৰ্শনৰ ৷ সেই সময়ত সঞ্জয় আৰু ৰাজীৱ গান্ধী আছিল তেওৰ অন্তৰংগ বন্ধু ৷ ২৪ , আকবৰ ৰোড – লেডী শ্ৰীৰাম কলেজৰ অভিজ্ঞতাৰে আঙ চান চ্যু কীয়ে তেওৰ বিখ্যাত “ ফ্ৰীদম এণ্ড ফীয়েৰ “ ভাষণত উল্লেখ কৰিছিল – “ ক্ষমতা হেৰুওৱাৰ ভয়ে তেওলোকক শংকিত কৰে যিয়ে ইয়াক অস্ত্ৰ হিচাপে ব্যৱহাৰ কৰে …৷”পাছলৈ কংগ্ৰেছৰ উপ – সভাপতি হিচাপে ৰাহুল গান্ধীয়ে ২৪ আকবৰ ৰোডৰ যিটো কোঠা ব্যৱহাৰ কৰিছিল , তাতেই এসময়ত চ্যু কীৰ পিয়ানো গুঞ্জৰিত হৈছিল ৷
…এই ২৪ , আকবৰ ৰোডৰ পৰাই বিধ্বস্ত কংগ্ৰেছে পুণৰ জনম লয়৷
