মেচিনগান টেবুলত , আলোচনা চলিছে প্ৰশাসনৰ ৷ এইদৰেই তালিবান নেতৃত্ব চৰকাৰ গঠনক লৈ তৎপৰ হৈ উঠিছে ৷দুই – এদিনতে এই প্ৰক্ৰিয়া সম্পূৰ্ণ হ’ব ৷ সমান্তৰালভাৱে বিভিন্ন দেশৰ নেতৃত্বৰে তালিবানৰ আলোচনাও চলিছে ৷
প্ৰশ্ন উঠিছে – ভাৰতে তালিবানৰ চৰকাৰক স্বীকৃতি দিবনে ? আন্তৰ্জাতিক ক্ষেত্ৰৰ বিভিন্ন গুৰুত্বপূৰ্ণ দেশে আফগানিস্তানৰ প্ৰতি সহায়ৰ হাত আগবঢ়াইছে ৷ ভাৰতৰ বাবে এয়া উদ্বিগ্নতাৰ কাৰণ নেকি ? ভাৰতে বেক চেনেলত তালিবানৰ সৈতে আলোচনা আগবঢ়াইছে নেকি ?এই প্ৰশ্নবোৰ বিগত বহু দিন ধৰি চৰ্চিত হৈ আহিছে যদিও ভাৰত নীৰৱ ৷ বিশ্ব ৰাজনীতিৰ এক গুৰুত্বপূৰ্ণ পট পৰিৱৰ্তনৰ মুহূৰ্তত ভাৰতৰ আৰম্ভণিৰে পৰা নীৰৱ হৈ ৰৈছে ৷
চাউথ ব্লকৰ মতে – তালিবান চৰকাৰৰ সৈতে ভাৰতৰ সম্পৰ্ক কি হ’ব , সেয়া কোৱাৰ সময় এতিয়াও আহি পৰা নাই ৷ ভাৰতে পৰিস্থিতিৰ ওপৰত নজৰ ৰাখিছে ৷ অন্যান্য দেশে কি স্থিতি লয় ,সেয়াও পৰ্যবেক্ষণ কৰি আছে ৷ প্ৰতিখন দেশৰ অৱস্থান , সমস্যা আৰু কূটনৈতিক সম্পৰ্ক পৃথক ৷ তালিবানক লৈ ভাৰতৰ সমস্যা নিৰাপত্তাৰ সৈতে জড়িত ৷ গতিকে বিষয়টো গভীৰভাৱে চিন্তা কৰাৰ প্ৰয়োজন আছে ৷
বিদেশ মন্ত্ৰালয়ৰ সূত্ৰৰ মাধ্যমত খবৰ ওলাইছে যে আফগানিস্তানৰ পৰা ভাৰতীয় নাগৰিকসকলক ওভতাই অনাৰ প্ৰক্ৰিয়া আৰম্ভ হোৱাৰ লগে লগে তালিবান নেতৃত্বৰেও আলোচনা আৰম্ভ হৈছে ৷ তালিবানে চৰকাৰ গঠন সন্দৰ্ভত নতুন দিল্লীৰ লগত কোনো আলোচনা নকৰিলেও বিভিন্ন মাধ্যমত ভাৰতে নিজৰ দাবীসমূহৰ বিষয়ে তালিবানৰ কানত পেলাইছে ৷
ভাৰতে বিচাৰিছে যে ১৯৯৬ ৰ মোল্লা ওমৰৰ দৰে কেৱল পাছতুন জনগোষ্ঠীৰ চৰকাৰ নহওক ৷ আফগানিস্তানৰ সকলো সম্প্ৰদায়ক লৈ নতুন চৰকাৰ গঠন কৰা হওক ৷নাৰী অধিকাৰ , সামাজিক অধিকাৰ আদি বিষয়সমূহত ১৯৯৬ ৰ পুণৰাবৃত্তি যাতে নঘটে , সেই বিষয়টো ইতিমধ্যে ৰাষ্ট্ৰসংঘৰ নিৰাপত্তা পৰিষদৰ বৈঠকত ভাৰতে স্পষ্ট কৰিছে ৷
তালিবানে চৰকাৰ গঠনক লৈ যিসকলৰ সৈতে আলোচনা চলাই আছে , তাৰ ভিতৰত দুজন ভাৰতৰ ঘণিষ্ঠ লোকো আছে ৷ তেওলোক হ’ল আফগানিস্তানৰ প্ৰাক্তণ ৰাষ্ট্ৰপতি হামিদ কাৰজাই আৰু শান্তি আলোচনাৰ অন্যতম আহ্বায়ক আবদুল্লা ৷ তেওলোকৰ মাধ্যমেৰেই ভাৰতে নিজৰ বাৰ্তা বিনিময় কৰিছে ৷
নতুন দিল্লীয়ে ভালদৰে জানে যে এতিয়া আৰু ভাৰত চৰকাৰৰ কোনো আবদাৰ আফগানিস্তানত নচলে ৷ সেয়ে হয়তো পাকিস্তানৰ দৰে মধ্যমীয়া কূটনৈতিক সম্পৰ্ক এটাৰ পোষকতা কৰা হ’ব ৷ সেই দেশৰ চৰকাৰক বৈধতা দিব ,নিয়মমাফিক দূতাবাসো থাকিব কিন্তু দ্বি পাক্ষিক বিনিময় হ;ব অতি সীমিত ক্ষেত্ৰত আৰু চৰ্ত সাপেক্ষ ৷
