সত্যৰ সন্ধানত প্ৰতিদিন, প্ৰতিপল

প্ৰব্ৰজিত শ্ৰমিকৰ মৰ্মবেদনা

“অসম চৰকাৰে ৰাজ্যখনত অৰ্থনৈতিক উন্নয়ন সাধন কৰাত ব্যৰ্থ হোৱাৰ লগতে কৰ্ম সংস্থাপন সৃষ্টি কৰিব নোৱাৰাৰ বাবেই এইসকল যুৱক যুৱতী এনেদৰে বহিৰাজ্যলৈ যাব লগা হৈছিল ৷ তেওঁলোকে পঠিওৱা পইচাৰে অসমৰ বহু পৰিয়ালৰ চৌকাৰ জুই জ্বলিছিল, সেই পইচাই আমাৰ অৰ্থনীতি সমৃদ্ধ হৈছিল ৷”

দেৱজিৎ ফুকন

ভাৰতবৰ্ষৰ বিভিন্ন ঠাইলৈ যোৱাৰ অভিজ্ঞতা আছে ৷ চেন্নাই, কেৰেলা , বাংগালোৰ, গোৱা, নতুন দিল্লী, মুম্বাই, আহমেদাবাদ, জয়পুৰ, পডুচেৰী সকলোতে লগ পাইছিলো অসমীয়া যুৱক যুৱতী ৷ হোটেল ৰেষ্টুৰেণ্টৰ পৰা আৰম্ভ কৰি শ্বপিং মললৈকে আৰু সৰু সৰু উদ্যোগৰ পৰা আৰম্ভ কৰি বৃহৎ ব্যৱসায়িক প্ৰতিষ্ঠান উদ্যোগ আদি সকলোতে ৷ তেওঁলোকৰ চিনাকি ছেলছমেন, চিকিউৰিটি গাৰ্ড, ড্ৰাইভাৰ, কেজুৱেল শ্ৰমিক আদি ৷ এওঁলোকৰ কষ্ট আৰু ত্যাগৰ বিনিময়ত মালিক পক্ষই যাপন কৰিছিল বিলাসী জীৱন ৷একোটা সৰু সৰু জুপুৰি সদৃশ ঘৰত থাকিবলৈ দিছিল দহ/পোন্ধৰ গৰাকী লোকক ৷ তেওঁলোকৰ প্ৰথম চিনাকি প্ৰব্ৰজিত শ্ৰমিক আৰু দ্বিতীয় চিনাকি আছিল অসমীয়া ৷ নিয়মানুৱৰ্তিতা আৰু কঠোৰ পৰিশ্ৰম কৰাৰ লগতে সতকাই কাম খতি নকৰাৰ কাৰণে পুঁজিপতি পক্ষৰ প্ৰথম পছন্দ অসমীয়া প্ৰব্ৰজিত শ্ৰমিক ৷ অসমীয়া যুৱক যুৱতীৰো ক্ৰমাৎ অগ্ৰাধিকাৰ ক্ষেত্ৰ হ’ল দক্ষিণ ভাৰত ৷ দহ/বাৰ হেজাৰ টকা উপাৰ্জনৰ সহজ গন্তব্য স্থান ৷ বৃহৎ গোষ্ঠীৰ যেতিয়ালৈকে প্ৰয়োজন আছিল এওঁলোকৰ শ্ৰম আদায় কৰি ল’লে সামান্য পাৰিশ্ৰমিক দি ৷ কিন্তু এতিয়া?

- Donation -

ক’ৰোনাৰ আগমনৰ লগে লগে এইসকল অসমীয়া যুৱক যুৱতী এলাগী হোৱাই নহয় সামান্য মানৱীয়তাকনো প্ৰদৰ্শন নকৰি ক’ৰোনাৰ মাজত এৰি দিলে ৷ দীৰ্ঘদিন এসাজ ভালদৰে খাবলৈ নাপায় ভোকে লঘোণে থাকি কোনোবা বাছত কোনোবা ৰে’লত আৰু কোনোবা খোজকাঢ়ি আহি অসম পালেহি ৷ আৰু এতিয়া এইসকলৰ মাজৰ পৰা অলেখজন ক’ৰোনাত আক্ৰান্ত হ’ল ৷ ইয়াৰ বাবে ১০০ শতাংশই দায়ী নিয়োগকৰ্তা পুঁজিপতি গোষ্ঠী ৷ বিপদৰ সময়ত এনেদৰে কৰ্মস্থলীৰ পৰা বিতাড়ন কৰাসকলক জবাবদিহি কৰিবলৈ কিন্তু আমাৰ সংবিধানত বা আমাৰ ন্যায় ব্যৱস্থাত কোনো সুবিধা নাই ৷

অসম চৰকাৰে ৰাজ্যখনত অৰ্থনৈতিক উন্নয়ন সাধন কৰাত ব্যৰ্থ হোৱাৰ লগতে কৰ্ম সংস্থাপন সৃষ্টি কৰিব নোৱাৰাৰ বাবেই এইসকল যুৱক যুৱতী এনেদৰে বহিৰাজ্যলৈ যাব লগা হৈছিল ৷ তেওঁলোকে পঠিওৱা পইচাৰে অসমৰ বহু পৰিয়ালৰ চৌকাৰ জুই জ্বলিছিল, সেই পইচাই আমাৰ অৰ্থনীতি সমৃদ্ধ হৈছিল ৷ এতিয়া পৰিস্থিতিত পৰি মাতৃভূমিলৈ ঘূৰি অহা যুৱক যুৱতী সকলক একাংশ স্বাৰ্থপৰ লোকে সমালোচনা কৰা দেখা গৈছে যদিও সেইটো উচিত নহয় ৷ কুৰি শতিকাৰ ষাঠিৰ দশকত মাত্ৰ তিনিটা বছৰৰ ভিতৰত পঞ্জাৱ আৰু হাৰিয়ানাত চৰকাৰৰ পৃষ্ঠপোষকতাতো হোৱা সেউজ বিপ্লৱৰ কথা আমি সকলোৱে জানো ৷ অসম চৰকাৰে এইসকল বহিৰাজ্যৰ পৰা ঘূৰি অহা শ্ৰমিককলৈ অসমত এক সেউজ বিপ্লৱ গঢ়ি তুলিব পাৰে ৷ কেন্দ্ৰীয় চৰকাৰে কোৱা আত্মনিৰ্ভৰশীল অৰ্থনীতি গঢ়ি তোলাৰ ক্ষেত্ৰত ৰাজ্য চৰকাৰে আগভাগ ল’লে আৰু কৃষকক কৃষি কাৰ্যৰ প্ৰতি আকৰ্ষিত কৰিব পাৰিলেহে অসমৰ উন্নতি সম্ভৱ হ’ব ৷ তদুপৰি কোৱাৰেন্টীন কেন্দ্ৰবিলাকত তেওঁলোকক পৰ্যাপ্ত পৰিমাণৰ সা-সুবিধা প্ৰদানৰ ক্ষেত্ৰত চৰকাৰৰ উপৰিও সকলো শ্ৰেণী লোক আগবাঢ়ি আহিব লাগিব ৷ বহিঃৰাজ্যৰ পৰা উভতি অহা এইসকল লোকৰ প্ৰতি আমি সকলোৱে দায়বদ্ধতাৰে দৃষ্টি দিয়া উচিত ৷ একাংশ ব্যক্তিকেন্দ্ৰীক স্বাৰ্থপৰ লোকে এই সংকটৰ সময়ত আমাৰ ভাই-ভনীহঁতক সমালোচনা কৰাৰ মানসিকতা ত্যাগ কৰা দৰকাৰ ৷ কাৰণ বহিঃৰাজ্যৰ পৰা উভতি অহা সকল আমাৰ আপদ নহয়, সম্পদহে ৷

Click here to like us on Facebook. Don’t miss our video reports as well. Click here to subscribe us on Youtube.

Leave A Reply

Your email address will not be published.