Investigative reporting with dedication.
সমষ্টিৰ উন্নয়ণতকৈ বিধায়কৰ সম্পত্তিহে এতিয়া মাৰ্ঘৰিটাৰ ৰাইজৰ মাজত প্ৰধান চৰ্চাৰ বিষয় হৈ পৰিছে ৷ কয়লা ব্যৱসায়ক কেন্দ্ৰ কৰি সততে বিতৰ্কৰ আৱৰ্তত থকা বিধায়ক ভাস্কৰ শৰ্মাৰ ব্যৱসায় এতিয়া কেৱল কয়লাত সীমাৱদ্ধ হৈ থকা নাই ৷ ইটোৰ পাছত সিটো কোম্পানী , এডোখৰৰ পাছত আন এডোখৰ ভূ- সম্পত্তি অবাধে গঢ়ি গৈছে বিধায়ক ভাস্কৰ শৰ্মাই ৷ এইগৰাকী বিধায়ক ভাস্কৰ শৰ্মাৰ পৰ্বতসম সম্পত্তিৰ তথ্য আহি পৰিছে ‘দ্য ক্ৰছকাৰেণ্ট’ৰ হাতত ৷ ‘দ্য ক্ৰছকাৰেণ্ট’ৰ নতুন অনুষ্ঠান ‘এচেট ৱাটছ’ সম্প্ৰচাৰ হোৱাৰ পাছতেই নাম প্ৰকাশত অনিচ্ছুক অনেক সূত্ৰই যোগান ধৰিছে বিতৰ্কিত বিধায়ক ভাস্কৰ শৰ্মাৰ সম্পত্তিৰ এটাৰ পাছত আন এটা তথ্য ৷ এই তথ্যসমূহৰ ভিতৰত আছে মাৰ্ঘেৰিটা নগৰত থকা বিধায়কগৰাকীৰ কমেও ৬ টা স্থানৰ ভূ- সম্পত্তি , চাৰিটাকৈ কোম্পানী , এটা বটলিং প্লাণ্ট আৰু এটা তেল ডিপ’ৰ তথ্য ৷
আমি লাভ কৰা তথ্য অনুসৰি , বিধায়কগৰাকীৰ মাৰ্ঘেৰিটা টাউনত কমেও ছটা স্থানত ভূ- সম্পত্তি আছে ৷ এই ভূ- সম্পত্তিসমূহৰ পট্টা নম্বৰ হৈছে ৩৯১ , ৩৯২ , ২৮৪২ , ১২৭৬ আৰু ৫৩৩ ৷ নিজৰ লগতে পত্নী নাংখামা শৰ্মাৰ নামত এই ভূ- সম্পত্তি ক্ৰয় কৰিছে বিধায়ক ভাস্কৰ শৰ্মাই ৷ ইয়াৰে কেবাটাও স্থানৰ মাটি তেওঁ ২০২১ চনত দ্বিতীয়বাৰ বিধায়ক হোৱাৰ পাছত ক্ৰয় কৰিছে ৷
মাৰ্ঘেৰিটাৰ বিধায়ক ভাস্কৰ শৰ্মা এটা তেল ডিপোৰো গৰাকী ৷ সকলোৱে জানে যে মাৰ্ঘেৰিটাত থকা ভাৰত পেট্ৰ’লিয়াম তেল ডিপ’ৰ স্বত্বাধিকাৰী হৈছে ভাস্কৰ শৰ্মা ৷ এই তেল ডিপ’টোৰ কাগজে কলমে স্বত্বাধিকাৰী হৈছে বিধায়কৰ মালিকানাধীন আইছানি ট্ৰেড এণ্ড এলায়েন্স ৷ একেটা নামত তেওঁৰ মালিকানাধীন আন এটা প্ৰতিষ্ঠান আছে ৷ সেয়া হ’ল – ‘আইছানি ৱাটাৰ ইণ্ডাষ্ট্ৰীজ’ ৷ এই প্ৰতিষ্ঠানৰ নামত লিডুত স্থাপন কৰা হৈছে এটা পানীৰ বটলিং প্লাণ্ট ৷
কেৱল এয়াই নহয় , কয়লা ,পানী , তেলৰ ব্যৱসায় কৰা ভাস্কৰ শৰ্মাই বিধায়ক হোৱাৰ পাছত ৰিয়েল ইষ্টেট ব্যৱসায়তো হাত দিছে ৷ ৰিয়েল ইষ্টেট ব্যৱসায়ৰ বাবে তেওঁ নিজৰ আৰু পত্নীৰ নামত গঠন কৰিছে কেইবাটাও কোম্পানী ৷ তাৰ ভিতৰত আছে ২০২৩ চনত গঠন হোৱা এন বি এ ৰিয়েল্টী এল এল পি ৷ য’ত জড়িত হৈ আছে বিধায়ক ভাস্কৰ শৰ্মাৰ পত্নী নাং খামা শৰ্মা ৷ বিধায়কগৰাকীয়ে একেটা বছৰত গঠন কৰিছে বি এছ আৰ এছ নামৰ আন এটা ৰিয়েল ইষ্টেট কোম্পানী ৷ কেৱল সেয়াই নহয় , ৰিয়েল ইষ্টেট ব্যৱায়ক অধিক বিস্তাৰ দিবলৈ ভাস্কৰ শৰ্মাই ২০২৪ চনত ব্ৰক্ষ্মপুত্ৰ ভেনছাৰ্ছ এল এল পি নামৰ আন এটা কোম্পানীও গঠন কৰিছে ৷ তাৰ পূৰ্বে ২০২০ চনতেই তেওঁ গাছজেন ফেৰ’ এলইছ এল এল পি নামৰ আন এটা কোম্পানীও গঠন কৰিছিল ৷এইদৰে বিধায়ক ভাস্কৰ শৰ্মাই কয়লাৰ পৰা আৰম্ভ কৰি তেল , পানী , ৰিয়েল ইষ্টেট সকলো খণ্ডলৈ নিজৰ ব্যৱসায় বিস্তাৰ কৰি গৈছে ৷ এয়া আমি নিশ্চিত কৰিব পৰা কেইটামান তথ্যহে ৷ বিধায়কগৰাকীয়ে নামে – বেনামে গঢ়ি তোলা অনেক সম্পত্তিৰ তথ্যও আমাৰ হাতত আহি পৰিছে ৷ এই তথ্যসমূহ সত্যাসত্য নিৰূপণৰ পাছত পৰ্যায়ক্ৰমে প্ৰকাশ কৰা হ’ব ৷
