তৃতীয় বিশ্বযুদ্ধৰ দামামা বাজিছে বিশ্বত ৷ যিকোনো মুহূৰ্ততে ৰাছিয়াই আক্ৰমণ কৰিব পাৰে ইউৰোপ ৷ ইউক্ৰেইন সীমান্তত ৰুছ সেনাৰ তৎপৰতাই তাৰেই আগজাননী বহন কৰিছে ৷ৰাছিয়াৰ প্ৰধানমন্ত্ৰী ব্লাডিমিৰ পুটিনে যুদ্ধ নিবিচাৰে বুলি ঘোষণা কৰিছে যদিও আমেৰিকা আৰু ইউৰোপে এই কথা বিশ্বাস কৰিব পৰা নাই ৷ কাজেই এতিয়া তীব্ৰ উৎকণ্ঠা বিৰাজ কৰিছে ৰাছিয়া আৰু ইউক্ৰেইন সীমান্তত ৷ বিশ্বত আন এক যুদ্ধৰ সূচনা হ;ব নেকি ?
জানুৱাৰী মাহৰ শেষ সপ্তাহৰ কথা ৷ ৰাছিয়াই ইউক্ৰেইন সীমান্তলৈ প্ৰেৰণ কৰিবলৈ ধৰে অস্ত্ৰ – শস্ত্ৰৰে সজ্জিত প্ৰায় এক লাখ সেনা ৷ ৰাছিয়াই যুদ্ধৰ সম্ভাৱনা অস্বীকাৰ কৰি থাকিলেও আমেৰিকা , ব্ৰিটেইন আৰু অষ্ট্ৰেলিয়াই নিজ দেশৰ নাগৰিকসকলক ইউক্ৰেইণ ত্যাগ কৰাৰ পৰামৰ্শ দিয়ে ৷ ফ্ৰান্সৰ পৰাও ইউক্ৰেইণ ভ্ৰমণ নকৰিবলৈ নিৰ্দেশনা জাৰি কৰা হয় ৷ ইপিনে ৰাছিয়াই ইউৰোপলৈ তেল অৰু গেছৰ যোগান হ্ৰাসকৰি অনাত ইউৰোপত ব্যাপক সংকটৰ সৃষ্টি হৈছে ৷ পৰিস্থিতিৰ ইমানেই অৱনতি ঘটিছে যে ব্ৰিটেইনৰ প্ৰধানমন্ত্ৰী বৰিছ জনছনে বিবিচিক দিয়া এক সাক্ষাৎকাৰত উল্লেখ কৰিছে যে ৰাছিয়াই ইউৰোপত ১৯৪৫ ৰ পাছত আটাইতকৈ ডাঙৰ যুদ্ধৰ প্ৰস্তুতি আৰম্ভ কৰিছে ৷ বৰিছ জনছনৰ মতে ৰাছিয়াই ইউক্ৰেইনত আক্ৰমনৰ বাবে এনে ৰণনীতি প্ৰস্তুত কৰিছে যাৰ আধাৰত ইউক্ৰেইনৰ ৰাজধানী কীৱত প্ৰথমতে কব্জা কৰিব পাৰে ৷ ইয়াৰ ফলত বহু লোকৰ প্ৰণহানিৰ শংকাও ব্যক্ত কৰিছে ব্ৰিটেইনৰ প্ৰধানমন্ত্ৰীগৰাকীয়ে ৷ আনহাতে আমেৰিকাই সদৰী কৰা তথ্য অনুযায়ী ৰাছিয়াই ইউক্ৰেইন সীমান্তত ১ লাখ ৬৯ হাজাৰৰ পৰা ১ লাখ ৯০ হাজাৰ সেনা নিয়োগ কৰিছে ৷ এই বিশাল সেনাবাহিনীয়ে বেলাৰুছতো অৱস্থান গ্ৰহণ কৰি ইউক্ৰেইন আক্ৰমণৰ পৰিকল্পনা সাজু কৰিছে ৷ইয়াৰ বিপৰীতে ৰাছিয়াৰ তৰফৰ পৰা কোৱা হৈছে যে তেওলোকে কেৱল সামৰিক অনুশীলনহে কৰি আছে ৷ কিন্তু ৰাছিয়াক বিশ্বাসত ল’ব পৰা নাই ব্ৰিটেইন আৰু আমেৰিকাই ৷যুদ্ধক লৈ চৰ্চা অব্যাহত থকাৰ মাজতে আমেৰিকাৰ ৰাষ্ট্ৰপতি জ’ বাইডেনে কৈছে যে অহা কেইটামান সপ্তাহৰ ভিতৰতে ৰাছিয়াৰ সেনাই ইউক্ৰেইনত আক্ৰমণ সংঘটিত কৰিব ৷ ইতিমধ্যে ইউক্ৰেইনৰ পূৱ প্ৰান্তৰ চহৰ ডোনটষ্কত এটা অসমাৰিক কনভয়ৰ ওপৰত আক্ৰমণ চলাইছে ৰুছ বিদ্ৰোহীয়ে ৷ তাৰ পাছতে পূৱ ইউক্ৰেইনৰ পৰা হাজাৰ হাজাৰ লোকে পলায়ন কৰিবলৈ আৰম্ভ কৰিছে ৷ প্ৰায় তিনি লাখ লোকৰ পলায়নৰ সম্ভাৱনা ব্যক্ত কৰিছে চোৰাংছোৱা সংস্থাসমূহে ৷ পলায়ন আৰম্ভ হোৱাৰ পাছতে ৰাছিয়াই নিজৰ অঞ্চলত জৰুৰীকালীন অৱস্থা ঘোষণা কৰিছে ৷ অৱশ্যে নিজৰ লোকসকলক দেশলৈ ওভতাই আনিবৰ বাবে ৪০০ সৈনিক আৰু ১৫০ গাড়ীৰো ব্যৱস্থা কৰিছে ৷ সংবাদ মাধ্যমত প্ৰকাশিত বাতৰি অনুসৰি ৰুছ বিদ্ৰোহীয়ে এতিয়ালৈকে ইউক্ৰেইনৰ সেনাৰ ২৪ টা ঠিকনাত আক্ৰমণ সংঘটিত কৰিছে ৷ স্কুলো বাছি যোৱা নাই বিদ্ৰোহীৰ লক্ষ্যৰ পৰা ৷ এনে পৰিস্থিতিত ইউক্ৰেইনৰ ৰাষ্ট্ৰপতি জেলেনেস্কনীয়ে এক আবেগিক ভাষণত উল্লেখ কৰিছে যে ইউক্ৰেইনৰ পৰিস্থিতি মুঠেও ভাল নহয় ৷ পশ্চিমীয়া দেশসমূহে বুজাবুজিৰ বাবে ইউক্ৰেইনক ভৰষা কৰা উচিত ৷ তেও ৰাছিয়াৰ লগত আলোচনাৰ বাবে সাজু বুলি কৈও পশ্চিমৰ দেশসমূহক ৰাছিয়াৰ ওপৰত তৎকালে প্ৰতিবন্ধকতা আৰোপ কৰাৰ আহ্বান জনাইছে ৷ এই আহ্বান ভাবুকিৰ মাজতে ৰাছিয়াই নিউক্লিয়াৰ মিছাইল সাজু কৰি আন এক আতংকময় পৰিস্থিতিৰ সৃষ্টি কৰিছে ৷ এতিয়া আপুনি ভাবিব পাৰে যে কিয় ইউক্ৰেইন আক্ৰমণ কৰিবলৈ সাজু হৈছে ৰাছিয়া ৷ আচলতে ৰাছিয়াৰ এটা দাবী আছিল যে ইউক্ৰেইন আৰু অন্য পূৱ প্ৰান্তৰ ছোভিয়েট দেশক আটলান্টিক সন্ধি সংগঠন চমুকৈ নাটোৰ পৰা আঁতৰত ৰাখিব লাগে আৰু সীমান্তৰ পৰা সেনা প্ৰত্যহাৰ কৰিব লাগে ৷ এই বিষয়ত ৰাজনৈতিক বাৰ্তালাপ বিফল হোৱাৰ পাছতে ৰাছিয়াই ইউক্ৰেইন আক্ৰমণৰ প্ৰস্তুতি আৰম্ভ কৰে ৷ ইয়াৰ লগে লগে সহযোগী দেশ ইউক্ৰেইনৰ বিপদক লৈ সতৰ্ক হৈ পৰে আমেৰিকা ৷ পৰিৱৰ্তিত পৰিস্থিতিয়ে কি ৰূপ লয় , সেয়া আমি জনাই যাম আমাৰ এই বিশেষ প্ৰতিবেদনৰ জড়িয়তে ৷
Crosscurrent is an independent newsroom that produces investigative and analytical reporting with dedication. Crosscurrent is founded to uncover the truth behind the important issues. Crosscurrent is founded to cover the issues that matter.