কংগ্ৰেছৰ নেতৃত্বত এফালে গান্ধী পৰিয়াল , আনফালে গ্ৰুপ ২৩ ৷ দুয়োটা শিবিৰৰ মাজত সৃষ্টি হৈছে ব্যাপক সংঘাত ৷ গ্ৰুপ ২৩ য়ে বিচাৰিছে কংগ্ৰেছ নেতৃত্বৰ আমূল পৰিৱৰ্তন ৷ আনটো শিবিৰে বিচাৰিছে নেতৃত্বত থাকক গান্ধী পৰিয়াল ৷ কংগ্ৰেছৰ ভিতৰচ’ৰাৰ এই শীতল সংঘাতে এতিয়া দখল কৰিছে সংবাদ শিৰোণাম ৷
বিগত এবছৰ ধৰি পঞ্জাৱত কংগ্ৰেছ দল আৰু চৰকাৰৰ ভিতৰচ’ৰাত অব্যাহত আছিল সংঘাত , বিসম্বাদ ৷ ঠিক তেনেসময়তে কংগ্ৰেছৰ এদল ৰাষ্ট্ৰীয় নেতৃত্বও দলৰ ভিতৰচ’ৰাৰ আমূল পৰিৱৰ্তনৰ দাবীত সৰৱ হৈ পৰে ৷ বিগত বছৰৰ আগষ্ট মাহত ২৩ গৰাকী জেষ্ঠ্য কংগ্ৰেছী নেতাই দলৰ সভানেত্ৰী ছোনিয়া গান্ধীলৈ এখন পত্ৰ প্ৰেৰণ কৰে ৷ এই পত্ৰত উল্লেখ কৰা হয় যে লোকসভা নিৰ্বাচন আৰু বিভিন্ন ৰাজ্যৰ বিধানসভা নিৰ্বাচনত কংগ্ৰেছ দল বিপৰ্যয়ৰ সন্মুখীন হৈছে ৷ গতিকে দলৰ সাংগঠনিক স্তৰত ব্যাপক সালসলনিৰ প্ৰয়োজন হৈ পৰিছে ৷ লগতে নেতৃত্বকো গতিশীল কৰাৰ প্ৰয়োজনীয়তা আহি পৰিছে ৷ এই ২৩ গৰাকী জেষ্ঠ্য নেতাৰ পত্ৰৰ পাছতে কংগ্ৰেছৰ ভিতৰচ’ৰাত জোকাৰণি উঠে ৷ কংগ্ৰেছ হাইকামাণ্ডৰ বিৰুদ্ধে বিদ্ৰোহৰ সূচনা কৰা এই নেতাসকলৰ ভিতৰত আছিল গোলাম নবী আজাদ, কপিল ছিব্বাল , মুকুল ৱাছনিক, মণি শংকৰ আয়াৰ আদি ৷ এই ২৩ গৰাকী নেতাকে অভিহিত কৰা হয় কংগ্ৰেছৰ ভিতৰৰ গ্ৰুপ ২৩ হিচাপে ৷
- Donation -
শেহতীয়াকৈ অনুষ্ঠিত হোৱা ৫ ৰাজ্যৰ বিধানসভা নিৰ্বাচনত কংগ্ৰেছ শোচনীয়ভাৱে পৰাজিত হ’ল ৷ তাৰ পাছত নিয়মমাফিক চি ডব্লিউ চিৰ বৈঠক বহিল ৷ আশা কৰা ধৰণেই এই বৈঠকত গান্ধী পৰিয়ালৰ নেতৃত্বৰ ওপৰত আস্থা প্ৰকাশ কৰি প্ৰস্তাৱ গ্ৰহণ কৰা হ’ল ৷ কিন্তু এইবাৰ জাঙুৰ খাই উঠিল জি ২৩ ৷ বুধবাৰে জেষ্ঠ্য কংগ্ৰেছ নেতা গোলাম নবী আজাদৰ বাসগৃহত একত্ৰিত হ’ল গ্ৰুপ ২৩ ৰ সদস্যসকল ৷ এই বৈঠকত নতুনকৈ দেখা গ’ল সাংসদ শশী থাৰুৰ , পৃথ্বীৰাজ চৌহান , বিবেক টাংখা , সন্দীপ দীক্ষিত আদিক ৷ বাতৰিত প্ৰকাশ পোৱা অনুসৰি , এইসকল নেতা কপিল ছিব্বালৰ বাসগৃহত একত্ৰিত হোৱাৰ কথা আছিল যদিও শেষ মুহুৰ্তত বৈঠকৰ স্থান সলনি কৰা হয় ৷ বুধবাৰৰ বৈঠকত সমাবেত হোৱা নেতাসকলে মূলত: ৰাহুল গান্ধীৰ নেতৃত্বৰ ওপৰত সন্দেহ প্ৰকাশ কৰে ৷ তেওলোকে এইবুলিও সমন্তুষ্টি প্ৰকাশ কৰে যে পঞ্জাৱৰ মুখ্যমন্ত্ৰী সলনি , উত্তৰ প্ৰদেশৰ ৪০ শতাংশ আসন মহিলাৰ বাবে সংৰক্ষণ আদি বিষয়বোৰত চি ডব্লিউ চিৰ কোনো অনুমোদন লোৱা হোৱা নাছিল ৷ সেইবাবে গ্ৰুপ ২৩ ৰ সদস্যসকলে চি ডব্লিউ চি নতুনকৈ গঠন কৰাৰ দাবী উত্থাপণ কৰাৰ লগতে কংগ্ৰেছৰ সাংগঠনিক সম্পাদকগৰাকীকো সলনি কৰাৰ দাবী উত্থাপণ কৰে ৷ এই বৈঠকৰ প্ৰাবল্য ইমানেই আছিল যে গান্ধী পৰিয়ালৰ অনুগত বুলি পৰিচতি মল্লিকাৰ্জুন খৰ্গে মুকলিকৈ কয় যে তেওলোকে ১০০ খন বৈঠক অনুষ্ঠিত কৰিলেও ছোনিয়া গান্ধীক দুৰ্বল কৰিব নোৱাৰে ৷ খৰ্গে গ্ৰুপ ২৩ ৰ বিৰুদ্ধে খৰ্গেই দল ভঙাৰ অভিযোগো উত্থাপণ কৰে ৷ ইয়াৰ বিপৰীতে গ্ৰুপ ২৩ ৰ স্পষ্ট মত – বিজেপিক বিৰোধিতা কৰিবলৈ হ’লে কংগ্ৰেছক শক্তিশালী কৰাৰ প্ৰয়োজনীয়তা আছে ৷ আমি কংগ্ৰেছক সমভাৱাপন্ন দলসমূহৰ সৈতে আলোচনা আৰম্ভ কৰিবলৈ আহ্বান জনাইছো , যাতে বিজেপিৰ বিৰুদ্ধে বিৰোধীৰ এটা বিশ্বাসযোগ্য জোট তৈয়াৰ কৰিব পৰা যায় ৷ এই বিদ্ৰোহ দমনৰ বাবে ছোনিয়া গান্ধীয়ে তৎকালে তৎপৰতা আৰম্ভ কৰিছে ৷ কাৰণ কংগ্ৰেছত বিসম্বাদৰ অভিজ্ঞতা বৰ বেছি সুখকৰ নহয় ৷
১৯৭৭ চনত কংগ্ৰেছৰ ডাঙৰ নেতা জগজীৱন ৰামে কংগ্ৰেছ নেতা জগজীৱন ৰামে পদত্যাগ কৰে ৷ তাৰ পাছতে কেন্দ্ৰত ক্ষমতাচ্যুত হয় কংগ্ৰেছ ৷ ১৯৮৭ চনত কংগ্ৰেছ নেতা ভি পি সিঙে বফ’ৰ্চ কেলেংকাৰিৰ অভিযোগ তুলি প্ৰতিবাদ আৰম্ভ কৰে ৷ যাৰ বাবে তেওক কংগ্ৰেছৰ পৰা বহিষ্কাৰ কৰা হয় ৷১৯৮৮ চনত ভি পি সিঙে নতুন মৰ্চা গঠন কৰে ৷ তাৰ পাছৰটো নিৰ্বাচনতে তেও চৰকাৰ গঠন কৰিবলৈ সক্ষম হয় ৷ ১৯৯০ ৰ দশকৰ পৰাই কংগ্ৰেছ দুৰ্বল হ’বলৈ আৰম্ভ কৰে ৷ ইয়াৰ আঁৰত নাৰায়ন দত্ত তিৱাৰী , মুপনাৰৰ দৰে নেতাৰ বিসম্বাদেও গুৰুত্বপূৰ্ণ ভূমিকা পালন কৰিছিল ৷ ১৯৯৭ চনত মমতা বেনাৰ্জীয়ে কংগ্ৰেছ ত্যাগ কৰে ৷ তাৰ পাছত পশ্চিমবংগত কংগ্ৰেছৰ বেলি মাৰ যায় ৷ ১৯৯৯ত মুফটী মহম্মদ চৈয়দ আৰু শাৰদ পাৱাৰে বিদ্ৰোহ আৰম্ভ কৰে ৷ ইয়াৰ পাছৰ নিৰ্বাচনতে কংগ্ৰেছ পৰাজয়ৰ সন্মুখীন হয় ৷ নেতাৰ অসন্তুষ্টিয়ে ২০১৪ চনত কংগ্ৰেছৰ পৰাজয়ৰ বাট অধিক সুষম কৰি তুলিছিল ৷ ২০১৯ চনৰ পাছৰে পৰা জেষ্ঠ্য নেতাৰ বিদ্ৰোহ মুকলি ৰূপত পোহৰলৈ আহে ৷ শেহতীয়াকৈ পাঁচ ৰাজ্যৰ বিধানসভা নিৰ্বাচনৰ পাছত গ্ৰুপ২৩ ৰূপী বিদ্ৰোহীৰ দল নেতৃত্বৰ বিৰুদ্ধে আকৌ এবাৰ সৰৱ হৈ উঠিছে ৷ যদিহে তেওলোকৰ দাবী মানি নলৈ কংগ্ৰেছ হাইকামাণ্ড পুণৰ স্থিতাৱস্থা বাহাল ৰখাৰ সিদ্ধান্তত অটল হৈ থাকে , তেনেহ’লে কংগ্ৰেছৰ নাও বুৰিবলৈ আৰু বেছি দিন বাট চাব নালাগে ৷
