সোণোৱালৰ আমোলৰ আন এক দুৰ্নীতি ফাদিল : ২৩০ পদৰ নিযুক্তি বাতিল

চন্দ্ৰৰ গাত দাগ থাকিলেও দাগ নাছিল সৰ্বানন্দ সোণোৱাল চৰকাৰৰ ৷ এই মন্তব্য আছিল মুখ্যমন্ত্ৰী ড: হিমন্ত বিশ্ব শৰ্মাৰ ৷কিন্তু সেই একেজন মানুহেই এতিয়া সোণোৱালৰ আমোলৰ এটাৰ পাছত আন এটা কলংক উদঙাই গৈছে ৷ এপিডিচিএলৰ পাছত এইবাৰ বাতিল কৰা হ’ল প্ৰাথমিক শিক্ষা খণ্ডৰ ২৩০ টা পদৰ নিযুক্তি প্ৰক্ৰিয়া ৷ সোণোৱাল চৰকাৰৰ আমোলত প্ৰাথমিক শিক্ষা সঞ্চালকালয়ে ৭৮ টা গ্ৰেড থ্ৰী , ১৪৯ টা গ্ৰেড ফ’ৰ আৰু তিনিটা গাড়ী চালকৰ পদৰ বাবে বিজ্ঞাপন প্ৰকাশ কৰিছিল ৷ ৩,৬৭,৮৫৩ গৰাকী নিবনুৱাই এই পদসমূহত নিযুক্তিৰ বাবে আবেদন কৰাৰ পাছত ৯৩,৫৬৪ গৰাকী নিযুক্তি পৰীক্ষাত অৱতীৰ্ণ হয় ৷২০২০ চনৰ ৪ ছেপ্তেম্বৰ আৰু ৯ জানুৱাৰীত দুবাৰকৈ এই পৰীক্ষাৰ ফলাফল ঘোষণা কৰিবলৈ নিৰ্দেশ দিয়া হৈছিল যদিও প্ৰাথমিক শিক্ষা সঞ্চালকালয়ে এই নিৰ্দেশ পালন কৰা নাছিল ৷ তাৰ পাছতে দিছপুৰত মুখ্যমন্ত্ৰী সলনি হয় ৷ এইবাৰ হিমন্ত বিশ্ব শৰ্মা নেতৃত্বাধীন চৰকাৰে সমগ্ৰ নিযুক্তি প্ৰক্ৰিয়া বাতিল কৰি সৰ্বানন্দ সোণোৱাল চৰকাৰৰ আমোলত সংঘটিত আন এক বৃহৎ নিযুক্তি কেলেংকাৰি উদঙাই দিলে ৷