লাচিতে নিশাটোৰ ভিতৰতে গড় বন্ধাৰ দৰে সাজি উলিওৱা হ’ল এটা ঘৰ ৷ মাজুলীৰ বংশীধৰ পায়েঙৰ ঘৰত এদিনৰ ভিতৰত এটা চাংঘৰ সাজিছে জিলা প্ৰশাসনে ৷ ঘৰটোলৈ আহিছে নতুন নতুন আচবাব ৷ নতুন টেবুল , চকী , বিচনা , আলমিৰা ইত্যাদি ইত্যাদি ৷ এই সাম্গ্ৰীবোৰ বংশীধৰ পায়েঙৰ ঘৰলৈ আনিছে খোদ জিলা প্ৰশাসনে ৷ কিয়নো পায়েঙৰ ঘৰলৈ এজন বিশেষ অতিথি আহিব ৷ এই অতিথিজনক আদৰিবলৈ ঘৰ সাজি তাত চূণ – তেল ঘহা হৈছে ৷ যেন বিয়াঘৰীয়া ব্যস্ততা ৷ বংশীধৰ পায়েঙে এতিয়ালৈকে বিশেষ আও ভাও একোৱেই পোৱা নাই ৷ তেওক কেৱল জনোৱা হৈছে যে মুখ্যমন্ত্ৰী ড: হিমন্ত বিশ্ব শৰ্মা আহিব মাজুলীৰ ৰাস চাবলৈ ৷ উত্তৰ কমলাবাৰী সত্ৰকে ধৰি কেবাখনো সত্ৰত ৰাস চোৱাৰ পাছত তেও বংশীধৰ পায়েঙৰ ঘৰত নৈশ যাপন কৰিব ৷ কিন্তু বংশীধৰ পায়েঙৰ ঘৰত পকী শৌচাগাৰ , পানীৰ ব্যৱস্থা একোয়েই নাই ৷ জকাইবোৱা গাঁৱৰ এজন উপান্ত কৃষক বংশীধৰ পায়েঙৰ ঘৰত সেইবাবেই উবুৰি খাই পৰিল জিলা প্ৰশাসন ৷তেওৰ পুৰণি খেৰৰ ঘৰটো সম্পূৰ্ণকৈ ভাঙি নতুনকৈ নিৰ্মান কৰা হ’ল ৷সন্মুখৰ টিনৰ চাঙঘৰটো সম্পূৰ্ণকৈ মেৰামতি কৰি ৰঙ দিয়া হ’ল ৷ পকী শৌচাগাৰ সজা হ’ল ৷ পানীৰ টেংকি বহুওৱা হ’ল ৷ এই সকলোবোৰ ইমান তৎকালে যুদ্ধৰ গতিত ঘটিছে যে বংশীধৰ পায়েঙে একো তলকিবই পৰা নাই ৷ তেও কেৱল জানে যে অসমৰ মুখ্যমন্ত্ৰী তেওৰ ঘৰৰ নিশাৰ আলহী হ’ব ৷আজিৰ দৈনিক অসম কাকতত প্ৰকাশ পাইছে এই সম্পৰ্কীয় বিস্তাৰিত বাতৰি ৷
