সংগীত জালিয়াতিৰ অভিযোগত অভিযুক্ত হৈছে অসম চৰকাৰ ৷ বিশ্ব বিশ্ৰুত সংগীতজ্ঞ এ আৰ ৰহমানৰ মিউজিক চুৰিৰ অভিযোগ উত্থাপণ হৈছে অসম চৰকাৰৰ বিৰুদ্ধে ৷
মুখ্যমন্ত্ৰী ড: হিমন্ত বিশ্ব শৰ্মা নেতৃত্বাধীন চৰকাৰখনে সম্পূৰ্ণ কৰিলে ১০০ টা দিন ৷ ১০০ দিন সম্পূৰ্ণ হোৱা উপলক্ষত মুখ্যমন্ত্ৰীয়ে নিজ হাতেৰে মুকলি কৰিছে ১০০ দিনৰ কামৰ খতিয়ান ৷ কেৱল খতিয়ান দিয়াই নহয় , ১০০ দিনৰ সফলতাৰ কাহিনীও বিজ্ঞাপন আকাৰে প্ৰকাশ কৰিছে ৰাজ্য চৰকাৰখনে ৷ কিন্তু বিগত ১০০ টা দিনত প্ৰায়ে হোৱাৰ দৰে এইবাৰো বিজ্ঞাপনে সৃষ্টি কৰিছে এক নতুন বিতৰ্কৰ ৷ ৰাজ্য চৰকাৰৰ তথ্য আৰু জনসংযোগ বিভাগে টেলিভিছন যোগে প্ৰচাৰ কৰা এটা বিজ্ঞাপনৰ বিৰুদ্ধে উত্থাপণ হৈছে চুৰিৰ অভিযোগ ৷ অভিযোগ অনুসৰি এই বিজ্ঞাপনত ব্যৱহাৰ কৰা সংগীত আৰু দৃশ্যাংশৰ আৰ্হি নকল কৰা হৈছে এখন তামিল টেলিভিছন ছিৰিজৰ পৰা ৷ এই চিৰিজৰ টাইটেল চঙ প্ৰস্তুত কৰিছে বিশ্ব বিশ্ৰুত সংগীতকাৰ এ আৰ ৰহমানে ৷ কিন্তু নেটফ্লিকছত ছিৰিজখন মুকলি হোৱাৰ পাছতেই টাইটেল চঙৰ সংগীত নকল কৰি আনি ব্যৱহাৰ কৰা হ’ল অসম চৰকাৰৰ ১০০ দিনীয়া সফলতাৰ বিজ্ঞাপনত ৷
- Donation -
বিজ্ঞাপনটোত তথ্য আৰু জনসংযোগ বিভাগে অসম চৰকাৰৰ ড্ৰাগছ বিৰোধী অভিযান , গো সুৰক্ষা আইন ,প্ৰতিমাহৰ দহ তাৰিখে বৃদ্ধ – মহিলা আৰু দিব্যাংগ পেঞ্চন প্ৰদান ,মাইক্ৰ’ফাইনেন্সৰ ঋণ ৰেহাই , ভঙা মথাউৰিৰ পুণৰ নিৰ্মান , বিদ্যুৎ চৰি ৰোধ আদিক সফলতাৰ মাইলষ্ট’ন হিচাপে অভিহিত কৰিছে ৷ অনিৰুদ্ধ যাত্ৰাৰ ১০০ টা খোজ শীৰ্ষক বিজ্ঞাপনটোৰ জড়িয়তে মুখ্যমন্ত্ৰী ড: হিমন্ত বিশ্ব শৰ্মাই অসমবাসীৰ পৰা আশীৰ্বাদো বিচাৰিছে ৷
EXCLUSIVE: বাতৰিটো ভিডিওৰ ৰূপত চাবলৈ ইয়াত ক্লিক কৰক ৷
অসম চৰকাৰৰ সফলতাৰ বিজ্ঞাপনৰ সংগীত আৰু দৃশ্যাংশৰ আৰ্হি ‘নৱাৰসা’ নামৰ তামিল চিৰিজটোৰ পৰা চুৰ কৰাৰ অভিযোগ উঠছে ৷ বিগত ৬ আগষ্টত নেটফ্লিক্সত মুক্তি পোৱা ‘নৱাৰসা’ৰ প্ৰযোজনা হ’ল মাদ্ৰাজ টকিজ আৰু কিউব চিনেমা টেকন’লজীৰ ৷৯ টা খণ্ডৰ ছিৰিজটোৰ প্ৰযোজক হিচাপে আছে যশস্বী পৰিচালক মণিৰত্নম , জয়েন্দ্ৰ আৰু পঞ্চপাকেছান ৷ কেৱল সেয়াই নহয় অসম চৰকাৰৰ তথ্য আৰু জনসংযোগ বিভাগে সফলতাৰ বিজ্ঞাপনত যি সংগীত ব্যৱহাৰ কৰিছে , সেয়া নৱাৰসাৰ বাবে প্ৰস্তুত কৰিছে বিশ্ব বিখ্যাত সংগীতকাৰ এ আৰ ৰহমানে ৷ কিন্তু সফলতাৰ ঢাক ঢোল বজাবলৈ গৈ এ আৰ ৰহমানৰ মিউজিকেই চুৰ কৰিলে অসম চৰকাৰে ৷ স্বাভাৱিকতে সংগীত চুৰিৰ এই নতুন ঘটনাই অসম চৰকাৰক আকৌ এবাৰ সমালোচনাৰ পাত্ৰ কৰি তুলিব ৷
বিজ্ঞাপনক লৈ বিগত ১০০ টা দিনৰ কাৰ্যকালত এইবাৰেই প্ৰথমবাৰ সমালোচনাৰ সন্মুখীন হোৱা নাই ড: হিমন্ত বিশ্ব শৰ্মা নেতৃত্বাধীন অসম চৰকাৰখন ৷ ইয়াৰ পূৰ্বে লাভলীনা বৰগোহাঁইক অভিনন্দন জনাবলৈ গৈ মুখ্যমন্ত্ৰীৰ ফটো দৃষ্টিকটুভাৱে ব্যৱাৰ কৰি ব্যাপক সমালোচনাৰ সন্মুখীন হৈছিল অসম চৰকাৰ ৷ এই লৈ বাতৰি সম্প্ৰচাৰ কৰাৰ বাবে তথ্য আৰু জনসংযোগ বিভাগে দ্য ক্ৰছকাৰেন্টৰ বিৰুদ্ধে ৰুজু কৰিছিল গোচৰ ৷ কিন্তু এইবাৰ খোদ তথ্য আৰু জনসংযোগ বিভাগেই এ আৰ ৰহমানৰ দৰে সংগীতজ্ঞৰ মিউজিক সফলতাৰ বিজ্ঞাপনত ব্যৱহাৰ কৰি নতুন বিতৰ্কত সোমাই পৰিছে৷ তাতে এই বিজ্ঞাপনত ব্যৱহাৰ কৰিছে মুখ্যমন্ত্ৰীৰ বক্তব্য ৷ তামিল ছিৰিজ ‘নৱাৰসা’ৰ পৰা এ আৰ ৰহমানৰ মিউজিক অসম চৰকাৰৰ জনসংযোগ বিভাগে চুৰ কৰাৰ অভিযোগ উত্থাপণ হোৱাৰ পাছত বিভাগটো মন্ত্ৰী পীয়ূষ হাজৰিকাই কি প্ৰতিক্ৰিয়া প্ৰকাশ কৰে , সেয়া লক্ষণীয় হ’ব ৷
