উত্তৰ প্ৰদেশ বিধানসভা নিৰ্বাচন সমাগত ৷ যাৰ বাবে ৰাজ্যখনলৈ প্ৰধানমন্ত্ৰী , গৃহমন্ত্ৰীৰ আহ- যাহো সঘনে বৃদ্ধি পাইছে ৷ শুকুৰবাৰে দুদিনীয়া ভ্ৰমণসূচীৰে উত্তৰ প্ৰদেশত উপস্থিত হয় গৃহমন্ত্ৰী অমিত শ্বাহ ৷লক্ষ্ণৌত এখন দলীয় সভাত ভাগ লৈ তেও মন্তব্য কৰে যে উত্তৰ প্ৰদেশত কংগ্ৰেছ , সমাজবাদী পাৰ্টী আৰু বহুজন সমাজ পাৰ্টী একলগ হ’লেও বিজেপিক পৰাভূত কৰিব নোৱাৰে ৷ তেও দলৰ নেতাসকলক প্ৰতিটো বুথতে এশজন নতুন সদস্য ভৰ্তি আৰু নতুন ভোটাৰ সকলক দলৰ লগত জড়িত কৰিবলৈ পৰামৰ্শ আগবঢায় ৷
শণিবাৰে অমিত শ্বাহে আজমগড়ত এখন ৰাজ্যিক বিশ্ববিদ্যালয়ৰ আধাৰশিলা স্থাপনৰ লগতে জনসভাও সম্বোধন কৰিব ৷ কিন্তু এই জনসভাক কেন্দ্ৰ কৰি এতিয়া নতুন বিতৰ্কৰ সৃষ্টি হৈছে ৷ কাৰণ , অমিত শ্বাহৰ সভাত মানুহ গোটাবলৈ ৰাজকোষৰ পৰা উত্তৰ প্ৰদেশ চৰকাৰে ৪০ লাখ টকা ব্যয় কৰাৰ অভিযোগ উঠিছে ৷ সংবাদ মাধ্যমৰ বাতৰি অনুসৰি ,এই সভাত মানুহ গোটাবলৈ লোকনিৰ্মান বিভাগৰ আকস্মিক নিধিৰ পৰা ৪০ লাখ টকা মোকলাই দিয়া হৈছে ৷ আজমগড়ৰ ডি এম ৰাজেশ কুমাৰে এই ধনৰাশি বিচাৰি লোকনিৰ্মান বিভাগৰ মুখ্য অভিযন্তালৈ পত্ৰ প্ৰেৰণ কৰিছিল ৷ প্ৰথমাৱস্থাত মুখ্য অভিযন্তাগৰাকীয়ে বিষয়টো বিবেচনাধীন কৰি ৰাখিছিল যদিও আন বিষয়াসকলৰ লগত আলোচনা কৰি পৰৱৰ্তী সময়ত ৪০ লাখ টকা মোকলাই দিয়ে ৷
