প্ৰধানমন্ত্ৰী মোদীৰ এখন সভাত ব্যয় কৰা হ’ব ২৩ কৌটি : ক’ত , কেতিয়া ?

মূল্যবৃদ্ধি , আৰ্থিক মন্দা একোৱেই যেন চুব নোৱাৰে আামাৰ ৰাজনেতাসকলক ৷ অসমৰ উপ নিৰ্বাচনত বিজয়ী হোৱা ৫ বিধায়কৰ শপতগ্ৰহণ অনুষ্ঠানৰ প্ৰীতি ভোজনত ব্যয় হ’ল ১২ লাখ টকা ৷ এই বাতৰি প্ৰকাশ হোৱাৰ দুদিন পাছতে মধ্যপ্ৰদেশৰ পৰা আহিছে তাতোকৈও ডাঙৰ খবৰ ৷

বীৰছা মুণ্ডাৰ জয়ন্তী উপলক্ষে ১৫ নৱেম্বৰত মধ্য প্ৰদেশত পালন কৰা হ’ব জনজাতীয় গৌৰৱ দিৱস ৷ আদিবাসীসকলৰ প্ৰতি সমৰ্পিত এই অনুষ্ঠানত ভাগ ল’বলৈ প্ৰধানমন্ত্ৰী মোদীও সিদিনা ভূপালত উপস্থিত হ’ব ৷ ভূপালত অনুষ্ঠিত হ’বলগীয়া প্ৰধানমন্ত্ৰী নৰেন্দ্ৰ মোদীৰ সভাত ২ লাখ আদিবাসী জনতাক সমাবেত কৰোৱাৰ লক্ষ্য লৈছে মধ্যপ্ৰদেশ চৰকাৰে ৷ সিদিনা ভূপালত প্ৰধানমন্ত্ৰীগৰাকীয়ে মুঠ ৪ ঘন্টা সময় কটাব ৷ মঞ্চত তেও সময় দিব ১ ঘন্টা ১৫ মিনিট ৷

প্ৰধানমন্ত্ৰী মোদীৰ ১৫ নৱেম্বৰৰ এই কাৰ্যসূচীৰ নামত ব্যয় কৰা হ’ব ২৩ কৌটি টকা ৷ ৰাষ্ট্ৰীয় সংবাদ মাধ্যমত প্ৰকাশিত বাতৰি অনুসৰি ,ইয়াৰে ১৩ কৌটি টকাই জনতাৰ যাতায়তৰ নামত ব্যয় কৰা হ’ব ৷ আনহাতে , মঞ্চ আৰু পেণ্ডেলৰ সাজ সজ্জাত ৯ কৌটি টকা ব্যয় কৰা হ’ব ৷

মধ্যপ্ৰদেশ বিধানসভাৰ ৪৭ খন আসন জনজাতীয় লোকৰ বাবে সংৰক্ষিত ৷ বিজেপিয়ে ২০০৮ চনত ইয়াৰে ২৯ খন , ২০১৩ চনত ৩১ খন আসনত জয়লাভ কৰিছিল ৷ কিন্তু ২০১৮ চনত এই সংখ্যা হ্ৰাস পালে ১৬ খনলৈ ৷ সেইবাবেই আদিবাসীৰ মন জয় কৰিবলৈ কেন্দ্ৰীয় চৰকাৰে ১৫ নৱেম্বৰৰ পৰা ২২ নৱেম্বৰলৈ জনজাতীয় গৌৰৱ দিৱস পালনৰ সিদ্ধান্ত লৈছে ৷ ইয়াৰে শুভ উদ্ধোধন কৰিব প্ৰধানমন্ত্ৰী নৰেন্দ্ৰ মোদীয়ে ৷কিন্তু মূল্যবৃদ্ধিৰ এই যুগত এখন সভাৰ নামত ২৩ কৌটি ব্যয় কৰাক লৈ এতিয়া ছোছিয়েল মেডিয়াত সমালোচনাৰ জোৱাৰ উঠিছে ৷