মহাৰাষ্ট্ৰৰ ভীমা কুৰেগাৱৰ হিংসাত উচটনি দিয়াৰ অভিযোগত নিয়াই ষ্টেন স্বামীৰ সৈতে গ্ৰেপ্তাৰ কৰা সুৰেন্দ্ৰ গাডলিঙ আৰু আন অভিযুক্তসকলৰ কম্পিউটাৰত হেকাৰে সংস্থাপন কৰিছিল ৩০ টা ফাইল ৷ ই- মেইলৰ সহায়ত কম্পিউটাৰ সংক্ৰমিত কৰি এই ফাইলসমূহ সংস্থাপন কৰা হৈছিল ৷ য’ত প্ৰধানমন্ত্ৰীক হত্যাৰ পৰিকল্পনা সন্নিৱিষ্ট চিঠিও আছিল ৷ ইয়াৰ ভিত্তিতেই সুৰেন্দ্ৰ গাডলিঙ , ষ্টেন স্বামী , ৰোনা উইলছনসহ ১৬ গৰাকী সামাজিক কৰ্মীক নিয়াই গ্ৰেপ্তাৰ কৰে ৷ আচৰিত যেন লাগিলেও এনে এক চাঞ্চল্যকৰ দাবী কৰিছে এটা আমেৰিকান ফৰেনচিক সংস্থা আৰ্ছেনাল কনছাল্টিঙে ৷ ন্যায়িক জিন্মাত সামাজিক কৰ্মী ষ্টেন স্বামীৰ মৃত্যুৰ পাছতে আমেৰিকান ফৰেনছিক সংস্থাটোৱে এই দাবী কৰিছে ৷সংস্থাটোৰ মতে মহাৰাষ্ট্ৰৰ ভীমা কুৰেগাওৰ যিটো গোচৰত ষ্টেন স্বামীসহ আন কেইবাজনো সামাজিক কৰ্মকৰ্তাক গ্ৰেপ্তাৰ কৰা হৈছে , সেয়া আছিল এক গভীৰ ষড়যন্ত্ৰ ৷ পৰিকল্পিতভাৱে সামাজিক কৰ্মী কেইগৰাকীৰ কম্পিউটাৰত ই- মেইলৰ জড়িয়তে কিছুমান আপত্তিজনক তথ্য সংস্থাপন কৰা হৈছিল , যাৰ ভিত্তিত তেওলোকক গ্ৰেপ্তাৰ কৰা হয় ৷ এই ষড়যন্ত্ৰ চলিছিল দুবছৰ আগৰ পৰা ৷ যাৰ প্ৰথম লক্ষ্য আছিল ভীমা কুৰেগাও গোচৰৰ অন্যতম অভিযুক্ত সুৰেন্দ্ৰ গাডলিঙ ৷
- Donation -
তিনি বছৰ আগতে ভীমা কুৰেগাৱত সংঘটিত হিংসাত উচটনি দিয়াৰ অভিযোগত নিয়াই গ্ৰেপ্তাৰ কৰিছিল ৮৪ বছৰীয়া ষ্টেন স্বামী , ধৰ্ম যাজক সুৰেন্দ্ৰ গাডলিঙসহ মুঠ ১৬ গৰাকী অভিযুক্তক ৷ অভিযোগ আছিল যে এই ১৬ গৰাকী অভিযুক্তই প্ৰধানমন্ত্ৰীক হত্যাৰ পৰিকল্পনা কৰিছে ৷ তেওলোকৰ ওপৰত জাপি দিয়া হৈছে ইউ এ পি এ আইনৰ ধাৰা ৷ যাতে অভিযুক্তসকলে কোনো কাৰণতে জামিন লাভ নকৰে ৷ ইউ এ পি এ আইনৰ অধীনত বন্দী হৈ থকা অৱস্থাতে শেহতীয়াকৈ মৃত্যু ঘটিল ৮৪ বছৰীয়া ষ্টেন স্বামীৰ ৷ ইয়াৰ মাজতে আমেৰিকান ফৰেনছিক সংস্থা আৰ্ছেনাল কনছাল্টিঙে দাবী কৰিছে যে একেটা গোচৰত গ্ৰেপ্তাৰ হোৱা সুৰেন্দ্ৰ গাডলিঙৰ কম্পিউটাৰত অতি কৌশলেৰে সংস্থাপন কৰা হৈছিল কেতবোৰ আপত্তিজনক তথ্য প্ৰমাণ ৷ কেবল সুৰেন্দ্ৰ গাডলিঙেই নহয় , আন এগৰাকী অভিযুক্ত ৰোনা উইলছনো হেকাৰৰ ষড়যন্ত্ৰৰ বলি হৈছে ৷ হেকাৰে ই- মেইলৰ জড়িয়তে তেওলোকৰ কম্পিউটাৰত ভৰাই দিয়ে ৩০ টা আপত্তিজনক ফাইল ৷ এই ফাইলসমূহৰ ভিতৰত এখন চিঠি আছিল , য’ত প্ৰধানমন্ত্ৰী নৰেন্দ্ৰ মোদীক হত্যাৰ বিষয়ে আলোচনা কৰা হৈছে ৷ এই চিঠিখনৰ ভিত্তিতেই চিপিআাই – মাওবাদীৰ লগত সম্পৰ্ক ৰক্ষাৰ অভিযোগ তুলি ২০১৮ চনত সুৰেন্দ্ৰ গাডলিঙৰ লগতে মুঠ ১৬ জন অভিযুক্তক গ্ৰেপ্তাৰ কৰা হয় ৷ আৰ্ছেনাল কনছাল্টিঙৰ প্ৰতিবেদনত প্ৰকাশ পোৱা মতে ২০১৬ চনৰ পৰা সুৰেন্দ্ৰ গাডলিঙৰ বিৰুদ্ধে এই ষড়যন্ত্ৰ আৰম্ভ হৈছিল ৷ প্ৰথমতে নেট ৱায়াৰ নামৰ এটা ছফটৱেৰৰ জড়িয়তে তেওৰ কম্পিউটাৰ সংক্ৰমিত কৰা হৈছিল ৷ তাৰ পাছত ২০১৭ চনত জুলাই মাহৰ কোনো এটা আবেলিত প্ৰায় ২০ মিনিট সময়ৰ বাবে হেকাৰসকল সুৰেন্দ্ৰ গাডলিঙ আৰু ৰোনা উইলছনৰ কম্পিউটাৰত সক্ৰিয় হৈ পৰিছিল ৷ সেই সময়তে আপত্তিজনক ৩০ টা ফাইল তেওলোকৰ কম্পি্উটাৰত সংস্থাপিত কৰা হয় ৷ আৰ্ছেনালৰ প্ৰতিবেদনত লগতে কোৱা হয় যে গাডলিঙৰলৈ ২০১৬ চনৰ ফেব্ৰুৱাৰী মাহত প্ৰথমতে এটা ই- মেইল প্ৰেৰণ কৰা হৈছিল ৷ ই- মেইলৰ আন ১৪ গৰাকী ৰিছিপেন্টো আছিল ৷ এই ই- মেইলৰ এটাচ্ছমেন্ট খোলাৰ লগে লগে তেওৰ কম্পিউটাৰত নেট ৱায়াৰ নামৰ ছফটৱেৰ ইনষ্টল হৈ যায় ৷ যাৰ সহায়ত হেকাৰে তেওৰ কম্পিউটাৰ নিজৰ দখললৈ আনিবলৈ সক্ষম হয় ৷ আনকি যিয়ে ই- মেইলৰ এটাচ্ছমেন্ট ডাউনলোড কৰিছিল , তেওলোক আটায়ে হেকাৰৰ নীৰিক্ষণত সোমাই পৰিছিল ৷
এই ভয়াৱহ ফৰেনছিক আক্ৰমণৰ খবৰ পোহৰলৈ অনা আৰ্ছেনাল কনছাল্টিঙৰ প্ৰতিবেদনখন প্ৰথমতে প্ৰকাশ পায় দ্য ৱাছিঙটন পোষ্টত ৷ এই প্ৰতিবেদনৰ পাতে পাতে বিশ্লেষণ কৰি দেখুওৱা হৈছে যে কিদৰে সুৰেন্দ্ৰ গাডলিঙৰ আৰু ৰোনা উইলছনৰ কম্পিউটাৰত ১৪ খন আপত্তিজনক চিঠি সংস্থাপন কৰা হৈছিল ৷ অৱশ্যে নিয়াই আৰ্ছেনালৰ প্ৰতিবেদন সন্দৰ্ভত মন্তব্য দিবলৈ অস্বীকাৰ কৰিছে ৷ আমেৰিকাৰ বষ্টনত হোৱা বোমা বিস্ফোৰণকে ধৰি কেবাটাও অনুসন্ধান সফলতাৰে সম্পন্ন কৰা আৰ্ছেনালৰ প্ৰতিবেদনত সুৰেন্দ্ৰ গাডলিঙৰ কম্পিউটাৰত হোৱা আক্ৰমণক অত্যন্ত গুৰুত্বপূৰ্ণ ঘটনা হিচাপে উল্লেখ কৰা হৈছে ৷
