এইবাৰ খেলা হ’ব ত্ৰিপুৰাত ৷ পশ্চিমবংগৰ বিধানসভা নিৰ্বাচনত অভাবনীয় সফলতা লাভ কৰাৰ পাছত তৃণমূল কংগ্ৰেছ প্ৰবল আত্মবিশ্বাসী হৈ পৰিছে ৷ বংগৰ বাহিৰতো সংগঠন বিস্তাৰৰ কাম আৰম্ভ কৰিছে মমতা বেনাৰ্জী নেতৃত্বাধীন দলটোৱে ৷ প্ৰথম লক্ষ্য হিচাপে লৈছে উত্তৰ –পূৱৰ ৰাজ্য ত্ৰিপুৰাক ৷ বাংলাভাষী লোকৰ সংখ্যাগৰিষ্ঠতা থকা ত্ৰিপুৰাত আজি প্ৰথমবাৰৰ বাবে ভৰি দিয়ে তৃণমূল কংগ্ৰেছৰ সৰ্বভাৰতীয় সাধাৰণ সম্পাদক অভিষেক বেনাৰ্জীয়ে ৷ কিন্তু তৃণমূল নেতাগৰাকীৰ ত্ৰিপুৰাত পদাৰ্পনৰ লগে লগে সৃষ্টি হয় উত্তপ্ত পৰিস্থিতিৰ ৷ সংবাদ প্ৰতিষ্ঠানৰ বাতৰি অনুসৰি , উদয়পুৰ মাতাবাৰী অঞ্চলত অভিষেক বেনাৰ্জীৰ গাড়ী প্ৰবেশ কৰাৰ লগে লগে একাংশ বিজেপি কৰ্মীয়ে “গো বেক “ শ্ল’গান দিবলৈ আৰম্ভ কৰে ৷ আনকি তৃণমূলৰ নেতাগৰাকীৰ গাড়ীত আক্ৰমণৰো চেষ্টা চলায় ৷ এই ঘটনাৰ পাছতে অভিষেক বেনাৰ্জীয়ে টুইটাৰত এইদৰে লিখে –“বিজেপি শাসিত ত্ৰিপুৰাৰ গণতন্ত্ৰ ! বিপ্লববাবুয়ে এই ৰাজ্যক নতুন পথলৈ লৈ গৈছে ৷” উল্লেখ্য যে আজি পুৱা কলকাতাৰ পৰা গৈ আগৰতলাত উপস্থিত হোৱা নেতাগৰাকীয়ে ত্ৰিপুৰেশ্বৰী মন্দিৰ দৰ্শন কৰাৰ কথা আছিল ৷ কিন্তু বাটতে তেও বিজেপি কৰ্মীৰ আক্ৰমণৰ সন্মুখীন হয় ৷ ইয়াৰ পূৰ্বে তৃণমূলৰ হৈ নিৰ্বাচনী কৌশল যুগুত কৰা সংস্থা ‘আই-পেক’ৰ ২৩ জন কৰ্মীকো হোটেলত আৱদ্ধ কৰিছিল ত্ৰিপুৰাৰ আৰক্ষীয়ে ৷
