নীৰৱ মোদী অথবা মেহুল চক্সীৰ নাম আপুনি নিশ্চয় শুনিছে ৷ এই আটাইকেইজন একো একোজন ডাঙৰ প্ৰবঞ্চক ৷ যিয়ে বেংকৰ পৰা ঋণ লৈ ভাৰতৰ পৰা পলায়ন কৰিছে ৷ এতিয়া কল্পনা কৰক , যদি নীৰৱ মোদী অথবা মেহুল চক্সীয়ে বিজেপি দলত যোগদান কৰে , তেনেহ’লে তেওলোকৰ সকলো অপৰাধ মাফ কৰি দিয়া হ’ব নেকি ?এই প্ৰশ্ন উত্থাপণ হৈছে অসম বিজেপিৰ আজিৰ এটা পৰিঘটনাৰ পৰা ৷ এ আই ইউ ডি এফৰ ভবানীপুৰ সমষ্টিৰ বিধায়ক ফনী তালুকদাৰে দল এৰি বুধবাৰে যোগদান কৰিলে বিজেপি দলত ৷ আনুষ্ঠানিভাৱে বিজেপিত যোগদান কৰাৰ পূৰ্বে তেও মুখ্যমন্ত্ৰী ড: হিমন্ত বিশ্ব শৰ্মাকো সাক্ষাৎ কৰে ৷ খোদ মুখ্যমন্ত্ৰীয়ে এ আই ইউ ডি এফৰ পদত্যাগী বিধায়কগৰাকীক দললৈ আদৰণি জনায় ৷ বদৰুদ্দিন আজমল নেতৃত্বাধীন দলটোৰ পৰা গৈ বিজেপিত যোগদান কৰা ফনী তালুকদাৰেই প্ৰথমগৰাকী বিধায়ক ৷ ফনী তালুকদাৰৰ বিজেপিত যোগদানে ৰাইজৰ সন্মুখত মেলি দিলে আন বহু প্ৰশ্ন ৷ কিন্তু কিয় ? কি এই প্ৰশ্ন ?
- Donation -
ফনী তালুকদাৰ ৷বিগত বিধানসভা নিৰ্বাচনত ভবানীপুৰ সমষ্টিৰ পৰা এ আই ইউ ডি এফ দলৰ টিকটত বিধায়ক হিচাপে জয়ী হৈছিল ৷ ইয়াৰ পূৰ্বে দুবাৰ তেও একেটা সমষ্টিৰ পৰা প্ৰতিদ্বন্দিতা কৰিছিল যদিও জয়ৰ মুখ দেখা নাছিল ৷ এইবাৰ তেও বদৰুদ্দিন আজমল নেতৃত্বাধীন দলটোৰ পৰা নিৰ্বাচনত অৱতীৰ্ণ হৈ জয়লাভ কৰিবলৈ সক্ষম হয় ৷ কিন্তু এইগৰাকী ফনী তালুকদাৰৰ প্ৰকৃত পৰিচয় এগৰাকী ৰাজনীতিবিদ নহয় ৷ বিভিন্ন মাটি দখলৰ কেলেংকাৰি , বেংকৰ ঋণ জালিয়াতিৰ লগত সাঙোৰ খাই আছে ফনী তালুকদাৰৰ নাম ৷ কেৱল সেয়াই নহয় ভূতপূৰ্ব মুখ্যমন্ত্ৰী তৰুণ গগৈ আৰু প্ৰাক্তন মুখ্যমন্ত্ৰী সৰ্বানন্দ সোণোৱালৰ আমোলত দুবাৰকৈ জেলৰ ভাত খাবলগীয়া হৈছিল এইগৰাকী ফনী তালুকদাৰে ৷
ফনী তালুকদাৰক প্ৰথমবাৰ গ্ৰেপ্তাৰ কৰা হৈছিল সোণাপুৰ আৰক্ষী থানাত ৰুজু হৈ থকা এটা গোচৰৰ ভিত্তিত ২০১১ চনত ৷ এই গোচৰ ৰুজু কৰিছিল সোণাপুৰৰ চক্ৰ বিষয়াই ৷ সোণাপুৰ ৰাজহ চক্ৰৰ অন্তৰ্গত টেপেছিয়াত চৰকাৰী মাটি দখল কৰাৰ অভিযোগত গ্ৰেপ্তাৰ কৰা হৈছিল ফনী তালুকদাৰক ৷ ভাৰতীয় দণ্ডবিধিৰ ধাৰা ৪৪৭ , ৪২৭ , ৩৭৯ আৰু হিল লেণ্ড এণ্ড ইকোলজিকেল চাইট প্ৰটেকশ্যন এক্টৰ ধাৰা ১৯ ৰ অধীনত গ্ৰেপ্তাৰ হৈছিল ফনী তালুকদাৰ ৷ ফনী তালুকদাৰৰ গ্ৰেপ্তাৰৰ পাছতে তেতিয়াৰ মুখ্যমন্ত্ৰী তৰুণ গগৈয়ে মন্তব্য কৰিছিল যে মাটি দখলৰ অনৈতিক কাৰ্যৰ লগত বহু আৰক্ষী বিষয়াও জড়িত হৈ আছে ৷
সেইবাৰ ৰঙাঘৰৰ ভাত খোৱাৰ পাছতো এইগৰাকী ফনী তালুকদাৰৰ স্বভাৱৰ কোনো পৰিৱৰ্তন নহ’ল ৷ ২০১৮ চনৰ মাৰ্চ মাহত তেও পুণৰবাৰ গ্ৰেপ্তাৰৰ সন্মুখীন হয় ৷ এইবাৰ অপৰাধ – বেংকৰ ঋণ জালিয়াতি ৷অসম আৰক্ষীৰ অপৰাধ অনুসন্ধান সংস্থা চমুকৈ বি আই ই অ’ত ৰুজু হৈ থকা ২/২০১৮ নং গোচৰটোত তেওক গ্ৰেপ্তাৰ কৰা হৈছিল ৷ তদন্তকাৰী বিষয়াই সেই সময়ত জানিবলৈ দিছিল যে ফনী তালুকদাৰে আন চাৰিজন সহযোগীৰ সৈতে পঞ্জাৱ নেচনেল বেংকৰ জু ৰোড শাখাৰ পৰা জালিয়াতিৰে ২ কৌটি ৫৮ লাখ টকাৰ ঋণ সৰকাইছিল ৷ ইয়াৰে ১ কৌটি ৫৮ লাখ টকাৰ ঋণ তেও অস্তিত্বহীন দুটা বিল্ডিঙৰ নামত সৰকাই নিয়াৰ বিপৰীতে ১ কৌটি টকাৰ কেচ ঋণ ভুৱা নথি পত্ৰৰে সৰকাইছিল ৷ যাৰ বাবে ভাৰতীয় দণ্ডবিধিৰ ১২০(বি) , ৪৬৮ , ৪২০ আৰু ৪০৬ ধাৰাৰ অধীনত তেওক গ্ৰেপ্তাৰ কৰি জেললৈ প্ৰেৰণ কৰা হয় ৷ সেই সময়ত অসম আৰক্ষী আছিল প্ৰাক্তন মুখমন্ত্ৰী সৰ্বানন্দ সোণোৱালৰ অধীনত ৷
ইয়াৰ বাহিৰেও মাটি দখল সম্পৰ্কীয় আন গোচৰো ফনী তালুকদাৰৰ বিৰুদ্ধে ৰুজু হৈ আছে ৷ কিন্তু সেই সকলো পাপ যেন তেও খণ্ডন কৰিব বিচাৰিছে বিজেপি দলত যোগদান কৰি ৷ তাতোকৈ আশ্চৰ্যজনক কথাটো হ’ল – বিগত সৰ্বানন্দ সোণোৱাল চৰকাৰৰ আমোলত জালিয়াতি আৰু প্ৰবঞ্চনাৰ গোচৰত গ্ৰেপ্তাৰ হোৱা এজন অভিযুক্তক খোদ বৰ্তমানৰ মুখ্যমন্ত্ৰী হিমন্ত বিশ্ব শৰ্মাই দললৈ আদৰণি জনাইছে ৷ইয়াৰ পাছত বিজেপিয়ে নিজকে আদৰ্শত অটল দল হিচাপে পৰিচয় দিয়াৰ নৈতিক সাহস ৰাখিব পাৰিবনে ?
চৰ্চা চলিছে যে পূৰ্বৰ গোচৰৰ পৰা পৰা ৰেহাই পাবলৈ আৰু নিজৰ ব্যৱসায়িক প্ৰতিপত্তি বঢ়োৱাৰ লক্ষ্যৰে বিজেপিত যোগ দিছে ফনী তালুকদাৰে ৷ এতিয়া প্ৰশ্ন হ’ল – ফনী তালুকদাৰৰ পূৰ্বৰ পাপৰ ভাগ এতিয়াৰ বিজেপি দল আৰু চৰকাৰে মূৰ পাতি ল’বনে ? নে বিজেপিত যোগ দিয়াৰ বাবেই সকলো পাপ খণ্ডণ হৈ যাব ?
যদি বিজেপিত যোগ দিয়া বাবেই ফনী তালুকদাৰৰ সকলো অপৰাধ মাফ হৈ যায় , তেনেহ’লে নীৰৱ মোদী অথবা মেহুল চক্সীৰ দৰে দাগী অপৰাধী , প্ৰবঞ্চকেও একেই পথ ল’ব বুলি এতিয়া বিভিন্ন মাধ্যমত আলোচনা চলিছে ৷ সৰ্বানন্দ সোণোৱাল চৰকাৰে গ্ৰেপ্তাৰ কৰা এজন ব্যক্তিক কিদৰে হিমন্ত বিশ্ব শৰ্মাৰ চৰকাৰৰ আমোলত দললৈ আদৰি নিয়া হ’ল , তাৰো উত্তৰ শাসকীয় দলটোৰ পৰা অসমৰ ৰাইজে নিশ্চয় বিচাৰিব ৷
