বেংক হ’ব ডিজিটেল ৷ নাথাকিব বেংকৰ কোনো শাখা ৷ এনে এটা দিনৰ বাবে বেছি অপেক্ষা কৰিব নালাগে ৷ প্ৰধানমন্ত্ৰী নৰেন্দ্ৰ মোদীৰ ঘোষণাৰ পৰা এই কথা প্ৰায় স্পষ্ট হৈ পৰিছে ৷ শুকুৰবাৰে ইনফিনিটি ফ’ৰামৰ এক সন্মিলনত ভাষণ প্ৰদান কৰি প্ৰধানমন্ত্ৰী গৰাকীয়ে কয় ,’অদূৰ ভৱিষ্যতে সকলো লেনদেন হ’ব ডিজিটেল মাধ্যমত ৷ অহা দিনবোৰত এয়াই স্বাভাবিক প্ৰক্ৰিয়া হ’ব ৷’ তেও লগতে কয় যে অৰ্থনৈতিক প্ৰযুক্তিক এনে এক হাইপ্ৰ’ফাইল আধুনিকতাৰ স্তৰত উপনীত কৰাব লাগিব যাতে অৰ্থনীতিত নতুন বিপ্লৱৰ সূচনা হয় ৷ নোটবিহীন ডিজিটেল অৰ্থনীতিৰ প্ৰসংগত প্ৰধানমন্ত্ৰীগৰাকীয়ে কয় যে বিগত বছৰত এটা ঐতিহাসিক ঘটনা সংঘটিত হৈছে ৷ সমগ্ৰ দেশত এটিএমৰ পৰা যিমান টকা উলিওৱা হৈছে , তাতকৈ বেছি লেনদেন হৈছে মোবাইলৰ মাধ্যমত ৷ অৰ্থাৎ অনলাইনত ৷ আৰ্থিক লেনদেনৰ ক্ষেত্ৰত নোটক অতিক্ৰম কৰিছে ডিজিটেল পেমেন্টে ৷ সেইবাবেই ডিজিটেল বেংক এতিয়া সম্ভৱ বুলি তেও উল্লেখ কৰে ৷
প্ৰধানমন্ত্ৰী মোদীৰ এই বক্তব্যৰ পাছতে চৰ্চা চলিছে যে হয়তো কিছু বছৰৰ ভিতৰত দেশত বেংকৰ শাখাসমূহ বিলুপ্ত হ’ব ৷ তাৰ সলনি পাতনি মেলা হ’ব ডিজিটেল বেংকৰ ৷
