টি-২০ বিশ্বকাপৰ পাছতে বিৰাট কোহলীয়ে এৰিব ভাৰতীয় টি-২০ ক্ৰিকেট দলৰ নেতৃত্ব। অধিনায়ক হিচাপে এইটোৱে হ’ব কোহলীৰ অন্তিম টি-২০ বিশ্বকাপ। কোহলীয়ে ইতিমধ্যে ভাৰতীয় ক্ৰিকেট নিয়ন্ত্ৰণ ব’ৰ্ডক নিজৰ সিদ্ধান্তৰ বিষয়ে অৱগত কৰিছে। অৱশ্যে কোহলীয়ে অধিনায়ক পদ এৰিলেও দেশৰ খেলি যাব টি-২০।
ভাৰতে ২৪ অক্টোবৰত পাকিস্তানৰ বিৰুদ্ধে বিশ্বকাপৰ অভিযান আৰম্ভ কৰিব যদিও প্ৰতিযোগিতাখনৰ পিছত ভাৰতৰ টি-২০ দলক কোনে নেতৃত্ব প্ৰদান কৰিব তাক লৈ চৰ্চা আৰম্ভ হৈছে।
এই ধৰণৰ চৰ্চা চলি থকাৰ মাজতে BCCIৰ এজন বিষয়াই কয় যে টি-২০ বিশ্বকাপৰ পিছত ভাৰতীয় দলক নেতৃত্ব দিব ৰোহিত শৰ্মাই। বিষয়াজনে ইনছাইডস্পোৰ্টছক এটা সাক্ষাতকাৰত কয় যে বিশ্বকাপৰ পিছত ভাৰতীয় টি-২০ দলৰ অধিনায়ক হ’ব ৰোহিত শৰ্মা। কিন্তু প্ৰতিযোগিতাৰ শেষতহে ইয়াৰ আনুষ্ঠানিক ঘোষণা কৰা হ’ব।
উল্লেখ্য যে ৰোহিত শৰ্মা এতিয়া ভাৰতীয় দলৰ উপ-অধিনায়ক। অৱশ্যে ৰোহিত শৰ্মা অধিনায়ক হোৱাৰ পিছত উপ-অধিনায়ক কোন হ’ব সেয়া এতিয়াও নিশ্চিত হোৱা নাই বুলিও জানিবলৈ দিয়ে ব’ৰ্ডৰ বিষয়াজনে। ব’ৰ্ডৰ আন এক সূত্ৰ অনুসৰি টি-২০ দলৰ উপ-অধিনায়কৰ দায়িত্ব কে এল ৰাহুলক দিয়াৰ সম্ভাৱনা আছে। অৱশ্যে এই ক্ষেত্ৰতো বিশ্বকাপৰ পিছতেই চূড়ান্ত সিদ্ধান্ত ল’ব ভাৰতীয় ক্ৰিকেট ব’ৰ্ডে।
