লক্ষ্য ২০২৪ : দিল্লীত আৰম্ভ হৈছে নৈশভোজৰ ৰাজনীতি

বিৰোধীক ঐক্যবদ্ধ কৰাৰ বাবে এইবাৰ উদ্যোগ গ্ৰহণ কৰিছে কংগ্ৰেছ সভানেত্ৰী ছোনিয়া গান্ধীয়ে ৷ এই প্ৰক্ৰিয়াৰ অংশ হিচাপে অহা ২০ আগষ্টত বিৰোধী নেতাসকলৰ সৈতে এখন ভাৰ্ছুৱেল বৈঠকত মিলিত হ’ব কংগ্ৰেছ সভানেত্ৰীগৰাকী ৷এই বৈঠকত পশ্চিমবংগৰ মুখ্যমন্ত্ৰী মমতা বেনাৰ্জী  , তামিলনাডুৰ মুখ্যমন্ত্ৰী এম কে ষ্টালিন , মহাৰাষ্ট্ৰৰ মুখ্যমন্ত্ৰী উদ্ধৱ ঠাকৰে , এন চি পিৰ মুৰব্বী শাৰদ পাৱাৰ  উপস্থিত থকাৰ সম্ভাৱণা আছে ৷ সূত্ৰৰ খবৰ অনুসৰি , সেইদিনাই বিৰোধী নেতাসকলক নৈশভোজৰ বাবে কংগ্ৰেছ সভানেত্ৰীগৰাকীৰ তৰফৰ পৰা নিমন্ত্ৰণ জনোৱা হ’ব ৷

সংসদৰ বৰ্ষাকালীন অধিৱেশনৰ সময়ত বিভিন্ন ইছ্যুত বিৰোধীক একগোট হোৱা দেখা গৈছে ৷ বৃহস্পতিবাৰেও ১৫ টা বিৰোধী দলক ঐক্যবদ্ধ হোৱা দেখা গৈছে ৷ তাৰ মাজতে শিৱসেনাৰ সাংসদ সঞ্জয় ৰাউতে সংবাদমাধ্যমক জানিবলৈ দিয়ে যে বিৰোধী এতিয়া একজোট হৈছে ৷ ২০ আগষ্টত কংগ্ৰেছ সভানেত্ৰী ছোনিয়া গান্ধীয়ে বিভিন্ন ৰাজ্যৰ বিৰোধী দলৰ মুখ্যমন্ত্ৰীসকলৰ সৈতে আলোচনাত মিলিত হ’ব ৷মহাৰাষ্ট্ৰৰ মুখ্যমন্ত্ৰীও উক্ত বৈঠকলৈ আমন্ত্ৰিত হৈছে ৷

ইয়াৰ পূৰ্বে কংগ্ৰেছ নেতা কপিল ছিব্বালৰ ঘৰতো এক নৈশভোজত মিলিত হৈছিল কেবাগৰাকীও বিৰোধী নেতা ৷ তাৰ ভিতৰত আছিল তৃণমূলৰ সাংসদ ডেৰেক অ’ব্ৰায়েন , সমাজবাদী পাৰ্টীৰ নেতা অখিলেশ যাদৱ , শিৱসেনাৰ সঞ্জয় ৰাউত , নেচনেল কনফাৰেন্সৰ ওমৰ আব্দুল্লা আদি ৷এইদৰেই ২০২৪ চনৰ লোকসভা নিৰ্বাচনৰ ৰণকৌশল তৈয়াৰৰ বাবে দিল্লীত এতিয়া নৈশভোজৰ ৰাজনীতি আৰম্ভ হৈছে ৷