Investigative reporting with dedication.
পেগাছাছ ছফটৱেৰৰ অপপ্ৰয়োগ আৰু ক’লা কৃষি আইনৰ বিৰুদ্ধে বিৰোধীৰ ঐক্যবদ্ধ প্ৰতিবাদ অব্যাহত আছে ৷বৃহস্পতিবাৰে সংসদ ভবনৰ পৰা দিল্লীৰ বিজয় চ’ক পৰ্যন্ত প্ৰতিবাদী সমদল উলিয়ালে কংগ্ৰেছ , শিবসেনাসহ বিৰোধী দলৰ নেতাসকলে ৷তাৰ পূৰ্বে ১৫ টাকৈ বিৰোধী দলৰ নেতা এখন বৈঠকত মিলিত হয় ৷ বৈঠকৰ পাছতে হাতে হাতে প্লে কাৰ্ড লৈ সমদল উলিয়ায় বিৰোধী নেতাসকলে ৷
কংগ্ৰেছ নেতা ৰাহুল গান্ধীয়ে কয় যে পেগাছাছ , কৃষি আইনসহ একাধিক বিষয় সংসদত উত্থাপণ কৰা হৈছে ৷ কিন্তু বিৰোধীক সংসদত কথা ক’বলৈ দিয়া হোৱা নাই ৷ এয়া গণতন্ত্ৰৰ হত্যা ৷
কংগ্ৰেছ সাংসদ শশী থাৰুৰৰ মতে কেন্দ্ৰই সংসদ ঠিকমতে চলিবলৈ দিয়া নাই ৷ কোনো আলোচনা নোহোৱাকৈ আইন গৃহীত কৰি গৈছে ৷ দেশৰ অৰ্থনীতি ,ভেকচিন , নিবনুৱা সমস্যা , কৃষি আইন আদি বিষয়সমূহত চৰকাৰে মূৰ পোলোকা মাৰিছে ৷
শিবসেনা সাংসদ সঞ্জয় ৰাউতে কয় যে সংসদত বিৰোধীক মত প্ৰকাশৰ সুযোগ দিয়া হোৱা নাই ৷
উল্লেখ্য যে সংসদৰ বৰ্ষাকালীন অধিৱেশন আৰম্ভ হোৱাৰ পাছৰে পৰা চৰকাৰৰ বিৰুদ্ধে সৰৱ হৈ আহিছে বিৰোধী দলসমূহ ৷ বিৰোধীয়ে ধাৰাবাহিকভাৱে পেগাছাছ কাণ্ডৰ তদন্ত , কৃষি আইন বাতিলৰ দাবী জনাই আহিছে ৷ কিন্তু বিৰোধীৰ দাবী মানি ল’বলৈ অস্বীকাৰ কৰিছে কেন্দ্ৰীয় চৰকাৰে ৷ ইয়াৰ প্ৰতিবাদত সংসদ অচল কৰি ৰাখিছে বিৰোধী দলসমূহে ৷সেয়ে নিৰ্ধাৰিত সময়ৰ পূৰ্বেই লোকসভা স্থগিত ৰখাৰ কথা ঘোষণা কৰা হৈছে ৷ ইয়াৰ পাছতেই ৰাজপথত নামি বিৰোধী দলসমূহে প্ৰতিবাদ সাব্যস্ত কৰে ৷
