এপিএছচিয়ে আকৌ মেধাবী প্ৰাৰ্থীৰ লগত হেতালি খেলিবলৈ ওলাইছে নেকি ?

ৰাজ্যত কোভিডৰ সংক্ৰমণ মুঠেও হ্ৰাস পোৱা নাই ৷ যাৰ বাবে বাতিল কৰিবলগীয়া হৈছে হাইস্কুল শিক্ষান্ত আৰু হাইমাদ্ৰাছা পৰীক্ষা ৷ কিন্তু এনে বিভীষিকাময় পৰিৱেশৰ মাজতে অসম লোকসেৱা আয়োগে অনুষ্ঠিত কৰিবলৈ লৈছে ২০২০ বৰ্ষৰ সংযুক্ত প্ৰতিযোগিতামূলক পৰীক্ষাৰ প্ৰাৰম্ভিক পৰীক্ষা ৷ আয়োগৰ এখন জাননীত অহা আগষ্ট মাহৰ দ্বিতীয় ভাগত পৰীক্ষা অনুষ্ঠিত কৰাৰ লক্ষ্য লোৱা হৈছে বুলি উল্লেখ কৰা হৈছে ৷ ইয়াৰ বাবে প্ৰতিখন জিলাৰ উপায়ুক্তসকলক পৰীক্ষা কেন্দ্ৰৰ ব্যৱস্থা কৰিবলৈ কোৱা হৈছে ৷ এই জাননী প্ৰকাশৰ লগে লগে হাহাকাৰ লাগিছিল লোকসেৱা আয়োগৰ পৰীক্ষাত অৱতীৰ্ণ হ’বলগীয়া ৭৬ সহস্ৰাধিক পৰীক্ষাৰ্থীৰ মাজত ৷ তাৰ মাজতে শুকুৰবাৰে লোকসেৱা আয়োগে প্ৰকাশ কৰা আন এখন জাননীয়ে প্ৰতিগৰাকী প্ৰাৰ্থীক দু:শ্চিন্তাত পেলাইছে ৷ কিয়নো নতুন জাননীখনত কোৱা হৈছে যে প্ৰতিগৰাকী প্ৰাৰ্থীয়ে পৰীক্ষা বা সাক্ষাৎকাৰৰ তিনিদিন পূৰ্বে আৰ টি – পি চি আৰ টেষ্ট কৰিব লাগিব ৷ কোভিড ৰিপোৰ্ট নিগেটিভ অহা প্ৰাৰ্থীসকলেহে পৰীক্ষাত অৱতীৰ্ণ হ’ব পাৰিব ৷ এই জাননী লাভ কৰাৰ পাছত প্ৰাৰ্থীসকল দু:শ্চিন্তাত ভোগাটো স্বাভাবিক ৷ কিয়নো , অসমত প্ৰতিদিনে সহস্ৰাধিক লোক কোভিডত আক্ৰান্ত্ হৈ আছে ৷ তাৰ মাজত কেনেবাকৈ যদি কোনোবা প্ৰাৰ্থী সংক্ৰমিত হয় , তেনেহ’লে তেওৰ বছৰ বছৰযোৰা পৰিশ্ৰম অথলে যোৱাটো নিশ্চিত ৷ সেইবাবেই লোকসেৱা আয়োগৰ পৰীক্ষাত অৱতীৰ্ণ হ’বলগীয়া প্ৰাৰ্থীসকলে প্ৰশ্ন কৰিছে –কিয় অসম লোকসেৱা আয়োগে ৰাজ্যত কোভিডৰ সংক্ৰমণ হ্ৰাস হোৱালৈ অপেক্ষা কৰিব নোৱাৰে ? নে চাকৰিৰ বাবে প্ৰস্তুতি চলাই থকা হাজাৰ হাজাৰ মেধাবী প্ৰাৰ্থীক লৈ আকৌ এবাৰ হেতালি খেলা হ’ব ?