মোদীৰ আমোলত কিমান ধাৰত পোত গ’ল ভাৰত ?

দুই কৌটি কৰ্মসংস্থাপন , কৃষকৰ আয় দুগুণ কৰা , ক’লা ধন ঘূৰাই অনা আদি বিবিধ প্ৰতিশ্ৰুতিৰে শাসনলৈ আহিছিল নৰেন্দ্ৰ মোদীৰ চৰকাৰ ৷ কোনো এটা প্ৰতিশ্ৰুতিয়েই আজিলৈ পূৰণ নহ’ল ৷ কিন্তু আন এটা দিশত মোদীৰ শাসনকালত ভাৰতে আকাশ চুবলৈ সক্ষম হৈছে ৷ সেয়া হ’ল ঋণৰ বোজা ৷  পৰিসংখ্যা অনুযায়ী বৰ্তমান ভাৰতৰ মূৰৰ ওপৰত থকা ঋণৰ পৰিমান হ’ল ১৯৭ লাখ কৌটিৰো বেছি টকা ৷ বুধবাৰে সদনত এক প্ৰশ্নৰ উত্তৰত চৰকাৰে এই  তথ্য সদৰী কৰে ৷ লগতে এইবুলিও সোধা হৈছিল যে ঋণৰ বোজা কিদৰে কম কৰা হ’ব ? চৰকাৰৰ উত্তৰ – ৰাষ্ট্ৰীয়কৃত সংস্থা আৰু চৰকাৰী ভূমি বিক্ৰী কৰি ঋণৰ বোজা কমোৱা হ’ব ৷লগতে কৰ আদায়ৰ পৰিমান বৃদ্ধি কৰা হ’ব ৷

মনমোহন সিঙৰ চৰকাৰৰ  শেষৰপিনে অৰ্থাৎ ২০১৪-১৫ বৰ্ষত ভাৰতৰ মুঠ ঋণৰ পৰিমান আছিল ৫৮ লাখ ৬৭ হাজাৰ ৮৯২ কৌটি টকা ৷  কিন্তু তাৰ পাছৰে পৰা ঋণৰ পৰিমান ক্ৰমাৎ বৃদ্ধি পাবলৈ ধৰে ৷  তৃণমূল কংগ্ৰেছৰ সাংসদৰ প্ৰশ্নৰ উত্তৰত চৰকাৰে দাখিল কৰা তথ্য অনুসৰি ২০২০-২১ বৰ্ষৰ মাৰ্চ মাহত ভাৰতৰ মুঠ ঋণৰ পৰিমান হ’ল ১৯৭ লাখ ৪৫ হাজাৰ ৬৭০ কৌটি টকা ৷ মাত্ৰ এটা বছৰত ঋণৰ বোজাৰ হাৰ ৫ ৰ পৰা ১২.৬ শতাংশ পৰ্যন্ত বৃদ্ধি পাইছে ৷ ২০১৬-১৭ বৰ্ষত কেন্দ্ৰৰ ধাৰৰ পৰিমান আছিল ৭০ লাখ ৭ হাজাৰ ২৫৯ কৌটি টকা ৷ তাৰ পাছৰ বছৰ ধাৰৰ পৰিমান হ’লগৈ ৭৪ লাখ ৫৩ হাজাৰ ৩৫ কৌটি টকা ৷ তাৰ পাছত এতিয়া এই ঋণৰ পৰিমান বৃদ্ধি হৈছে ১৯৭ লাখ কৌটি টকালৈ ৷