তালিবানৰ ক্ষমতা দখলে আফগানিস্তানৰ ভৱিষ্যত আকৌ এবাৰ অনি্শ্চয়তাৰ মাজলৈ ঠেলি দিছে ৷ আফগানিস্তানে এতিয়াৰ পৰা লাভ নকৰিব আমেৰিকাৰ অৰ্থসাহায্য ৷দেশখনৰ নিজা ৰাজহৰ পৰিমানো অত্যন্ত কম ৷যাৰ বাবে আফগানিস্তানৰ ১ কৌটি ৪০ লাখ মানুহ অনাহাৰৰ সন্মুখীন হ’ব লাগিব বুলি আশংকা ব্যক্ত কৰিছে ৰাষ্ট্ৰসংঘই ৷ কিন্তু আফগানিস্তানৰ মাটিৰ তলত লুকাই থকা ‘গুপ্তধন’য়ে এটা দশকৰ ভিতৰত সলাই দিব পাৰে দেশখনৰ ভৱিষ্যত ৷ কি এই ‘গুপ্তধন’ ?
সুদীৰ্ঘ দিন আমেৰিকান সেনাৰ বিৰুদ্ধে যুদ্ধ অব্যাহত ৰাখিলেও তালিবানে জনা নাছিল যে সেই দেশৰ মাটিৰ তলত লুকাই আছে বিপুল পৰিমানৰ গুপ্তধন ৷কিন্তু আফগানিস্তানৰ ভূমিত ২০ বছৰ ধৰি ঘাটি পাতি থকা আমেৰিকাৰ সেনা আৰু ভূতত্ববিদসকলে ঠিকেই লাভ কৰিছিল গুপ্তধনৰ সন্ধান ৷যি গুপ্তধনৰ মূল্য হ’ব ১ লাখ কৌটি ডলাৰৰো অধিক ৷ পেট্ৰ’লক যিদৰে কোৱা হয় পণীয়া সোণ বুলি , সেইদৰে আফগানিস্তানৰ মাটিৰ তলত লুকাই থকা গুপ্তধন বিধ হৈছে লিথিয়াম ৷লিথিয়াম এবিধ খনিজ মৌল ৷ এই খনিজ পদাৰ্থবিধ বহুল পৰিমাণে ব্যৱহাৰ হয় প্ৰদূষণহীন গাড়ীৰ বেটেৰী , মোবাইল ফোনৰ বেটেৰী আদিৰ নিৰ্মানত ৷ আধুনিক বিশ্বৰ বাবে আটাইতকৈ কাংক্ষিত খনিজ মৌলবিধেই হৈছে লিথিয়াম ৷ কিন্তু এই দুৰ্লভ মৌলবিধ নিষ্কাষণৰ পদ্ধতি অত্যন্ত জটিল আৰু খৰচী ৷
- Donation -
বিশেষজ্ঞসকলে কৈছে যে দৰিদ্ৰতাৰ অন্ধকাৰত নিমজ্জিত আফগানবাসীৰ ভাগ্য সম্পূৰ্ণৰূপে সলাই দিব পাৰে দেশখনৰ মাটিৰ তলত লুকাই থকা গুপ্তধনসদৃশ লিথিয়ামে ৷কেৱল লিথিয়ামেই নহয় , ৰাশি ৰাশি তাম , সোণ , আকৰিক লো আদি বিভিন্ন খনিজ পদাৰ্থৰে ঠাহ খাই আছে আফগানিস্তানৰ ভূমিৰ তলৰভাগ ৷যদিহে সঠিক বৈজ্ঞানিক পদ্ধতিৰে এই খনিজ মৌল তালিবান চৰকাৰে নিষ্কাষণ কৰিব পাৰে তেনেহ’লে ই দেশখনৰ অৰ্থনীতিক দিব পাৰে নতুন মোৰ ৷
