পৰাজয়ৰ শংকাত মোদীয়ে বাতিল কৰিলে নেকি উত্তৰ প্ৰদেশৰ জনসভা ?

উত্তৰ প্ৰদেশৰ বিধানসভা নিৰ্বাচনৰ প্ৰথম পৰ্যায়ৰ ভোটগ্ৰহণলৈ মাজত মাত্ৰ তিনিদিন বাকী ৷ বিজেপি আৰু সমাজবাদী পাৰ্টীৰ জোটবন্ধনৰ মাজত চলিছে তীব্ৰ প্ৰতিদ্বন্দিতা ৷ ১০ ফেব্ৰুৱাৰীত প্ৰথম পৰ্যায়ৰ ভোটগ্ৰহণ অনুষ্ঠিত হ’ব ৷ তাৰ পূৰ্বে প্ৰচাৰ অভিযানো তুংগত উঠিছে ৷ আজি উত্তৰ প্ৰদেশৰ বিজনোৰত প্ৰধানমন্ত্ৰী নৰেন্দ্ৰ মোদীয়ে সম্বোধন কৰাৰ কথা আছিল এখন নিৰ্বাচনী সভা ৷ কিন্তু হঠাৎ এই সভা বাতিল কৰা হয় ৷ কোৱা হৈছে যে বেয়া বতৰৰ বাবেই নিৰ্বাচনী সভাখন বাতিল কৰা হ’ল ৷ কিন্তু সভা বাতিলৰ এইটোৱে একমাত্ৰ কাৰণ নহয় বুলি এতিয়া সৰ্বত্ৰে চৰ্চা চলিছে ৷ দেশৰ প্ৰতিটো নিৰ্বাচনক বিজেপি আৰু প্ৰধানমন্ত্ৰী নৰেন্দ্ৰ মোদীয়ে কিমান গুৰুত্বসহকাৰে লয় , সেয়া নতুনকৈ বাখ্যা কৰাৰ নিশ্চয় প্ৰয়োজন নাই ৷ সৰু বৰ প্ৰতিখন ৰাজ্যৰ নিৰ্বাচনেই বিজেপি দল আৰু প্ৰধানমন্ত্ৰী নৰেন্দ্ৰ মোদীৰ বাবেই সমানেই গুৰুত্বপূৰ্ণ ৷ তাতে যদি উত্তৰ প্ৰদেশৰ দৰে দেশৰ বৃহত্তম ৰাজ্যৰ নিৰ্বাচন হয় , তেনেহ’লে তাক লৈ প্ৰধানমন্ত্ৰী মোদী কিমান চিৰিয়াছ হ’ব পাৰে , সেয়া সহজেই অনুমেয় ৷ সেইবাবেই নিৰ্বাচনৰ দিন ঘোষণাৰ আগতেই উত্তৰ প্ৰদেশত প্ৰায় এক ডজন জনসভা সম্বোধন কৰে প্ৰধানমন্ত্ৰী গৰাকীয়ে ৷ নিৰ্বাচনী অধিসূচনা প্ৰকাশৰ পাছতো তেও ভাৰ্ছুয়েল মাধ্যমযোগে সভা সম্বোধন কৰি আছে ৷ কিন্তু আজি উত্তৰ প্ৰদেশৰ বিজনোৰত অনুষ্ঠিত হ’বলগীয়া জনসভাখন তেও বেয়া বতৰৰ অজুহাত দেখুৱাই বাতিল কৰিলে ৷ইয়াৰ বাবে প্ৰধানমন্ত্ৰীগৰাকীয়ে উত্তৰ প্ৰদেশৰ জনতাৰ ওচৰত ক্ষমা বিচাৰে আৰু ভাৰ্ছুয়েল মাধ্যমযোগেই সভাখন সম্বোধন কৰে ৷ কিন্তু বিজনোৰৰ বতৰ আজি সঁচাকৈয়ে বেয়া আছিলনে ? নে অন্য কোনো কাৰণত বাতিল কৰা হ’ল প্ৰধানমন্ত্ৰীৰ জনসভা ? ইয়াকে লৈ বিৰোধী দলসমূহে আৰম্ভ কৰিছে প্ৰত্যাক্ৰমণৰ ৰাজনীতি ৷ ৰাষ্ট্ৰীয় লোক দলৰ মুৰব্বী জয়ন্ত চৌধুৰীয়ে দুখন ফটোপ শ্বেয়াৰ কৰি বিজেপিক তীব্ৰ কটাক্ষ কৰে ৷ প্ৰথমখন ফটো আছিল প্ৰধানমন্ত্ৰীৰ জনসভা বাতিল সন্দৰ্ভত প্ৰকাশিত বাতৰি ৷ য’ত কোৱা হৈছে যে বেয়া বতৰৰ বাবে প্ৰধানমন্ত্ৰীয়ে সভা বাতিল কৰিছে ৷ দ্বিতীয়খন ফটো হ’ল গুগ’লৰ ৱেডাৰ আপডেটৰ ৷ যাৰ জড়িয়তে কোৱা হৈছে যে বিজনোৰৰ বতৰ আজি ফৰকাল ৷ এই ফটোদুখন শ্বেয়াৰ কৰি জয়ন্ত চৌধুৰীয়ে লিখিছে যে বিজনোৰত আজি ৰ’দ বিয়পি আছে কিন্তু বিজেপিৰ বতৰ বেয়া ৷ একেসময়তে সুহলদেৱ ভাৰতীয় সমাজ পাৰ্টীৰ মুখপাত্ৰ পীয়ূষ মিশ্ৰই কৈছে যে ৰাষ্ট্ৰীয় লো দলৰ প্ৰচণ্ড প্ৰভাৱ দেখি বিজেপিৰ বতৰ বেয়া হৈ পৰিল ৷ আনহাতে , সাংবাদিক সঞ্জয় শৰ্মাই টুইটাৰত উল্লেখ কৰে যে তেও দুদিন আগতে ভৱিষ্যতবাণী কৰিছিল যে মোদীয়ে উত্তৰ প্ৰদেশৰ ঐতিহাসিক পৰাজয়ৰ দায়িত্ব মূৰ পাতি ল’ব নিবিচাৰে ৷ আজি তেও বিজনোৰলৈ অহাৰ কথা আছিল , কিন্তু কালি যি ৰিপোৰ্ট আহিল , তাৰ পৰা স্পষ্ট হৈ পৰিল যে পশ্চিম উত্তৰ প্ৰদেশত হোৱাইট ৱাছ হ’বলৈ গৈ আছে ৷ যাৰ বাবে মোদী নাহিল ৷ ইয়াৰ বাহিৰেও টুইটাৰত অসংখ্য লোকে লিখিছে যে পৰাজয়ৰ শংকাৰ বাবেই মোদীয়ে উত্তৰ প্ৰদেশৰ জনসভা বাতিল কৰিলে ৷ সঁচাকৈয়ে পশ্চিম উত্তৰ প্ৰদেশত বিজেপি এইবাৰ কঠিন প্ৰত্যাহ্বানৰ সন্মুখীন হৈছে নে নাই , সেয়া ভোটগ্ৰহণৰ দিনটোতে স্পষ্ট হৈ পৰিব বুলি পৰ্যবেক্ষকসকলে মন্তব্য কৰিছে ৷