কাবুলৰ পৰা ভাৰতীয় নাগৰিকসকলক জৰুৰীভাবে ওভতাই আনিবলৈ এয়াৰ ইণ্ডিয়াক দুখন বিমান সাজু কৰি ৰাখিবলৈ নিৰ্দেশ দিছে কেন্দ্ৰীয় চৰকাৰে ৷ ইয়াৰ পাছতে তৎপৰ হৈ উঠিছে এয়াৰ ইণ্ডিয়া কৰ্তৃপক্ষ ৷
দেওবাৰে তালিবানে কাবুল দখল কৰাৰ পাছতেই এয়াৰ ইণ্ডিয়াৰ শেষৰখন বিমানে কাবুল এৰিছিল ৷ শেষ বিমানখনত ১২৯ গৰাকী যাত্ৰী আছিল ৷নিশা এই বিমানখনে দিল্লীত অৱতৰণ কৰে ৷
আফাগানিস্তানৰ ক্ষমতা তালিবানৰ হাতলৈ যোৱাটো নিশ্চিত হোৱাৰ পাছতেই জাৰ্মানি , ফ্ৰান্স , ব্ৰিটেইন, কানাডা , অষ্ট্ৰেলিয়াসহ বহু দেশে নিজৰ নাগৰিকসকলক ওভতাই নিয়াৰ পদক্ষেপ লৈছে ৷ ইতিমধ্যে আমেৰকাই তেওলোকৰ সকলো নাগৰিককে নিজ দেশলৈ ওভতাই নিছে ৷ অনুৰুপ পদক্ষেপ গ্ৰহণ কৰি ভাৰতেও নিজৰ নাগৰিকসকলক ওভতাই অনাৰ বাবে যাবতীয় পদক্ষেপ লৈছে ৷
