বাংলাদেশৰ শেহতীয়া পৰিস্থিতি ভাৰতৰ বাবে বিশেষকৈ অসমৰ বাবে অতি চিন্তনীয় বিষয় হৈ পৰিছে৷ এটাৰ পাছত আন এটা বেয়া খবৰ আহিছে বাংলাদেশৰ পৰা৷ এহাতে বাংলাদেশ মৌলবাদীৰ গ্ৰাসত সোমাই পৰিবলৈ লৈছে, আনহাতে বাংলাদেশৰ লগত আৰম্ভ হৈছে পাকিস্তানৰ পোনপটীয়া বৈদেশিক সম্পৰ্ক৷ বাংলাদেশত গ্ৰেপ্তাৰ হোৱা ইস্কনৰ সন্ত চিন্ময়কৃষ্ণ দাসে মঙলবাৰেও লাভ নকৰিলে জামিন৷ আনকি হিন্দু সন্যাসীগৰাকীৰ হৈ আদালতত কোনো এজন অধিবক্তাই যুক্তি প্ৰদৰ্শন কৰিবলৈ আগবাঢ়ি নাহিল৷ ইয়াৰ পৰাই ওলাই পৰিছে কিদৰে কট্টৰ মৌলবাদীয়ে বাংলাদেশৰ প্ৰশাসন যন্ত্ৰক গ্ৰাস কৰি আনিছে৷ এগৰাকী স্থানীয় বি এন পি নেতাৰ অভিযোগৰ ভিত্তিত বিগত ২৫ নৱেম্বৰত গ্ৰেপ্তাৰ হৈছিল সনাতনী জাগৰণ মঞ্চৰ নেতা চিন্ময়কৃষ্ণ দাস৷ বাংলাদেশৰ একাধিক ধৰ্মীয় সংখ্যালঘু সংগঠন মিলি গঠন কৰা হৈছিল এই মঞ্চ৷ কিন্তু বাংলাদেশৰ জাতীয় পতাকাৰ ওপৰত ধৰ্মীয় পতাকা উত্তোলনৰ অভিযোগত ৰাষ্ট্ৰদ্ৰোহী হিচাপে অভিহিত কৰি চিন্ময়কৃষ্ণ দাসক কাৰাগাৰলৈ নিক্ষেপ কৰা হয়৷ তাৰ পাছৰে পৰাই বাংলাদেশত অব্যাহত আছে সংখ্যালঘুৰ প্ৰতিবাদ৷ ভাৰতো বাংলাদেশৰ সংখ্যালঘুৰ নিৰাপত্তাক লৈ উদ্বিগ্ন৷ ভাৰতৰ বাবে শংকাৰ কাৰণ ইয়াতেই শেষ হোৱা নাই৷ বিগত ১৩ নৱেম্বৰত পাকিস্তানৰ এখন কাৰ্গো জাহাজ পোনপটীয়াকৈ চট্টগ্ৰাম (পূৰ্বৰ চিটাগং) বন্দৰত প্ৰৱেশ কৰিছে৷ বাংলাদেশ স্বাধীন হোৱাৰ পাছত প্ৰথমবাৰৰ বাবে এইদৰে পাকিস্তানী জাহাজ পোনপটীয়াকৈ বাংলাদেশত প্ৰৱেশ কৰিছে৷ ইয়াৰ আগলৈকে পাকিস্তানৰ পৰা সামগ্ৰী পৰিবহণ কৰা কোনো জাহাজ বাংলাদেশলৈ পোনপটীয়াকৈ যোৱাৰ উদাহৰণ নাই৷ বাংলাদেশ–পাকিস্তানৰ মাজত ব্যৱসায় সম্পন্ন হৈছিল মালয়েছিয়া নাইবা শ্ৰীলংকাৰ মাধ্যমেৰে৷ ১৯৭১ৰ যুদ্ধৰ সময়ত পাকিস্তানে বাংলাদেশৰ ওপৰত যি বৰ্বৰ আচৰণ দেখুৱাইছিল, সেয়া বাংলাদেশে সুদীৰ্ঘ ৫ টা দশক পাহৰিব পৰা নাছিল৷ কিন্তু শ্বেখ হাছিনাৰ পলায়নৰ পাছত বাংলাদেশ- পাকিস্তান পোনপটীয়া ব্যৱসায়িক বন্ধু হৈ পৰিল৷ পাকিস্তানৰ মতে এয়া ‘দ্বিপাক্ষিক ব্যৱসায়ৰ এটা গুৰুত্বপূৰ্ণ পদক্ষেপ৷’ কিন্তু ভাৰতৰ বাবে পাকিস্তান–বাংলাদেশৰ এই পোনপটীয়া ব্যৱসায় মুঠেও ভাল খবৰ নহয়৷ যি চিটাগং বন্দৰত পাকিস্তানী জাহাজ পোনপটীয়াকৈ প্ৰৱেশ কৰিছে, সেই চিটাগঙতেই ২০০৪ চনত উদ্ধাৰ হৈছিল এক বৃহৎ অস্ত্ৰ ভাণ্ডাৰ৷ যি অস্ত্ৰ প্ৰেৰণ কৰিবলৈ লোৱা হৈছিল উত্তৰ পূৱৰ সীমাৰে ভাৰতলৈ৷ দক্ষিণ পূৱ এছিয়াৰ চোৰাং অস্ত্ৰ ব্যৱসায়ৰ সৰ্ববৃহৎ ঘটনা আছিল সেয়া৷ অস্ত্ৰ সৰবৰাহত জৰিত আছিল আলফা৷ কোৱা হয়, আই এছ আইৰ সহযোগতে ভাৰতলৈ প্ৰেৰণ কৰিবলৈ লোৱা হৈছিল ৪.৫ মিলিয়ন ডলাৰৰ পৰা ৭ মিলিয়ন ডলাৰৰ সেই অস্ত্ৰ ভাণ্ডাৰ৷ এই ঘটনাই ভাৰতক শংকিত কৰি তুলিছিল৷ কিন্তু তাৰ পাছৰ বছৰতেই বাংলাদেশৰ মংগলা বন্দৰ পৰিচালনাৰ দায়িত্ব ভাৰতে নিজৰ হাতলৈ আনিবলৈ সক্ষম হৈছিল৷ যিটো ভাৰতৰ বাবে আছিল এটা ডাঙৰ কূটনৈতিক সফলতা৷ কিন্তু চিটাগঙত পাকিস্তানী জাহাজৰ প্ৰৱেশ ভাৰতৰ বাবে এক বৃহৎ কূটনৈতিক বিফলতা৷ কাৰণ, এই বন্দৰ এই বন্দৰ ম্যানমাৰৰ নিচেই কাষতে অৱস্থিত৷ চিটাগঙৰ পৰা মিজোৰামৰ দূৰত্ব হ’ল মাত্ৰ ৭৫ কিলোমিটাৰ৷ আগৰতলাৰ পৰা ২২৫ কিলোমিটাৰ৷ চিটাগং বন্দৰ কেনেদৰে আলফা আৰু এন এছ চি এনে ব্যৱহাৰ কৰিছিল, সেয়া ২০০৪ চনতেই স্পষ্ট হৈ পৰিছিল৷ এইবাৰ আকৌ পাকিস্তানী জাহাজৰ চিটাগঙত নিৰ্বিবাদ প্ৰৱেশ ভাৰত, বিশেষকৈ অসম আৰু উত্তৰ পূৰ্বাঞ্চলৰ বাবে গভীৰ চিন্তাৰ বিষয় হৈ পৰিছে৷ বাংলাদেশত ইছলামিক মৌলবাদীৰ তৎপৰতা আৰু পাকিস্তানৰ গতিবিধি ভাৰতৰ বাবে চিন্তাৰ কাৰণেই নহয়, এক কূটনৈতিক বিফলতা হিচাপেও বিবেচিত হৈছে ৷এহাতে যদি অনুপ্ৰৱেশৰ আশংকা, আনহাতে অসমত বিদেশী শক্তিৰ তৎপৰতাৰো সম্ভাৱনা৷ ক’ব পাৰি আকৌ এবাৰ অসমলৈ এক অশান্ত সময়ৰ আগজাননী কঢ়িয়াই আনিছে বাংলাদেশৰ শেহতীয়া অস্থিৰ পৰিস্থিতিয়ে৷
