হিন্দুয়ে ধর্ষণ নকৰে!

অনুশোচনা নাই,ফটকাৰ দোকান দিছে ধৰ্ষণকাৰীয়ে
‘হিন্দুৱে ধৰ্ষণ নকৰে’-মন্তব্য ৰাধেশ্যামৰ
তিলমানো অনুশোচনা নাই বিলকিছৰ ধৰ্ষণকাৰীৰ
ভয়-ভাবুকিৰে ভীতিগ্ৰস্ত কৰিছে সাক্ষীক!

বিলকিছ বানুৰ গাঁৱৰ ৰাস্তাটোৰ মূৰতে দেৱালীৰ বাবে এখন ফটকাৰ দোকান বহিছে৷ দোকানৰ মালিক ৰাধেশ্যাম শ্বাহ৷ এই ৰাধেশ্যাম আন কোনো নহয়,বিলকিছৰ ধৰ্ষণকাৰী৷ বিগত ১৫ আগষ্টত তেওঁ কাৰাগাৰৰ পৰা মুক্তি লাভ কৰিছে৷

“ আমি নিৰপৰাধী৷আপোনালোকে কেতিয়াবা খুড়াক আৰু ভতিজাকে একেলগে এগৰাকী মহিলাক ধৰ্ষণ কৰাৰ কথা শুনিছেনে?এনেকুৱা ঘটনা বাৰু হিন্দু ধৰ্মাৱলম্বী লোকৰ মাজত হোৱাটো সম্ভৱ নে?কোনো হিন্দুৱে এনে কাম কৰিব নোৱাৰে”- এনেদৰে এনডি টিভিৰ সাংবাদিকৰ লগত হোৱা সাক্ষাৎকাৰত কয় ৰাধেশ্যামে৷ উল্লেখযোগ্য যে ‘ভাল ব্যৱহাৰ’ৰ বাবে কাৰাগাৰৰ পৰা মুক্তি লাভ কৰা গোবিন্দ নাইককে ধৰি কেইবাগৰাকীও ধৰ্ষণকাৰীয়ে গাঁৱৰ ঘটনাৰ সাক্ষী সকলক কাৰাগাৰৰ পৰা ওলাই অহাৰ পিছত ভাবুকি দি আহিছে৷
গোবিন্দ নায়ে ২০১৭ চনত বিলকিছ বানুৰ গোচৰৰ সাক্ষী প্ৰদান কৰা দুজন ব্যক্তিক সঘনাই ভাবুকি প্ৰদান কৰি আহিছে৷ এনডি টিভিৰ ফালৰ পৰা তেওঁক এই বিষয়ে প্ৰশ্ন কৰাত তেওঁ কয় “মোৰ গাঁৱৰ পৰা বাহিৰ হোৱা ৷”

বিলকিছ বানু ২০০২চনৰ পৰা গাঁৱলৈ যোৱা নাই৷ তেওঁলোকৰ ঘৰটো হিন্দু পৰিয়াল এটাক দোকানৰ বাবে ভাড়া দিয়া আছে৷ বিলকিছৰ ঘৰৰ সন্মুখতে এটা বৃহৎ অট্টালিকা আছে, যিটোৰ গৰাকী ৰাধেশ্যাম শ্বাহ৷ৰাধেশ্যামৰ অট্টালিকাৰ তলতে এখন ফটকাৰ দোকান দিছে তেওঁৰ ভায়েক আশীষ শ্বাহে৷আশীষ শ্বাহে মাথো ক’লে “ৰাধেশ্যাম ইয়াত
আজিকালি নাথাকে৷”

২০০২ চনৰ ৩ মাৰ্চত দলবদ্ধ ধৰ্ষণৰ সন্মুখীন হৈছিল বিলকিছ বানু৷সেই সময়ত বিলকিছৰ বয়স আছিল ২১বছৰ আৰু তেওঁ তেতিয়া আছিল ৫ মাহৰ অন্তঃসত্ত্বা৷তেওঁৰ ৩ বছৰীয়া কন্যাকো হত্যা কৰিছিল সেই নৰপিশাচ কেইটাই৷ গোধৰাত এখন কৰসেৱক ভৰ্তি ৰে’ল জ্বলাই দিয়া হৈছিল আৰু সেই ঘটনাত ৫৯ জন যাত্ৰীৰ
মৃত্যু হৈছিল৷সেই সময়ত প্ৰধানমন্ত্ৰী মোডী আছিল গুজৰাটৰ মুখ্যমন্ত্ৰী৷সেই তেতিয়াৰ পৰাই গুজৰাটত বিজেপিয়ে ক্ষমতা হেৰুৱাবলগীয়া হোৱা নাই৷ চলিত বৰ্ষৰ শেষৰ ফালে ৰাজ্যখনত বিধানসভা নিৰ্বাচন অনুষ্ঠিত হ’ব৷
ধৰ্ষণকাৰীৰ মুক্তিৰ পিছত বিলকিছ বানুৱে প্ৰতিক্ৰিয়া প্ৰকাশ কৰে এনেদৰে “ মোৰ দুখ আৰু হেৰাই যোৱা বিশ্বাসবোৰ কেৱল মোৰ নহয়,এয়া প্ৰতি গৰাকী মহিলাৰ বাবে যিসকলে ন্যায়ৰ বাবে যুঁজ দি আছে৷ইমান বৃহৎ এটা সিন্ধান্ত লোৱাৰ আগত কোনেও মোৰ নিৰাপত্তাৰ বিষয়টো চিন্তা নকৰিলে৷মই গুজৰাট চৰকাৰক মোৰ ন্যায়ৰ কথা পুনৰ বিবেচনা কৰিবলৈ আহ্বান জনাইছোঁ৷”