Investigative reporting with dedication.
এখন দেশ ৷ স্বাধীনতাৰ পাছত ৭ টা দশক অতিক্ৰম কৰা এখন দেশ ৷ বিশ্বৰ বৃহত্তম গণতন্ত্ৰৰ পৰিচয় দিয়া এখন দেশ ৷ সেই দেশখনত ভুলতে গুলীয়াই দিয়া হয় ১৫ জনকৈ নিৰীহ নাগৰিকক ৷ তাৰ পাছত কোৱা হয় যে এয়া ভুলতে হৈ গ’ল ৷ এই দেশত পুলিচ – আৰ্মিৰ হাতত মৃত্যু এতিয়া ইমানেই সহজ হৈ পৰিছে ৷ কেৱল ভুলতে বুলি কৈয়ে এটা নাৰকীয় নৰসংহাৰক পাহৰাবলৈ চেষ্টা কৰা হয় ৷ এই জঘন্য হত্যাকাণ্ডৰ আধাৰেই হ’ল এখন ক’লা আইন ৷
ঘটনা ১৭ বছৰ আগৰ ৷ দিনটো আছিল ২০০৪ চনৰ ১৫ জুলাই ৷ ইম্ফলৰ আছাম ৰাইফলছৰ হেডকোৱাৰ্টাৰৰ সন্মুখত উলংগ হৈ থিয় হৈছিল ১২ গৰাকী মণিপুৰী মহিলাই ৷ হাতত আছিল এখন বেনাৰ ৷ য’ত ৰঙা আখৰেৰে লিখা আছিল –‘ইণ্ডিয়ান আৰ্মি ৰেপ আছ’ ৷ এই ঘটনাই সমগ্ৰ বিশ্বৰ সন্মুখত উলংগ কৰি দিছিল ভাৰতীয় গণতন্ত্ৰক ৷ মণিপুৰৰ মহিলা সমাজৰ এই নগ্ন প্ৰতিবাদ আছিল এখন আইনৰ বিৰুদ্ধে ৷ আইনখন হ’ল Armed Forces Special Powers Act (AFSPA), 1958 ৷
মণিপুৰত এই আইনখন জাপি দিয়া হৈছিল ১৯৮০ চনত ৷ এই আইনৰ জড়িয়তে উগ্ৰবাদ দমনৰ নামত সেনা বাহিনীক দিয়া হয় কিছু অতিৰিক্ত ক্ষমতা ৷ ইয়াৰ অজুহাত লৈয়ে সেনা বাহিনী নামি পৰিছিল নিৰ্বিচাৰ অত্যাচাৰত ৷ সাধাৰণ জনতাক উগ্ৰপন্থী সজাই নিৰ্যাতন চলোৱাই নহয় , সাধাৰণ মহিলাৰ সতীত্বৰ ওপৰতো হাত দিছিল সেনা জোৱানে ৷ বি এছ এফৰ বিষয়াই ধৰ্ষন কৰাৰ পাছত ৰোজ নামৰ এগৰাকী মহিলাই বছি লৈছিল আত্মহত্যাৰ পথ ৷ সাধাৰন জনতাৰ জীৱন হৈ পৰে দুৰ্বিষহ ৷ সেনাৰ সকলো অত্যাচাৰৰ আধাৰ আছিল এই ক’লা আইনে দিয়া অবাধ ক্ষমতা ৷ ইয়াৰ পৰিণতিত মণিপুৰী মহিলাই ৰাজপথত নগ্ন হৈ ক’বলগীয়া হয় –ইণ্ডিয়ান আৰ্মি ৰেপ আছ ৷ মণিপুৰৰে ইৰম শৰ্মিলাই আৰম্ভ কৰে অনশণ ৷ ২০১৬ চনলৈকে ইৰম শৰ্মিলাই সেনা বাহিনীৰ বিশেষ ক্ষমতা আইন প্ৰত্যাহাৰৰ দাবীত অনশণ অব্যাহত ৰাখে ৷ মণিপুৰৰ মহিলাৰ সেই ইতিহাস সৃষ্টিকাৰী প্ৰতিবাদৰ পাছত ১৭ বছৰ পাৰ হৈ গ’ল ৷ এসময়ত ইৰম শৰ্মিলায়ো প্ৰতিবাদ সামৰিলে ৷ কিন্তু কেন্দ্ৰৰ দৃষ্টিভংগীৰ কোনো পৰিৱৰ্তন নহ’ল ৷ মণিপুৰকে ধৰি উত্তৰ পূৰ্বাঞ্চলত আজিও বাহাল থাকিল সশস্ত্ৰ বাহিনী বিশেষ ক্ষমতা আইন ৷ সময়ে সময়ে এই ৰাজ্যকেইখনক অশান্ত অঞ্চল ঘোষণা কৰি বঢ়াই থকা হ’ল ক’লা আইনৰ ম্যাদ ৷
সশস্ত্ৰ বাহিনী বিশেষ ক্ষমতা আইনৰ ধাৰণা বৃটিছ প্ৰশাসনৰ পৰা লোৱা ৷ ১৯৪২ চনত স্বাধীনতাৰ দাবীত সমগ্ৰ দেশত সৃষ্টি হোৱা গণজাগৰণক মষিমূৰ কৰিবলৈ বৃটিছ চৰকাৰে জাৰি কৰিছিল আৰ্মড ফোৰ্চ স্পেচিয়েল পাৱাৰ অৰ্ডিনেন্স ৷ ভাৰত ত্যাগ আন্দোলন দমনৰ বাবে জাৰি কৰা এই অধিসূচনাৰ আৰ্হিতে স্বাধীন ভাৰতৰ চৰকাৰেও অনুৰূপ চাৰিখন অধিসূচনা জাৰি কৰে ৷
আভ্যন্তৰীণ সুৰক্ষাৰ নামত বেংগল ডিষ্টাৰ্ব এৰিয়া , আছাম ডিষ্টাৰ্ব এৰিয়া , ইষ্ট বেংগল ডিষ্টাৰ্ব এৰিয়া আৰু ইউনাইটেড প্ৰভিন্সেস ডিষ্টাৰ্ব এৰিয়া অৰ্ডিনেন্স স্বাধীন ভাৰতত জাৰি কৰা হয় ৷ ইয়াৰ পাছত ১৯৫৮ চনত ৰাষ্ট্ৰপৰি ৰাজেন্দ্ৰ প্ৰসাদে স্বাক্ষৰ কৰে সশস্ত্ৰ বাহিনী বিশেষ ক্ষমতা অধিসূচনাত ৷
সেই সময়ত নাগালেণ্ডত সূচনা হৈছিল এক সুকীয়া পৰিৱেশৰ ৷ নাগা নেচনেল কাউন্সিলে ১৯৫২ চনত সাধাৰণ নিৰ্বাচন বৰ্জন কৰাৰ পাছত চৰকাৰী স্কুল – কলেজ , কাৰ্যালয়ো বৰ্জনৰ আহ্বান জনায় ৷এই পৰিস্থিতিৰ মোকাবিলা কৰিবলৈ অসম চৰকাৰে নগা পাহাৰত প্ৰথমতে আছাম মেইনটেনেন্স অৱ পাব্লিক অৰ্ডাৰ এক্ট বলবৎ কৰে ৷ পৰিস্থিতিৰ অধিক অৱনতি ঘটাত ১৯৫৫ চনত প্ৰথমবাৰৰ বাবে নাগালেণ্ডত আছাম ৰাইফল মোতায়ন কৰি বলবৎ কৰা হয় আছাম ডিষ্টাৰ্বড এৰিয়া এক্ট , ১৯৫৫ ৷ তাৰ পাছত ১৯৫৮ চনত প্ৰথমতে অধিসূচনা আৰু পাছত সশস্ত্ৰ বাহিনী বিশেষ ক্ষমতা আইন গৃহীত কৰি এই অঞ্চলত সেনাক দিয়া হয় বিশেষ ক্ষমতা ৷ সেই দিন ধৰি সেনা বাহিনীয়ে উগ্ৰপন্থী দমনৰ নামত যিমান এই ক্ষমতাৰ ব্যৱহাৰ কৰিছে , তাতোকৈ অধিক অপব্যৱহাৰ কৰিছে নিৰীহ জনতাক নিৰ্যাতন চলোৱাৰ নামত ৷ সেয়ে এই ক’লা আইন প্ৰত্যাহাৰৰ বাবে উত্তৰ পূৰ্বাঞ্চলত দীৰ্ঘদিন ধৰি দাবী কৰি আহিছে ৷ উত্তৰ পূৰ্বাঞ্চলৰ এই দাবীৰ প্ৰতি সহাৰি নিদিয়াৰ আন এক নিৰ্মম পৰিণতি দেখা গ’ল শণিবাৰে নাগালেণ্ডৰ মন জিলাত ৷ সেনা বাহিনীয়ে গুলীয়াই হত্যা কৰিলে ১৫ জন নিৰীহ লোকক ৷ তাৰ পাছত কৈফিয়ৎ দিলে যে এয়া ভুলতে হৈ গ’ল ৷ কিন্তু এয়া মুঠেও ভুলতে হোৱা ঘটনা নহয় ৷ এই অঞ্চলত দীৰ্ঘদিন ধৰি বলবৎ হৈ থকা এখন ক’লা আইনৰ অৱধাৰিত পৰিণতি নাগালেণ্ডৰ নৰহত্যাৰ ঘটনা ৷ সেইবাবেই নাগালেণ্ডৰ মুখ্যমন্ত্ৰী নেফিও ৰিও , মেঘালয়ৰ মুখ্যমন্ত্ৰী কনৰাড চাংমাই একে মুখে সশস্ত্ৰ বাহিনী বিশেষ ক্ষমতা আইন বাতিলৰ দাবী জনাইছে ৷ তেওলোকো এন ডি এৰেই অংশীদাৰ ৷ স্বাধীন ভাৰতৰ আটাইতকৈ জঘন্যতম ঘটনাটোৰ পাছত যদি এই ক’লা আইন প্ৰত্যাহাৰ কৰাটোৱে হ’ব লাগে উত্তৰ পূৰ্বাঞ্চলৰ সন্মিলিত দাবী৷ ভৱিষ্যতে যাতে আৰু কোনো ভুল নহয় , তাৰ বাবেই এই আইন প্ৰত্যাহাৰ কৰাটো সময়ৰ দাবী ৷
