অৱশেষত বাতিল হ’ল তিনি ক’লা কৃষি আইন ৷ প্ৰধানমন্ত্ৰী মোদীয়ে শুকুৰবাৰে দেশবাসীৰ ওচৰত ক্ষমা প্ৰাৰ্থনা বিচাৰি তিনিওখন আইন প্ৰত্যাহাৰৰ কথা ঘোষণা কৰে ৷ কিন্তু কেন্দ্ৰীয় চৰকাৰক এই সিদ্ধান্ত ল’বলৈ বাধ্য কৰোৱাৰ আঁৰত আছে হাজাৰ হাজাৰ কৃষকৰ অক্লান্ত সংগ্ৰাম আৰু ৭৫০ গৰাকী কৃষকৰ আত্মবলিদান ৷ এই কৃষকসকলক সংগঠিত কৰি দিল্লী অভিমুখে ৰাওণা হ’বলৈ অনুপ্ৰাণিত কৰা কৃষক নেতাসকলৰো আছে ডাঙৰ ভূমিকা৷তেনে এগৰাকী নেতাৰ কাহিনীৰে এক প্ৰতিবেদন৷
তেতিয়া সংসদত কৃষি আইন গৃহীত হোৱাই নাই , কেন্দ্ৰীয় চৰকাৰে জাৰি কৰিছে কৃষি অধ্যাদেশ ৷ ইয়াৰ বিৰুদ্ধে সৰৱ হৈ উঠিল এজন ৬০ ৰ উৰ্ধৰ কৃষক নেতা ৷ হাৰিয়ানাত তেও ট্ৰেক্টৰ ৰেলীৰ আহ্বান জনালে ৷ সেই এটা আহ্বানত ১০ হাজাৰৰো অধিক ট্ৰেক্টৰৰ সমদল দেখা গ’ল হাৰিয়ানাৰ ৰাজপথত ৷ দিনটো আছিল ২০২০ চনৰ ২১ জুলাই ৷ তেতিয়া মোদী চৰকাৰে কল্পনাও কৰিব পৰা নাছিল যে এই আন্দোলনেই পৰৱৰ্তী এটা বছৰলৈ ৰাজধানী জোকাৰি থাকিব , তেওলোক নিজৰ সিদ্ধান্তৰ পৰা পিছুৱাই আহিবলৈ বাধ্য হ’ব ৷ দেশৰ এই ঐতিহাসিক কৃষক আন্দোলনক সংগঠিত কৰাত অন্যতম ভূমিকা লোৱা কৃষক নেতাকেইজনৰ ভিতৰত অন্যতম আছিল গুৰনাম সিঙ চাদুনী ৷ তেওৰ এটা আহ্বানতেই হাৰিয়ানাৰ ৰাজপথলৈ ওলাই আহিছিল ১০ হাজাৰ ট্ৰেক্টৰ ৷গুৰনাম সিঙ চাদুনীয়ে তেতিয়াই বুজি উঠিছিল যে মোদী চৰকাৰে যি কাম কৰিবলৈ গৈ আছে , সিয়ে কৃষকৰ অন্তৰত আঘাত কৰিব ৷ ট্ৰেক্টৰ সমদলৰ আহ্বান জনাই তেও কৈছিল যে এয়া আমাৰ বাবে জীৱন মৰণৰ যুঁজ ৷ কৃষক বিৰোধী স্থিতি কেন্দ্ৰীয় চৰকাৰে প্ৰত্যাহাৰ নকৰালৈ কোনো এজন কৃষকেই বিচলিত নহয় ৷ গুৰনাম সিঙ চাদুনীক বছৰটোৰ বেছিভাগ সময় দেখা যায় হাৰিয়ানাৰ ৰাজপথত ৷ জীৱনৰ কেবাটাও দশক কৃষকৰ স্বাৰ্থত ৰাজপথতে পাৰ কৰিছে ৷ হাৰিয়ানাৰ অলিয়ে গলিয়ে ঘূৰি কৃষকক অধিকাৰৰ হকে , অন্যায়ৰ বিৰুদ্ধে সংগঠিত কৰাই তেওৰ কাম ৷ সেয়ে কৃষি অধ্যাদেশৰ কথা ওলোৱাৰ লগে লগে তেও বুজি উঠিল , কৃষকৰ ভৱিষ্যত কোন দিশে ৷ সেইবাবেই আকৌ এবাৰ ৰাজপথৰ সংগ্ৰামৰ আহ্বান জনালে ৷ জুলাইৰ পৰা ছেপ্তেম্বৰ পৰ্যন্ত এই আন্দোলন হাৰিয়ানাৰ কুৰুক্ষেত্ৰ অঞ্চলৰ চাৰিখন জিলাৰ মাজতে সীমাবদ্ধ আছিল ৷ কিন্তু ২০২০ চনৰ ১০ ছেপ্তেম্বৰৰ পৰা ঘটনাই ল’লে অন্য মোৰ ৷চাদুনী নেতৃত্বাধীন ভাৰতীয় কিষান ইউনিয়নে আহ্বান জনোৱা এখন জনসভাত আৰক্ষীয়ে ১৪৪ ধাৰা ভংগৰ অভিযোগ তুলি লাঠীচাৰ্জ কৰিলে ৷ তাৰ পাছতে জাঙুৰ খাই উঠিল সমগ্ৰ হাৰিয়ানাৰ কৃষক সমাজ ৷ আন্দোলন বিয়পি পৰিল হাৰিয়ানাৰ গাৱে ভূঞে, চহৰে নগৰে ৷ কৃষকসকল ক্ৰমাৎ অধিক আগ্ৰাসী ৰূপত সংগঠিত হ’ল ৷নৱেম্বৰৰ ২৪ তাৰিখে গুৰনাম সিঙ চাদুনীয়ে দিল্লী চলোৰ আহ্বান জনালে ৷ তেও এইবুলিও ক’লে যে প্ৰয়োজনত পুলিচৰ বেৰিকেড ভাঙি দিয়া হ’ব কিন্তু যিকোনো মূল্যৰ বিনিময়ত দিল্লীত উপস্থিত হ’বই লাগিব ৷ এই আহ্বানৰ পাছদিনাই হাজাৰ হাজাৰ লোক ওলাই আহিল হাৰিয়ানাৰ ৰাজপথলৈ ৷আৰক্ষীও আহিল সমুখ সমৰলৈ ৷ ঠায়ে ঠায়ে দিল্লী অভিমুখী কৃষকক বাধা দিবলৈ নানান ব্যৱস্থা কৰা হ’ল ৷ কিন্তু কোনো বাধাই তলাব নোৱাৰিলে প্ৰতিবাদী কৃষকসমাজক ৷ সেই অপ্ৰতিৰোধ্য কৃষক সমদলৰ লগত সেই দিনাই দেশবাসীৰ চকুত পৰিছিল এজন ৬২ বছৰীয়া নেতা ৷ তেও ভাৰতীয় কিষান ইউনিয়নৰ নেতা গুৰনাম সিঙ চাদুনী ৷
এইজন চাদুনীৰ আহ্বানতেই এই বছৰৰ আগষ্ট মাহৰ ২৮ তাৰিখে হাজাৰ হাজাৰ কৃষক ৰাওণা হ’ল হাৰিয়ানাৰ কৰ্ণাললৈ ৷ কাৰণ তাত হাৰিয়ানাৰ মুখ্যমন্ত্ৰী মনোহৰ লাল খট্টৰৰ এখন সভা অনুষ্ঠিত হোৱাৰ কথা আছিল ৷এইবাৰ চাদুনীৰ আহ্বান আছিল – এইবাৰ মুখ্যমন্ত্ৰীক উচিত শিক্ষা দিয়া যাওক ৷ পুণৰ আৰক্ষী আৰু কৃষকৰ মাজত সংঘাতৰ সূত্ৰপাত হ’ল ৷ বহু কৃষক গুৰুতৰভাৱে আহত হ’ল ৷ সেই ঘটনাৰ পাছৰে পৰা বিজেপিৰ বিৰুদ্ধে ক্ষুদ্ধ হৈ উঠিক কৃষকসমাজ ৷ সকলো বিজেপিৰ কাৰ্যসূচীত বাধা হৈ থিয় হ’ল কৃষি আইন বিৰোধী কৃষক ৷ চাদুনীৰ নেতৃত্বত চলি থকা আন্দোলনৰ বাবেই ক্ৰমাৎ বেকফুটত থিয় হ’ল হাৰিয়ানাৰ বিজেপি চৰকাৰ ৷ কেৱল সেয়াই নহয় , এই আন্দোলন চলাই নিবৰ বাবেই গুৰনাম সিঙ চাদুনীয়ে নিজৰ ৯ একৰ মাটি বিক্ৰী কৰি দিছে ৷ এতিয়া চাদুনীৰ নিজৰ বুলিবলৈ মাটি আছে কেৱল ৫ একৰ ৷কিয় ইমান ত্যাগ কৰিছে সেই বিষয়ে বাখ্যা কৰি চাদুনীয়ে কয় –‘এয়া আমাৰ কৃষক সমাজৰ বাবে জীৱন মৰণৰ ৰণ ৷কাৰণ নতুন কৃষি আইনৰ জড়িয়তে কৃষি কাৰ্যক প্ৰথমতে লাভ – লোকচানৰ ব্যৱসায়ত পৰিণত কৰা হ’ব ৷তাৰ পাছত পুজিপতিৰ বাবে কৃষকৰ ভূমি দখল কৰাটো সহজসাধ্য হৈ পৰিব ৷ এনেকৈ কৃষকসকল পৰিণত হ’ব ভিখাৰীত ৷’ ১৯৯২ চনত কৃষি পথাৰত যোগান ধৰা বিজুলীৰ দাম বৃদ্ধিৰ বিৰুদ্ধে প্ৰথমবাৰৰ বাবে আন্দোলনৰ কাৰ্যসূচী গ্ৰহণ কৰিছিল গুৰনাম সিঙ চাদুনীয়ে ৷ তাৰ পাছৰে পৰা তেও জীৱনৰ সকলো সময় কটাই দিছে কৃষকৰ মাজত ৷ এইবাৰ আন্দোলনৰ কাৰ্যসূচী সংগঠিত কৰিবলৈও তেও হাৰিয়ানাৰ চুকে কোনে ভ্ৰমন কৰিছে ৷ এনেদৰে ঘূৰি ফুৰোতে হেৰুৱাইছে নিওজৰ শৰীৰৰ ৯ কেজি ওজন ৷তাৰ পাছতো তেও ক্ষান্ত নহ’ল , কৃষি আইনৰ বিৰুদ্ধে অটল , অলৰ , অচৰ হৈ ৰ’ল ৷ আপুনি হয়তো তেওক সঘনে টিভিত নেদেখে ৷ মঞ্চতো নেদেখে ৷ কিন্তু ঐতিহাসিক কৃষক আন্দোলনৰ সূত্ৰপাত কৰাত গুৰনাম সিঙ চাদুনী হৈ ৰ’ল এটা অবিস্মৰণীয় নাম ৷
