মোদী চৰকাৰে কিয় বাতিল কৰিলে তিনিখন বিতৰ্কিত কৃষি আইন?

প্ৰধানমন্ত্ৰী নৰেন্দ্ৰ মোদীয়ে তিনিখন কৃষি আইন প্ৰত্যাহাৰ কৰা হ’ব বুলি ঘোষণা কৰিছে যদিও কৃষকসকলৰ আন্দোলন এতিয়াই বন্ধ নহয় ৷ কৃষক নেতা গজেন্দ্ৰ টিকাইতে এই ঘোষণা কৰিছে ৷ মোদীয়ে কয় যে সংসদত যেতিয়ালৈকে কৃষি আইন প্ৰত্যাহাৰ কৰা নহয় তেতিয়ালৈকে কৃষকসকলে দিল্লী সীমান্ত এৰি নাযায় ৷ চৰকাৰে এতিয়া নূন্যতম সমৰ্থন মূল্যক লৈ কৃষকৰ সৈতে আলোচনা কৰা উচিত বুলি মন্তব্য প্ৰকাশ কৰিছে। প্ৰধানমন্ত্ৰী নৰেন্দ্ৰ মোদীয়ে দেশবাসীক উদ্দ্যেশ্যি ১০৬৭ টা শব্দৰ এটা বক্তৃতা প্ৰদান কৰিছিল ৷ গুৰুনানক জয়ন্তীৰ দিনটোতে মোদীয়ে তিনিখন বিতৰ্কিত কৃষি আইন প্ৰত্যাহাৰ কৰাৰ কথাও ঘোষণা কৰে ৷ তিনিখন বিতৰ্কিত কৃষি আইন প্ৰত্যাহাৰ কৰাৰ প্ৰথম কাৰণটো হ’ল – কৃষক আন্দোলন অধিক জোৰদাৰ কৰাৰ ঘোষণা – ২০২০ চনৰ ২৬ নৱেম্বৰত দিল্লী সীমান্তত চলি থকা কৃষক বিদ্ৰোহৰ এবছৰ সম্পূৰ্ণ হ’ব ৷ এবছৰ সম্পূৰ্ণ হোৱাৰ পাছতে কৃষক আন্দোলন অধিক জোৰদাৰ কৰি তোলা হ’ব বুলি ঘোষণা কৰিছে কৃষক সংগঠনসমূহে ৷ পাঁচ ৰাজ্যৰ বিধানসভা নিৰ্বাচনৰ প্ৰাকমুহূৰ্তত যদিহে কৃষক আন্দোলনে তীব্ৰতৰ ৰূপ লয় , তেনেহ’লে বিধানসভা নিৰ্বাচনতো ইয়াৰ বিৰূপ প্ৰভাৱ পৰিব ৷ সেইবাবেই কৃষক আন্দোলনৰ লহৰ তীব্ৰ হোৱাৰ পূৰ্বে এক ডিফেন্সিভ পদক্ষেপ হিচাপে মোদী চৰকাৰে আইনকেইখন প্ৰত্যাহাৰ কৰাৰ সিদ্ধান্ত লয় ৷ কৃষি আইন প্ৰত্যাহাৰৰ দ্বিতীয়টো কাৰণ হ’ল উত্তৰ প্ৰদেশৰ নিৰ্বাচন – শেহতীয়া এগজিট প’লসমূহত প্ৰকাশ পোৱা মতে উত্তৰ প্ৰদেশত এইবাৰ কঠিন প্ৰত্যাহ্বানৰ সন্মুখীন হ’ব বিজেপি ৷ ৰাজ্যখনত বিজেপিৰ আসন পূৰ্বৰ তুলনাত ৮০ পৰা ১০০ খন হ্ৰাস পোৱাৰ সম্ভাৱনা এতিয়াই স্পষ্ট হৈ পৰিছে ৷ বিশেষকৈ জাত আৰু মুছলমান অধ্যুষিত পশ্চিম উত্তৰ প্ৰদেশত বিজেপি আটাইতকৈ বেছি সমস্যাৰ সন্মুখীন হৈছে ৷ যাৰ বাবে পশ্চিম উত্তৰ প্ৰদেশৰ দায়িত্ব বিশেষভাৱে মূৰ পাতি লৈছে অমিত শ্বাহে নিজেই ৷ কিয়নো এই অঞ্চলতে ৰাকেশ টিকেইটৰ দৰে কৃষক নেতাসকলৰ প্ৰভাৱ আটাইতকৈ বেছি ৷ অমিত শ্বাহে পশ্চিম উত্তৰ প্ৰদেশৰ দায়িত্ব লোৱাৰ এদিন পাছতে এই আইন তিনিখন প্ৰত্যাহাৰৰ সিদ্ধান্ত লোৱা হয় ৷ বিশ্লেষকসকলৰ মতে কমেও ১০০ খন বিধানসভা আসনত কৃষকসকলৰ সমস্যা প্ৰধান নিৰ্বাচনী ইছ্যু হৈ আহিছে ৷ যদিহে মোদী চৰকাৰে কৃষকক অপমান কৰাৰ বাৰ্তা কৃষকসকলৰ মাজত বিয়পি পৰে তেনেহ’লে নিৰ্বাচনত ইয়াৰ বিৰূপ প্ৰভাৱ পৰাটো নিশ্চিত ৷পশ্চিম উত্তৰ প্ৰদেশৰ ৩২ শতাংশ মুছলমান আৰু ১২ শতাংশ জাত ভোটাৰক অসন্তুষ্ট কৰি যে বিজেপিয়ে ভাল ফল পাব নোৱাৰে সেয়া ভালদৰেই উপলব্ধি কৰিছে ৷ সেইবাবেই নিৰ্বাচনলৈ মাত্ৰ তিনি মাহ বাকী থকা অৱস্থাত বিজেপিয়ে কৃষি আইন প্ৰত্যাহাৰৰ সিদ্ধান্ত ল’লে ৷ কৃষি আইন প্ৰত্যাহাৰৰ তৃতীয়টো কাৰণ হৈছে শেহতীয়া উপ – নিৰ্বাচনৰ ফলাফল আৰু সমাগত বিধানসভা নিৰ্বাচনৰ এগজিত পোলে বাৰুকৈয়ে চিন্তাত পেলাইছে বিজেপি হাইকামাণ্ডক ৷ বিশেষকৈ কৃষি আইনৰ বিৰোধিতাৰে শিৰোমণি আকালি দলে এন ডি এ ত্যাগ কৰাৰ পাছত পঞ্জাৱত বিজেপিৰ ভৰি দিবলৈ ঠাই নোহোৱা হৈছে ৷ এই শিৰোমণি আকালি দলেই আছিল এন ডি এৰ আটাইতকৈ পুৰণি সহযোগী ৷ পূৰ্বৰ তথ্য অনুসৰি শিৰোমনি আকালি দল আৰু বিজেপিয়ে নিৰ্বাচনসমূহত প্ৰায় ৩৫ শতাংশ ভোট লাভ কৰি আহিছে ৷ ইয়াৰে ৭-৮ শতাংশহে বিজেপিৰ নিজা ভোট ৷ গতিকে শিৰোমনি আকালি দলে সংগ এৰাৰ পাছত পঞ্জাৱৰ বিজেপি প্ৰায় অস্তিত্বহীন ৷ ২০২৪ ৰ লোকসভা নিৰ্বাচনৰ পূৰ্বে যদি দ্বিতীয়বাৰৰ বাবে পঞ্জাৱত ক্ষমতাৰ পৰা বাহিৰত থাকিবলগীয়া হয় , তেনেহ’লে ইয়াৰ প্ৰভাৱ আন ৰাজ্যসমূহতো পৰাটো নিশ্চিত ৷ সেইবাবেই আকৌ শিৰোমণি আকালি দলৰ বাট মুকলি কৰিবলৈ মোদী চৰকাৰে এই গুৰুত্বপূৰ্ণ সিদ্ধান্ত ল’বলগীয়া হ’ল ৷ কৃষি আইন প্ৰত্যাহাৰৰ আৰু এটা অন্যতম কাৰণ হৈছে ২০১৪ চনত ক্ষমতালৈ অহাৰ পাছতে বিজেপি চৰকাৰে গৃহীত কৰিবলৈ বিচাৰিছিল ভূমি অধিগ্ৰহণ আইন ৷ তেতিয়া আন বিৰোধী দলসমূহে মোদী চৰকাৰক চুট বুটৰ চৰকাৰ বুলি অভিহিত কৰি আক্ৰমণ কৰিবলৈ আৰম্ভ কৰে ৷ তাৰ পাছৰে পৰা এই আইনখনৰ কথা দ্বিতীয়বাৰলৈ উচ্চাৰণ কৰা নাই মোদী চৰকাৰে ৷ কিয়নো ভূমি অধিগ্ৰহণ আইনৰ লগত কৃষকৰ ভূমিৰ অধিকাৰৰ কথা জড়িত হৈ আছে ৷ দেশৰ জনসংখ্যাৰ সৰহভাগ লোকেই কৃষি কৰ্মৰ লগত জড়িত ৷ এখন আইনেৰে কৃষকৰ স্বাৰ্থত আঘাত হনা মানে বিজেপিয়ে খাল খান্দি ঘৰিয়াল চপোৱাৰ দৰে কথা ৷ সেইবাবেই ভূমি অধিগ্ৰহণ আইনক ক’ল্ড ষ্ট’ৰেজলৈ নিক্ষেপ কৰা হ’ল ৷ এইবাৰো তিনিখন কৃষি আইনক কৃষক সংগঠমসমূহে বিৰোধিতা কৰাৰ লগতে আত্মসন্মানৰ প্ৰশ্ন হিচাপেও ল’লে ৷ অধিক দিন এই আন্দোলন চলি থকা মানেই এয়া কৃষকৰ আৱেগ অনুভূতিৰ বিষয় হৈ পৰিব ৷ যাৰ পৰিণতি বিজেপি দলেই ভোগ কৰিব লাগিব ৷ সেয়ে কৃষকসকল বিজেপিৰ ওপৰত স্থায়ীভাৱে অসন্তুষ্ট হোৱাৰ আশংকাতে কৃষি আইনৰ পৰা পিছ হুহুকিব লগা হ’ল মোদী চৰকাৰ ৷