Investigative reporting with dedication.
Big Exclusive : দুৰ্ঘটনা নে হত্যা !
- ৬ মে’ত লখিমপুৰৰ পৰা ৬ লাখ টকা আনিছিল জোনমণি ৰাভাই
- লখিমপুৰত জোনমণিৰ বিৰুদ্ধে ১৫ মে’ত ৰুজু হৈছিল গোচৰ
- ভাৰতীয় দণ্ডবিধিৰ ১২০(বি) , ৩৯৫ , ৩৯৭ , ৩৪২ আৰু ৩৮৭ ধাৰাৰ অধীনত গোচৰ
- কোনে লখিমপুৰলৈ প্ৰেৰণ কৰিছিল জোনমণি ৰাভাক ?
- কোনে জোনমণিৰ ঘৰৰ পৰা নিশা উদ্ধাৰ কৰিছিল টকা ?
- জোনমণিৰ মৃত্যু দুৰ্ঘটনা নে হত্যা ?
এছ আই জোনমনি ৰাভাৰ মৃত্যুৰ ঘটনাই এক নতুন মোৰ লৈছে ৷ মৃত্যুৰ পূৰ্বে লখিমপুৰ থানাত ৰুজু হৈছিল জোনমণি ৰাভাৰ বিৰুদ্ধে ৬ লাখ টকা ধন দাবীৰ গোচৰ ৷বিগত ১৫ মে’ত আমিনা খাতুন নামৰ লখিমপুৰৰ বৰছলাৰ এগৰাকী মহিলাই জোনমণি ৰাভাৰ বিৰুদ্ধে এজাহাৰ দাখিল কৰিছিল৷ এই এজাহাৰৰ পাছতেই উত্তৰ লখিমপুৰ থানাত জোনমণি ৰাভাৰ বিৰুদ্ধে ভাৰতীয় দণ্ডবিধিৰ ১২০(বি) , ৩৯৫ , ৩৯৭ , ৩৪২ আৰু ৩৮৭ ধাৰাৰ অধীনত গোচৰ ৰুজু হৈছিল ৷
আমিনা খাতুন নামৰ মহিলাগৰাকীয়ে এজাহাৰত উল্লেখ কৰা অনুসৰি , বিগত ৬ মে’ৰ নিশা প্ৰায় ২ বজাত নগাঁৱৰ এছ আই জোনমণি ৰাভাই মুৰমহম্মদ কালিয়া , আজিমুদ্দিন , মুস্তাক আহমেদ , মুক্তাৰ হুছেইন , আটাবুৰ ৰহমান , নজৰুল ইছলাম আৰু ৰিয়াজুল ইছলামৰ সৈতে উপস্থিত হৈছিল আমিনা খাতুনৰ ঘৰত ৷
তাৰ পাছত আমিনা খাতুনৰ পুত্ৰ আজগৰ আলিক প্ৰহাৰ কৰি নিজৰ লগত লৈ গৈছিল ৷ আগজৰ আলীৰ লগতে জোনমণি ৰাভা আৰু অন্যান্যসকলে নগদ ৮০ হাজাৰ টকা , ভোটাৰ আই ডি , পান কাৰ্ড আৰু আজগৰৰ পত্নীৰ সোণৰ অলংকাৰো কাঢ়ি নিয়ে ৷ আনকি আজগৰৰ ভাতৃ আবু তালেবৰ ব্ৰীজা গাড়ীখনো জোনমণি ৰাভাৰ দলটোৱে লৈ যোৱা বুলি এজাহাৰত উল্লেখ আছে ৷
সেইদিনা পুৱা জোনমণি ৰাভাই আমিনা খাতুনক ৬ লাখ টকাসহ গহপুৰৰ অৰুণাচল বাইপাছলৈ মাতি পঠিয়াই ৷ জোনমণি ৰাভাক ৬ লাখ টকা আদায় দিয়াৰ পাছত ব্ৰীজা গাড়ী আৰু আজগৰ আলীক মোকলাই দিয়া হয় ৷ এই ৬ লাখ টকাৰ ভিতৰত ৯০ হাজাৰ টকা আন এজন অভিযুক্ত ৰিয়াজুলক ইউ পি আই আই ডিৰ জড়িয়তেও আদায় দিয়া হৈছিল বুলি এজাহাৰত উল্লেখ আছে ৷ ইয়াৰ পাছত জোনমণি ৰাভাই আজগৰক ভাবুকি দিছিল যে যদি এই কথা আন কাৰোবাক জনায় , তেনেহ’লে ভৰিত গুলী কৰি জে’ললৈ প্ৰেৰণ কৰিব ৷
৬ মে’ৰ মাজনিশাৰ এই ঘটনাৰ পাছত আজগৰৰ পৰিয়াল নীৰৱে থাকে যদিও বিগত ১৫মে’ত জোনমণি ৰাভা আৰু আন আন অভিযুক্তসকলৰ বিৰুদ্ধে উত্তৰ লখিমপুৰ থানাত এজাহাৰ দাখিল কৰে ৷ এই এজাহাৰৰ ভিত্তিতেই ভাৰতীয় দণ্ডবিধিৰ ১২০(বি) , ৩৯৫ , ৩৯৭ , ৩৪২ আৰু ৩৮৭ ধাৰাৰ অধীনত গোচৰ ৰুজু হৈছিল ৷
