ৰন্ধন গেছ , অত্যাৱশ্যকীয় সামগ্ৰী , শাক পাচলিৰ মূল্যবৃদ্ধিয়ে জ্বলা কলা কৰাৰ পাছত এইবাৰ বৃদ্ধি হ’ব মোবাইলৰ খৰচ ৷ সোমবাৰে এয়াৰটেলে সদৰী কৰা অনুসৰি প্ৰিপেইড ফোন কল আৰু ডাটা পেকৰ মাচুল শুক্ৰবাৰৰ পৰা বৃদ্ধি পাব ৷ এতিয়াও ভোডাফোন আৰু জিওৰ তৰফৰ পৰা মাচুল বৃদ্ধিৰ কথা ঘোষণা কৰা হোৱা নাই ৷ কিন্তু এই কোম্পেনীসমূহৰ উপদেষ্টা সংস্থা বিলাকৰ মতে বাকী কোম্পেনীসমূহেও একেই পথ ল’বলৈ বাধ্য ৷ কিন্তু সৰ্বসাধাৰণ লোক বা নিম্ন মধ্যবিত্তসকলেই সাধাৰণতে প্ৰি পেইড মোবাইল ব্যৱহাৰ কৰে ৷ গতিকে মাচুল বৃদ্ধিৰ ফলত তেওলোকৰে দুৰ্ভোগ বাঢ়িব ৷
মাচুল বৃদ্ধিৰ পক্ষে এয়াৰটেলৰ যুক্তি হ’ল –গ্ৰাহকক ভাল সেৱা আগবঢ়াবৰ বাবে এজন গ্ৰাহকৰ পৰা মাহিলী গড় আয় বৰ্তমান ২০০ টকা আৰু ভৱিষ্যতে ৩০০ টকা হোৱা উচিত ৷ সেইবাবেই মাচুল বঢ়োৱাৰ সিদ্ধান্ত লোৱা হৈছে ৷ কেৱল কল পেকৰ ক্ষেত্ৰত নূন্যতম মাচুল এতিয়াৰ ৭৯ টকাৰ সলনি ৯৯ টকালৈ বৃদ্ধি কৰা হৈছে ৷আন আন পেকৰ ক্ষেত্ৰতো মাচুল ২০-২১ শতাংশ বৃদ্ধি পাব ৷
