Investigative reporting with dedication.
কৃষক অন্দোলন , পেগাছাছৰ চোৰাংছোৱাগিৰি , নিবনুৱা সমস্যা আদি কেবাটাও ইছ্যুক লৈ বৃহস্পতিবাৰে সংসদ ভৱন ঘেৰাও কাৰ্যসূচী গ্ৰহণ কৰে যুৱ কংগ্ৰেছে ৷ এই কাৰ্যসূচীত যুৱ কংগ্ৰেছৰ সমগ্ৰ দেশৰ সদস্যসকলে অংশগ্ৰহণ কৰে ৷ প্ৰতিবাদী কাৰ্যসূচীত উপস্থিত হৈ কংগ্ৰেছ নেতা ৰাহুল গান্ধীয়ে নৰেন্দ্ৰ মোদী নেতৃত্বাধীন কেন্দ্ৰীয় চৰকাৰখনক আক্ৰমণৰ লক্ষ্য কৰি লয় ৷ তেও কয় যে মোদী চৰকাৰ ক্ষুদ্ৰ উদ্যোগপতি , যুৱক –যুৱতী আৰু সাধাৰণ জনতাৰ লগত নাই ৷ তেওলোক কেৱল ২-৩ জন বৃহৎ উদ্যোগপতিৰ লগতহে আছে ৷ পেগাছাছ কাণ্ড সন্দৰ্ভত ৰাহুল গান্ধীৰ অভিযোগ – নৰেন্দ্ৰ মোদীয়ে কেৱল তেওৰ ফোনৰ ওপৰতে চোৰাংছোৱাগিৰি কৰা নাই ৷ প্ৰতিগৰাকী নাগৰিক , প্ৰতিগৰাকী যুৱকৰ ওপৰতে চোৰাংছোৱাগিৰি কৰিছে ৷ ইয়াৰ উদ্দেশ্য এটাই ৷সেয়া হ’ল ভাৰতবাসীৰ কণ্ঠ ৰোধ কৰা ৷ কিন্তু যেতিয়াই ভাৰতৰ যুৱ প্ৰজন্মই কথা ক’বলৈ আৰম্ভ কৰিব , সেইদিনাই এই চৰকাৰৰ পতন ঘটিব ৷
সক্ৰিয় হৈছে নেকি কংগ্ৰেছ ?
লোকসভা নিৰ্বাচনত উপৰ্যুপৰি পৰাজয় আৰু কেবাখনো ৰাজ্যত বিপৰ্যয়ৰ মুখামুখি হোৱাৰ পাছত কংগ্ৰেছে পেগাছাছ আৰু কৃষক আন্দোলনৰ ৰূপত দুটা ৰাজনৈতিক ইছ্যু হাতত পাইছে ৷ ইয়াৰ জড়িয়তেই চৰকাৰখনক শ’লঠেকত পেলোৱাৰ চেষ্টা অব্যাহত ৰাখিছে ৷আনকি ৰাহুল গান্ধীয়ে বিৰোধী নেতাসকলৰ লগত কেবাখনো বৈঠকত ভাগ লৈ এটা বাৰ্তা দিয়াৰ চেষ্টা কৰিছে যে পেগাছাছ আৰু কৃষি আইনৰ ইছ্যুত চৰকাৰখনে মূৰ পোলোকা মাৰিব নোৱাৰিব ৷ ইয়াৰ বাহিৰেও কংগ্ৰেছ নেতৃত্ব সংসদ ভৱনৰ পৰা ৰাজপথলৈ বিগত কিছুদিন ধৰি সৰৱ হৈ থকা দেখা গৈছে ৷ বৃহস্পতিবাৰৰ যুৱ কংগ্ৰেছৰ প্ৰতিবাদী কাৰ্যসূচীৰ পূৰ্বে দিল্লী কংগ্ৰেছেও এক প্ৰতিবাদ সাব্যস্ত কৰিছিল ৷
