উত্তৰ পূৱৰ কি কি সম্পদ লীজত দিয়া হ’ব পুঁজিপতিক ?

বিমানবন্দৰৰ পৰা ষ্টেডিয়ামলৈ,টেলিকম সেৱাৰ পৰা প্ৰাকৃতিক গেছ পাইপলাইনলৈ-উত্তৰ পূর্বাঞ্চলৰ বিশাল ৰাজহুৱা সম্পত্তিৰ গৰাকী হবলৈ গৈ আছে এতিয়া আদানি-আম্বানীৰ দৰে কেইগৰাকীমান পুঁজিপতি৷ভাৰত চৰকাৰৰ ৰাষ্ট্ৰীয় মুদ্ৰাকৰণ যোজনাৰ জড়িয়তে এতিয়া সমগ্ৰ দেশৰে ৰাজহুৱা সম্পত্তি লীজত দিয়া হ’ব দেশৰ কেইগৰাকীমান পুঁজিপতিক৷যাৰ জড়িয়তে উত্তৰ পূর্বৰ সাতখন ৰাজ্যৰ বিশাল পৰিমাণৰ ৰাজহুৱা সম্পত্তিৰ এতিয়া দায়িত্ব লাভ কৰিব কেইগৰাকীমান পুঁজিপতি,কেইটামান কোম্পানীয়ে৷

ৰাষ্ট্ৰীয় মুদ্ৰাকৰণ যোজনাৰ জড়িয়তে উত্তৰ-পূর্বাঞ্চলৰ কি কি সম্পদ ব্যক্তিগতকৰণ কৰিব মোদী চৰকাৰে ?

ক্ৰীড়া

৬ লাখ কোটি টকা অর্জনৰ লক্ষ্যৰে ২০২৫ চনৰ ভিতৰত মোদী চৰকাৰে পুঁজিপতিক লীজত দিব দেশৰ ৰাজহুৱা সম্পত্তি৷কি কি সম্পত্তি ব্যক্তিগতকৰণ কৰা হব,তাৰো তালিকা যুগুতাই উলিয়াইছে চৰকাৰে৷অন্যান্য ৰাজহুৱা সম্পত্তিৰ লগতে মোদী চৰকাৰে পুঁজিপতিৰ হাতত গতাই দিব দেশৰ ক্ৰীড়া প্ৰকল্প সমূহ৷ক্ৰীড়া প্ৰকল্প ব্যক্তিগতকৰণ কৰি কেন্দ্ৰই অর্জন কৰিব ১১,৪৫০ কোটি টকা৷ইয়াৰ ভিতৰত অন্তৰ্ভুক্ত হৈছে উত্তৰ পূর্বৰ দুটাকৈ ক্ৰীড়া প্ৰকল্প৷মুদ্ৰাকৰণ যোজনাৰ জড়িয়তে ব্যক্তিগতকৰণ কৰা হ’ব ছাইৰ গুৱাহাটী আঞ্চলিক কেন্দ্ৰ আৰু মণিপুৰৰ নেতাজী সুভাষচন্দ্ৰ বসু উত্তৰ পূব আঞ্চলিক কেন্দ্ৰ৷

টেলিকম

টেলিকম খণ্ডৰ সম্পত্তি লীজত দি কেন্দ্ৰই অর্জন কৰিব ৩৫,১০০ কোটি টকা৷ভাৰতনেট আৰু বি এছ এন এলৰ সম্পত্তি পুঁজিপতিৰ হাতত গতাই চৰকাৰে অর্জন কৰিব এই বিশাল টকা৷কেন্দ্ৰৰ পৰিকল্পনা অনুসৰি,অসম,মিজোৰাম,ত্ৰিপুৰা,অৰুণাচল প্ৰদেশ,মনিপুৰ,নগালেণ্ড আৰু মেঘালয়ৰ ভাৰতনেট ফাইবাৰৰ সম্পত্তি হস্তান্তৰ কৰা হব পুঁজিপতিক৷ভাৰত নেট ফাইবাৰৰ সম্পত্তি পুঁজিপতিক গতাই চৰকাৰে অর্জন কৰিব ২৬৩০০ কোটি টকা৷

প্ৰাকৃতিক গেছ

২৪,৪৬২ কোটি টকা অর্জনৰ লক্ষ্যৰে ভাৰত চৰকাৰে ব্যক্তিগতকৰণ কৰিব দেশৰ প্ৰাকৃতিক গেছ খণ্ডৰ সম্পদ সমূহ৷ ব্যক্তিগতকৰণ কৰা হব প্ৰাকৃতিক গেছ পাইপলাইন৷সেই অনুসৰি লীজত দিয়া হব,বাৰাউনী-গুৱাহাটী পাইপলাইন নেটৱর্কৰ ১০৯৮ কিলোমিটাৰ আৰু ত্ৰিপুৰা নেটৱর্কৰ ৬০ কিলোমিটাৰ৷

বিমান বন্দৰ

অসমৰ গুৱাহাটী বিমানবন্দৰ ইতিমধ্যে গৌতম আদানীৰ হাতত গতাই দিয়া হৈছে৷মুদ্ৰাকৰণ যোজনাৰ জৰিয়তে এইবাৰ গতাই দিয়া হব উত্তৰ পূর্বাঞ্চলৰ আন দুটা বিমানবন্দৰ৷মনিপুৰৰ ইম্ফল বিমানবন্দৰ ২৫৩ কোটি টকাত লীজত দিবলৈ সিদ্ধান্ত লোৱাৰ বিপৰীতে ত্ৰিপুৰাৰ আগৰতলা বিমানবন্দৰ লীজত দিয়া হব ৪১৮ কোটি টকাত৷

ৰাষ্ট্ৰীয় ঘাইপথ

ৰাষ্ট্ৰীয় মুদ্ৰাকৰণ যোজনাৰ অধীনত পুঁজিপতিক গতাই দিয়াৰ বাবে লক্ষ্য কৰি লোৱা হৈছে দেশৰ ৰাষ্ট্ৰীয় ঘাইপথসমূহো৷ঘাইপথ লীজত দি মোদী চৰকাৰে অর্জন কৰিব সর্বমুঠ ১,৬০,২০০ কোটি টকা৷পথ ব্যক্তিগতকৰণৰ এই তালিকাত আছে অসমৰ দুটাকৈ পথ৷অসমৰ শ্বিলং বাইপাছৰ ৪৯ কিলোমিটাৰৰ লগতে অসম-পশ্চিমবংগ সংযোগী ছালছাবাৰী ২৬ কিলোমিটাৰৰ পথ ব্যক্তিগতকৰণ কৰা হ’ব মুদ্ৰাকৰণ যোজনাৰ জড়িয়তে৷

মোদী চৰকাৰৰ বিমুদ্ৰাকৰনৰ পিছত এইবাৰ মুদ্ৰাকৰণ যোজনা৷বিমুদ্ৰাকৰণে দেশবাসীক জ্বলাকলা কৰিছিল,এইবাৰ মুদ্ৰাকৰণে সমগ্ৰ দেশৰ ৰাজহুৱা আন্ত:গাঁথনিকে ফোপোলা কৰি নেপেলাবনে?অসম তথা উত্তৰ-পূর্বাঞ্চলৰ এই বিশাল পৰিমাণৰ সম্পত্তি ব্যক্তগতকৰণ কৰাৰ পিছত,উত্তৰ-পূর্বৰ হাতত নিজা বুলি কিবা বাকী থাকিবগৈনে?