Investigative reporting with dedication.
আচামী , পুলিচ , উকীল – এটা গোচৰত সংপৃক্ত হৈ থকা তিনিজন ভিন্ন পেচাৰ মানুহ এতিয়া গোট খাইছে একেখন মঞ্চত ৷ তিনিওগৰাকী ব্যক্তি এটা আদৰ্শবান , ক্ষমতাশালী দলৰ একোজন গুৰুত্বপূৰ্ণ নেতা ৷তেওলোক এতিয়া একেটা দলৰ সহকৰ্মী – সহযাত্ৰী ৷ আচৰিত যেন লাগিলেও , বিশ্বাস কৰিবলৈ টান পালেও এনে এটা ঘটনাই শেহতীয়াকৈ সংঘটিত হ’ল এইখন অসমত ৷ কোন এই তিনি ব্যক্তি , ক’ত একলগ হৈছে তেওলোক ?
চন ২০১৮ ৷ অসম আৰক্ষীৰ অৰ্থনৈতিক অপৰাধ অনুসন্ধান সংস্থা চমুকৈ বি আই ই ওয়ে ৰুজু কৰে এটা বিত্তীয় জালিয়াতিৰ গোচৰ ৷গোচৰ নং ২/২০১৮ ৷ভাৰতীয় দণ্ডবিধিৰ ১২০(বি) , ৪৬৮ , ৪২০ আৰু ৪০৬ ধাৰাৰ অধীনত ৰুজু হোৱা এই গোপৰটোৰ অনুসন্ধান আৰম্ভ কৰি তদন্তকাৰী সংস্থাটোৱে ৫ জন ব্যক্তিক প্ৰধান অভিযুক্ত হিচাপে চিহ্ণিত কৰে ৷ ২০১৮ চনৰ মাৰ্চ মাহত আৰক্ষীয়ে এই গোচৰটোত গ্ৰেপ্তাৰ কৰে পাঁচজন অভিযুক্তক ৷ অভিযুক্ত কেইজন আছিল বিল্ডাৰ ফনী তালুকদাৰ , অমৰেন্দ্ৰ কলিতা , বানৱৰীলাল পাৰেখ , সুৰুয শৰ্মা আৰু শৈলেন ৰয় ৷ প্ৰায় ২ কৌটি ৫৮ লাখ টকাৰ বেংকৰ ঋণ জালিয়াতিৰ গোচৰত তেওলোকক গ্ৰেপ্তাৰ কৰি জেললৈ প্ৰেৰণ কৰা হয় ৷ অৱশ্যে সেই সময়ত ফনী তালুকদাৰ অসুস্থ হৈ পৰাত তেওক চিকিৎসালয়ত ভৰ্তি কৰোৱা হয় ৷ ফনী তালুকদাৰ তিনিবছৰ পাছত ভবানীপুৰ সমষ্টিৰ পৰা এ আই ইউ ডি এফ দলৰ বিধায়ক হিচাপে নিৰ্বাচিত হয় আৰু বুধবাৰে তেও এ আই ইউ ডি এফ দল ত্যাগ কৰি বিজেপি দলত যোগদান কৰে ৷
গোচৰটো সন্দৰ্ভত তদন্তকাৰী সংস্থা বি আই ই ওৰ তেতিয়াৰ আৰক্ষী অধীক্ষক শ্যামল শইকীয়াই সংবাদ মাধ্যমৰ আগত কৈছিল যে তিনিওজন অভিযুক্তই পঞ্জাৱ নেচনেল বেংকৰ জু ৰোড শাখাৰ পৰা এটা ঋণ লৈছিল ৷ কিন্তু ঋণ লোৱা সময়ত তেওলোকে প্ৰবঞ্চনাৰ অভিপ্ৰায়েৰে বেংকত দাখিল কৰিছিল ভুৱা নথি পত্ৰ ৷ গ্ৰেপ্তাৰ হোৱা বানৱৰীলাল পাৰেখে দুটা ফ্লেটৰ নামত বেংকটোৰ পৰা ঋণ লৈছিল ৷ কিন্তু যি দুটা ফ্লেটৰ নামত তেও ঋণ লৈছিল , সেই ফ্লেট দুটা আন ব্যক্তিৰ নামতহে ৰেজিষ্টাৰ হৈ আছিল ৷ অথচ এই ফ্লেট দুটাক ভুৱা নথিৰে নিজৰ বুলি দেখুৱাইছিল বানৱৰীলাল পাৰেখে ৷ বেংকৰ অনুসন্ধানত এই জালিয়াতি ধৰা পৰাৰ পাছত বেংক কৰ্তৃপক্ষই গোচৰ ৰুজু কৰে ৷এই গোচৰতে পাঁচজন প্ৰধান অভিযুক্তক গ্ৰেপ্তাৰ কৰা বুলি উল্লেখ কৰি আৰক্ষী বিষয়াগৰাকীয়ে তেওলোক আন জালিয়াতিৰ লগত জড়িত আছে নেকি , সেই বিষয়ে অনুসন্ধান কৰি থকা বুলিও সদৰী কৰে ৷শ্যামল শইকীয়াই লগতে জানিবলৈ দিছিল যে ফ্লেটৰ ভুৱা ডকুমেন্ট দাখিল কৰি ১ কৌটি ৫৮ লাখ টকা আৰু আন ১ কৌটি টকাৰ কেচ ঋণ লোৱা হৈছিল ৷ যি দুটা ফ্লেটৰ তথ্য বেংকত দাখিল কৰা হৈছিল , সেই ফ্লেটৰ নিৰ্মাতা আছিল স্কাই স্ক্ৰেপাৰ্ছ ৰিয়েল্টৰ্চৰ স্বত্বাধিকাৰী তথা এতিয়াৰ বিজেপি নেতা ফনী তালুকদাৰ ৷ গোচৰটোত গ্ৰেপ্তাৰ হোৱা আন লোককেইজনো ফনী তালুকদাৰৰে ব্যৱসায়িক সহযোগী আছিল ৷
সময় সলনি হ’ল ৷ ব্ৰক্ষ্মপুত্ৰৰ বুকুৰে বহুত পানী বৈ গ’ল ৷ চলিত বৰ্ষৰ আৰম্ভণিতে আৰক্ষী বিষয়া শ্যামল শইকীয়াই চাকৰিৰ পৰা স্বেচ্ছামূলক অৱসৰ লয় আৰু ২ ফেব্ৰুৱাৰীত বিজেপিত যোগদান কৰে ৷ শ্যামল শইকীয়াই ৰহা সমষ্টিৰ পৰা দলীয় টিকট বিচাৰিছিল যদিও সময়ত টিকট লাভ নকৰিলে ৷ প্ৰাক্তণ আৰক্ষী বিষয়াগৰাকী এতিয়াও বিজেপি দলৰ সক্ৰিয় নেতা ৷সময়ৰ গতিত শ্যামল শইকীয়াই গ্ৰেপ্তাৰ কৰা ফনী তালুকদাৰেও যোগ দিলে বিজেপি দলত ৷ অৰ্থাৎ আচামী আৰু পুলিচ আজিৰে পৰা হৈ পৰিল সহকৰ্মী – সহযাত্ৰী ৷
ইয়াৰ পূৰ্বে ফনী তালুকদাৰ আকৌ এবাৰ গ্ৰেপ্তাৰ হৈছিল ২০১১ চনত ৷ সোণাপুৰত চৰকাৰী মাটি দখল কৰাৰ গোচৰত ৷ সেই সময়ত ফনী তালুকদাৰৰ হৈ আদালতত যুক্তি প্ৰদৰ্শন কৰিছিল জ্যেষ্ঠ অধিবক্তা বিজন মহাজনে ৷ বিজন মহাজনেই কেইমাহমানৰ ভিতৰত আইনী যুঁজ দি অভিযুক্ত ফনী তালুকদাৰক জামিন দিয়াবলৈ সক্ষম হৈছিল ৷ নক’লেও হয় যে অধিবক্তা বিজন মহাজন বিজেপি দলৰো এজন সক্ৰিয় নেতা আৰু দলটোৰ মুখপাত্ৰৰ ভূমিকাও পালন কৰিছিল ৷
গতিকে ফনী তালুকদাৰে বিজেপিত যোগ দিয়াৰ পাছত অধিবক্তা আৰু আচামীৰ বাবেও মঞ্চ একেখনেই হৈ পৰিল ৷ পুলিচ , আচামী , অধিবক্তাক একেখন মঞ্চ, একেটা দলত দেখাৰ পাছত আকৌ এবাৰ স্পষ্ট হৈ পৰিছে যে ৰাজনীতিত অসম্ভৱ বুলিবলৈ একো নাই ৷ কিন্তু একেসময়তে উত্থাপণ হৈছে আন এটা গুৰুত্বপূৰ্ণ প্ৰশ্ন – আচামী , পুলিচ , অধিবক্তাই যদি এটা সময়ত একেটা ঘাটতে পানী খাবলৈ লয় , এইখন দেশত আইন , আৰক্ষী , আদালতৰ ওপৰত সাধাৰণ ৰাইজে বিশ্বাস ৰাখিব কেনেকৈ ?
