শুনি হয়তো আপুনি আচৰিত হৈছে। কিন্তু আপুনি জানেনে—
আপোনাৰ-মোৰ প্ৰিয় ক্ৰিকেটাৰগৰাকী এগৰাকী কোটিপতি ব্যৱসায়ী ।এইগৰাকী ক্ৰিকেটাৰে ব্যৱসায়ত বিনিয়োগ কৰে কোটি কোটি টকা । কোন খেলুৱৈয়ে ক’ত কিমান টকা বিনিয়োগ কৰে আপুনি জানেনে?
ভদ্রলোকৰ খেল বুলি কোৱা হয় ক্ৰিকেটক. সেই ভদ্রলোকৰ খেলতেই হিচাপবিহীন ধন বিনিয়োগ কৰা হয়।।আপুনি মই ভাল পোৱা তাৰকা খেলুৱৈগৰাকীয়ে কোটি কোটি টকাৰ বিনিময়ত খেল খেলে। যোৱা দুটা দশকধৰি বিশেষকৈ আই পি এল অহাৰ পিছত, ক্ৰিকেটলৈ আহি আছে হিচাপবিহীন ভাৱে ধন। এসময়ত ক্ৰিকেটাৰসকলৰ খেলৰ বাহিৰে কেৱল এটা উপাৰ্জনৰ উৎস আছিল বিজ্ঞাপন। হয়তো আপোনাৰ মনত থাকিব পাৰে কপিল দেৱক প্ৰায়ে ‘পালমোলিভ দা জৱাব নাহি’ বোলা বিজ্ঞাপনত আৰু সুনীল গাভাস্কাৰক ‘দিনেশ শ্বুটিং-চাৰ্টিঙ’ৰ বিজ্ঞাপনত প্ৰায়ে দেখা গৈছিল। কিন্তু বৰ্তমানৰ বিজ্ঞাপনবোৰলৈ আপুনি চাওঁক। আপুনি দেখিবলৈ পাব ভাৰতীয় ক্ৰিকেট দলৰ প্ৰতিগৰাকী খেলুৱৈক ন ন বিজ্ঞাপনত । বিজ্ঞাপনৰ ক্ষেত্রত ভাৰতীয় ক্ৰিকেটাৰৰ দপদপনিত বলীউডৰ তাৰকাসকলো পিছ পৰিছে। কপিল দেৱ আৰু সুনীল গাভাস্কাৰে নব্বৈ দশকত ক্ৰিকেট আৰু বিজ্ঞাপনৰ বাহিৰেও ব্যৱসায়তো মনোনিৱেশ কৰিছিল। ক্ৰিকেটৰ খেলপথাৰৰ পৰা ব্যৱসায়িক জগতত ভৰি দিয়া ভাৰতৰ প্ৰথমগৰাকী ডাঙৰ খেলুৱৈ আছিল সুনীল গাভাস্কাৰ। গাভাস্কাৰে ১৯৮৫ চনত আৰম্ভ কৰিছিল ক্ৰীড়া ব্যৱস্থাপনা কোম্পানী ‘প্ৰফেশ্বনেল মেনেজমেণ্ট গ্ৰুপ’। একে সময়তে কপিল দেৱৰ ছণ্ডীগড় আৰু পাটনাত আছে ‘কেপ্টেইনছ ৰিট্ৰিট’ নামেৰে ১১ খন ৰেষ্টুৰেণ্ট। কপিল দেৱে আৰম্ভ কৰিছিল ‘দেৱ মাস্কো লাইটিং’ নামৰ ফ্লাডলাইট ইনষ্টলেশ্বন কোম্পানীৰ। গাভাস্কাৰ আৰু কপিল দেৱে বৰ্তমান ধাৰাভাষ্যকাৰ হিচাপে উপাৰ্জন কৰি আছে যথেষ্ট ধন।
বৰ্তমান সময়ত খেলুৱৈসকলে তেওঁলোকৰ ভৱিষ্যৎ সুৰক্ষিত কৰিবলৈকে খেলাৰ লগতে বিভিন্ন ধৰণৰ ব্যৱসায়ত ধন বিনিয়োগ কৰি আছে। বহুতো খেলুৱৈয়ে নিজকে প্ৰতিষ্ঠা কৰিছে এটা ব্ৰেণ্ড হিচাপে। আনহাতে,খাদ্য,ফেশ্বন,ফিটনেছত বিনিয়োগ কৰিছে ‘কিং’ কোহলিয়ে। বিৰাট কোহলিক বৰ্তমান সময়ত বিশ্বৰ শ্ৰেষ্ঠ বেটছমেনৰ ভিতৰতগণ্য কৰা হয়। ক্ৰিকেটৰ বিন্যাস যিয়েই নহওঁক, তেওঁ ভাৰতৰ বাবে এজন মেচ-বিজেতা। বিৰাট কোহলীয়ে যোৱা সাত বছৰত বহুতো ব্যৱসায়িক উদ্যোগত বিনিয়োগ কৰিছে ধন।।চলিত বৰ্ষৰ মাৰ্চ মাহত কোহলিয়ে ৰেজ কফিত কৰিছে এক ডাঙৰ বিনিয়োগ। কিং কোহলিয়ে সত্য সিনহাৰ সৈতে ২০১৫ চনৰ জানুৱাৰীত আৰম্ভ কৰিছিল ফিটনেছ চেণ্টাৰ চেইন ‘চিজেল’। আইটিত কাম কৰা যুৱক-যুৱতীসকলৰ কথা ভাবি এই ফিটনেছ কেন্দ্ৰটো আৰম্ভ কৰিছিল কোহলিয়ে। বৰ্তমান সমগ্ৰ দেশতে চিজল নেটৱৰ্ক বিয়পাবলৈ এক পৰিকল্পনা কৰি আছে বিৰাট কোহলিয়ে। বেংগালুৰুস্থিত কোম্পানীটোৱে সমগ্ৰ দেশতে শ শ কেন্দ্ৰ স্থাপন কৰাৰ পৰিকল্পনা কৰিছে। বিৰাট কোহলি আৰু বলীউডৰ তাৰকা পত্নী অনুষ্কা শৰ্মাই একেলগে এটা ‘ব্লু ট্ৰাইব’ ষ্টাৰ্টআপ খুলিছে। বিৰাটে অঞ্জনা ৰেড্ডীৰ সৈতে অংশীদাৰীত্বত পুৰুষৰ পোছাক ব্ৰেণ্ড ‘ৰন’ মুকলি কৰিছে। ISL ত এফ চি গোৱাতো কোহলিৰ আছে অংশ। ২০১৫ চনত বিৰাট কোহলি ইণ্ডিয়ান টেনিছ প্ৰিমিয়াৰ লীগ দল ইউ.এ.ই. ৰয়েলছৰ সহ-মালিকো হৈছিল। বিৰাট কোহলীৰ লণ্ডনস্থিত টেক ষ্টাৰ্টআপ ‘স্পোৰ্ট কনভো’তো আছে শ্বেয়াৰ। বিৰাটৰ মুঠ বাৰ্ষিক উপাৰ্জন ১০০ কোটি টকাতকৈও অধিক। আনহাতে ব্যৱসায়ৰ ‘কিং’ মহেন্দ্ৰ সিং ধোনী । টীম ইণ্ডিয়াৰ প্ৰাক্তন অধিনায়ক মহেন্দ্ৰ সিং ধোনীক অনুৰাগীসকলে ‘কেপ্টেইন কুল’, শ্ৰেষ্ঠ ফিনিচাৰ বা ‘হেলিকপ্টাৰ শ্বট’ৰ বাবে প্ৰতিমুহূৰ্ততে স্মৰণ কৰে। কিন্তু বহুতে নাজানে যে ধোনী এগৰাকী সফল বিনিয়োগকাৰীৰ লগতে এগৰাকী সফল ব্যৱসায়ীও। ধোনীয়ে প্ৰথমবাৰৰ বাবে ২০১২ চনত এটা ষ্টাৰ্টআপত বিনিয়োগ কৰিছিল ধন। বৰ্তমান ধোনী বহুতো ব্যৱসায়ৰ অংশীদাৰ। সেইবোৰৰ ভিতৰত আছে কোম্পানী ‘স্পোৰ্টফিট ৱৰ্ল্ড’, যি মানুহৰ বাবে ফিটনেছ আৰু ডায়েট পৰিকল্পনা কৰে। ৪১ বছৰীয়া ধোনীৰ জোতা ব্ৰেণ্ড ছেভেনতো আছে বৃহৎ অংশ। আই পি এলৰ চেন্নাই চুপাৰ কিংছৰ সদস্য ধোনী চেন্নাইস্থিত ফুটবল দল ‘চেন্নাইয়িন এফ চি’ৰ সহ-মালিক। ধোনী হৈছে চুপাৰ স্পৰ্টছ বিশ্ব চেম্পিয়নশ্বিপ দল ‘মাহী ৰেচিং টীম ইণ্ডিয়া’ৰ সহ-মালিক। শেহতীয়াকৈ, ধোনীয়ে চেন্নাইৰ এটা ক্ৰীড়া প্ৰযুক্তি ষ্টাৰ্টআপ ‘ৰান এডাম’ত ২৫ শতাংশ অংশীদাৰিত্ব লৈছে। চলিত বছৰত ধোনীয়ে ঝাৰখণ্ডত প্ৰায় ১২.১৭ কোটি টকাৰ সৰ্বাধিক কৰ পৰিশোধ কৰিছিল। ফ’ৰ্বছ আলোচনীয়ে ২০১৫ চনত ধোনীৰ ব্ৰেণ্ড মূল্য নিৰ্ধাৰণ কৰিছিল প্ৰায় ৭৬৪ কোটি টকা।
- Donation -
ক্ৰিকেটৰ ভগৱানৰ আছে ক্ৰীড়া, ফিটনেছ,হোটেলৰ ব্যৱসায়।মাষ্টাৰ ব্লাষ্টাৰ শচীন তেণ্ডুলকাৰে ক্ৰিকেটৰ উপৰি বহুতো ডাঙৰ ডাঙৰ ব্ৰেণ্ডত কৰিছে বিনিয়োগ। বহুতে নাজানে তেণ্ডুলকাৰ ‘স্মাৰট্ৰন’ কোম্পানীৰ এজন আগশাৰীৰ বিনিয়োগকাৰী। ইয়াৰ উপৰি শচীনে বহুতো ষ্টাৰ্টআপত বিনিয়োগ কৰিছে ধন। শচীনে অলপতে ISLৰ দল ‘কেৰালা ব্লাষ্টাৰ্ছ’ৰ পৰা বিক্ৰী কৰিছিল তেওঁৰ অংশ। শচীন তেণ্ডুলকাৰ ইউ.এ.ই.স্থিত কোম্পানী ‘মুছাফিৰ যাত্ৰা’ৰ অংশীদাৰ আৰু ব্ৰেণ্ড এম্বেচেডৰ। মুম্বাই আৰু বেংগালুৰুত শচীন তেণ্ডুলকাৰে স্থাপন কৰা ৰেষ্টুৰেণ্টবোৰক ‘শচীন’ আৰু ‘তেণ্ডুলকাৰ’ বুলি নামাকৰণ কৰা হৈছে। তেণ্ডুলকাৰ ‘এছ ড্ৰাইভ’ আৰু ‘চাচ’ৰ অংশীদাৰ। এছ ড্ৰাইভ আৰু চাচ এক স্বাস্থ্য আৰু ফিটনেছ সামগ্ৰীৰ চেইন ব্যৱসায়।
বীৰেন্দ্ৰ সেহৱাগে প্ৰশিক্ষণ, ৰেষ্টুৰেণ্ট আৰু বিদ্যালয়ত বিনিয়োগ কৰিছে। টীম ইণ্ডিয়াৰ প্ৰাক্তন আক্ৰমণাত্মক অপেনাৰ বীৰেন্দ্ৰ সেহৱাগো এগৰাকী ব্যৱসায়ী। ২০১২ চনৰ পৰা ক্ৰিকেটত থাকোতেই সেহৱাগে ব্যৱসায়ী হিচাপে এটা নতুন ইনিংছ আৰম্ভ কৰিছিল। ধোনী আৰু কোহলীৰ বিপৰীতে বীৰেন্দ্ৰ সেহৱাগে ‘সেহৱাগ ইণ্টাৰনেচনেল স্কুল’ আৰম্ভ কৰিছিল। চেহৱাগে নিজেই ইয়াত ক্ৰিকেটত শিশুসকলক প্ৰশিক্ষণ দিয়ে। বীৰেন্দ্ৰ ছেহৱাগেও দিল্লীৰ ৰেষ্টুৰেণ্ট ব্যৱসায়ত হাত দিছিল। ৰেষ্টুৰেণ্টখন বন্ধ হৈ গৈছিল যদিও ৰেষ্টুৰেণ্টখনৰ নাম আছিল ‘চেহৱাগৰ প্ৰিয়’। অকল এইকেইগৰাকী ভাৰতীয় ক্ৰিকেটাৰেইনে ?যুৱৰাজ সিঙৰ আছে ইউভিকেন আৰু Sports365 ।
২০১১ চনৰ বিশ্বকাপত মেন অৱ দ্য ছিৰিজ যুৱৰাজ সিং কিয় পিছ পৰি থাকিব ব্যৱসায়ত? যুৱৰাজ কৰ্কট ৰোগৰ দৰে গুৰুতৰ ৰোগত যুঁজি থকাৰ পাছতো কেৱল বিশ্বকাপতে অংশগ্ৰহণ কৰাই নহয়, বিশ্বকাপ বিজয়ত আগবঢ়াইছিল গুৰুত্বপূৰ্ণ অৱদান। তাৰ পিছতেই যুৱৰাজ সিঙে ‘ইউভিকেন’ নামৰ এটা সংগঠন আৰম্ভ কৰিছিল, য’ত কৰ্কট ৰোগ আৰু ইয়াক নিৰাময় কৰাৰ উপায়ৰ বিষয়ে মানুহক সজাগতা কৰা হয় ।যুৱৰাজে ক্ৰীড়া-আধাৰিত ই-কমাৰ্চ দোকান sports365.in আৰম্ভ কৰি ব্যৱসায়ী হিচাপে জীৱনৰ দ্বিতীয় কেৰিয়াৰ আৰম্ভ কৰে। এই ৱেবছাইটটোৱে ক্ৰীড়া গিয়াৰ আৰু অন্যান্য ফিটনেছ সামগ্ৰী নিৰ্মাণ আৰু বিক্ৰী কৰে। লগতে যুৱৰাজ সিঙে আন বহুতো ষ্টাৰ্টআপত কৰিছে বিনিয়োগ। এনেকৈয়ে ভাৰতীয় ক্ৰিকেটাৰে ব্যৱসায়ৰ মাধ্যমেৰে উপাৰ্জন কৰিছে কোটি কোটি টকা। যিহেতু ভাৰতত ক্ৰিকেট সকলোতকৈ জনপ্ৰিয় খেল সেয়ে ক্ৰিকেটাৰসকলো সমানেই জনপ্ৰিয়। ফলস্বৰূপে ক্ৰিকেটাৰসকলে
ব্যৱসায় কৰিলে লোকচান হোৱাৰ সম্ভাৱনা কম।
