Investigative reporting with dedication.
এতিয়াৰে পৰা গ্ৰাম্যাঞ্চলত গৃহ নিৰ্মান কৰিলেও আদায় দিব লাগিব মাচুল ৷ গৃহ নিৰ্মানৰ বাবে পঞ্চায়ত আৰু গ্ৰামোন্নয়ন বিভাগৰ পৰা যাবতীয় অনুমতি ল’ব লাগিব ৷ লগতে গাঁও পঞ্চায়তক বিভিন্ন নথিৰ লগতে মাচুলো জমা দিব লাগিব ৷ মঙলবাৰে পঞ্চায়ত মন্ত্ৰী ৰঞ্জিত দাসে মুকলি কৰা “সেৱাই পঞ্চায়ত ” শীৰ্ষক আদৰ্শ নাগৰিক চনদত এই কথা স্পষ্টভাৱে উল্লেখ কৰা হৈছে ৷ এই চনদত উল্লেখ থকা অনুসৰি গৃহ নিৰ্মানৰ অনুমতি পাবলৈ হ’লে পঞ্চায়তক ঘৰৰ নক্সা , মালিকীস্বতৰ নথি আগতীয়াকৈ জমা দিব লাগিব ৷ তাৰ পাছত নিৰ্দিষ্ট মাচুলৰ বিপৰীতে পঞ্চায়তে গৃহ নিৰ্মানৰ যাবতীয় অনুমতি প্ৰদান কৰিব ৷ মাচুলৰ পৰিমান কিমান হ’ব , সেয়া পৰৱৰ্তী সময়ত জাননীযোগে সদৰী কৰিব পঞ্চায়ত আৰু গ্ৰামোন্নয়ন বিভাগে ৷ কেৱল গৃহ নিৰ্মানেই নহয় , ব্যৱসায়িক প্ৰতিষ্ঠান , ব্যৱসায়ৰ বাবে গৃহ আবন্টনৰ ক্ষেত্ৰতো অনুমতি লোৱাটো বাধ্যতামূলক ৷ ইয়াৰ বাহিৰেও গ্ৰাম্যাঞ্চলত ক্ষুদ্ৰ উদ্যোগ স্থাপনৰ বাবেও গাঁও পঞ্চায়তৰ আপত্তিবিহীনতাৰ প্ৰমানপত্ৰ লোৱাটো বাধ্যতামূলক ৷ গ্ৰামোন্নয়ন আৰু পঞ্চায়ত বিভাগৰ এই চনদ প্ৰকাশৰ লগে লগে অসমৰ গাঁৱে গাঁৱে তীব্ৰ প্ৰতিক্ৰিয়াৰ সৃষ্টি হৈছে ৷
