প্ৰধানমন্ত্ৰী নৰেন্দ্ৰ মোদীয়ে বৃহস্পতিবাৰে নয়দাৰ জেৱৰত এটা বিশাল বিমানবন্দৰৰ আধাৰশিলা স্থাপন কৰে ৷কিন্তু একেসময়তে ভাৰতীয় জনতা পাৰ্টীৰ কিছুসংখ্যক নেতাই এটা বিমানবন্দৰৰ ফটো শ্বেয়াৰ কৰি সেয়া জেৱৰ বিমান বন্দৰ বুলি অভিহিত কৰে ৷ কিন্তু ততালিকে সামাজিক মাধ্যম ব্যৱহাৰকাৰীৰ পৰা প্ৰত্যুত্তৰ আহে যে এই ফটোখন মিছা ৷ সমাজবাদী পাৰ্টীৰ নেতা অখিলেশ যাদৱেও টুইট কৰি এইদৰে প্ৰতিক্ৰিয়া ব্যক্ত কৰে –“বিজেপিৰ মিছা কথাৰ উদাহৰণ এয়া ৷ মিছা দাবী কৰা সকলৰ চিন্তা কিদৰে সঁচা হ’ব ৷’
আচলতে উত্তৰ প্ৰদেশৰ বিজেপি চৰকাৰৰ উপ মুখ্যমন্ত্ৰী কেশৱ প্ৰসাদ মৌৰ্যাই এটা বিমানবন্দৰৰ ফটো শ্বেয়াৰ কৰি লিখে যে এছিয়াৰ সৰ্ববৃহৎ এয়াৰপোৰ্টৰ ৰূপত নয়দা ইন্টাৰনেশ্যনেলত ৩৫ হাজাৰ কৌটি টকা বিনিয়োগ কৰা হৈছে ৷ ইয়াৰ জড়িয়তে এক লাখতকৈ অধিক লোকে ৰোজগাৰ লাভ কৰিব আৰু বিকাশো দ্ৰুত হ’ব ৷’ বিত্ত মন্ত্ৰী সুৰেশ খান্নাইও একেখন ফটো শ্বেয়াৰ কৰে ৷ কিন্তু টুইটাৰত কিছু সময়ৰ ভিতৰতে তেওলোকৰ ভুৱা প্ৰচাৰ ধৰা পৰে ৷ কাৰণ , যিখন ফটো তেওলোকে জেবৰ এয়াৰপোৰ্টৰ বুলি শ্বেয়াৰ কৰিছিল সেই ফটোখন আচলতে আছিল চীনৰ বেইজিঙৰ এটা বিমানবন্দৰৰ ৷
