বিৰোধীক কিদৰে প্ৰত্যুত্তৰ দিলে কেন্দ্ৰৰ ৮ মন্ত্ৰীয়ে ?

বিৰোধীৰ প্ৰতিবাদৰ বাবে আগতীয়াকৈ স্থগিত ৰখা হ’ল সংসদৰ বৰ্ষাকালীন অধিৱেশন ৷ সংসদৰ অন্তিম দিনটোত অৰ্থাৎ বুধবাৰে ৰাজ্যসভাত সংঘটিত ঘটনাৱলীক লৈ আজি ৰাজপথত প্ৰতিবাদত নামিল ১৫ বিৰোধী দলৰ নেতা ৷ বিৰোধীৰ অভিযোগ হ’ল – অন্তিম দিনা ৰাজ্যসভাত মাৰ্শ্বালে বিৰোধী সাংসদসকলক অপদস্থ কৰিছে ৷ ইয়াৰ পাছতে আজি কেন্দ্ৰৰ ৮ গৰাকী মন্ত্ৰীয়ে এখন সংবাদমেল সম্বোধন কৰি বিৰোধী দলসমূহক আক্ৰমণৰ লক্ষ্য কৰি লয় ৷ মন্ত্ৰীকেইগৰাকীয়ে সংবাদমেলত কয় যে সদনৰ সময় নষ্ট কৰিবলৈ বিৰোধী দলসমূহে আগতীয়ালৈ লক্ষ্য স্থিৰ কৰি লৈছিল ৷ সেইবাবেই আৰম্ভণিৰে পৰা অচলাৱস্থাৰ সৃষ্টি কৰি গ’ল ৷ কৃষি আইন , মূল্যবৃদ্ধি , ক’ৰোণা আদি বিষয়ৰ ওপৰত আলোচনা কৰিবলৈ চৰকাৰ সাজু আছিল কিন্তু বিৰোধী কেৱল পেগাছাছৰ বিষয়টোত অটল হৈ থাকিল ৷ মন্ত্ৰীসকলে লগতে  কয় যে  যি ছগৰাকী সাংসদক সদনৰ পৰা বহিষ্কাৰ কৰা হৈছে তেওলোকে আইনা ভাঙি সদনত প্ৰৱেশৰ চেষ্টা কৰিছিল ৷ যাৰ বাবে মহিলা মাৰ্শ্বাল আঘাতপ্ৰাপ্ত হ’বলগীয়া হৈছে ৷ ৯ আগষ্টৰ দিনা বিৰোধী সাংসদে টেবুলৰ ওপৰত থিয় হৈ হূলস্থূল কৰিছে আৰু সদনৰ ৰুল বুক ফালি দলিয়াইছে ৷ এয়াও এক আক্ৰমণ ৷ তদুপৰি বিৰোধীৰ মহিলা সাংসদে মহিলা মাৰ্শ্বালৰ লগত হতাহতি কৰাটো ভিডিও ফুটেজত স্পষ্টকৈ ওলাই পৰিছে ৷ বিৰোধীয়ে অভিযোগ কৰাৰ দৰে কোনো বাহিৰৰ সুৰক্ষাকৰ্মী সদনত প্ৰৱেশ কৰা নাছিল বুলিও সংবাদমেলত মন্ত্ৰীকেইগৰাকীয়ে উল্লেখ কৰে ৷ বৃহস্পতিবাৰৰ সংবাদমেলত উপস্থিত থকা মন্ত্ৰীকেইগৰাকী আছিল পীয়ূষ গোৱেল , প্ৰহ্লাদ যোশী , মুখতাৰ আকবা্ছ নকবী ,অৰ্জুন মেঘৱাল , ভূপেন্দ্ৰ যাদৱ ,অনুৰাগ ঠাকুৰ , বী মুৰলীধৰ আৰু  ধৰ্মেন্দ্ৰ প্ৰধান ৷