কোনে হাস্পতাল নিৰ্মানৰ নামত ২.৪০ কৌটি ব্ৰক্ষ্মপুত্ৰত পেলালে ?

বিধানসভাত কেগে দাখিল কৰা শেহতীয়া প্ৰতিবেদনত পোহৰলৈ আহিছে স্বাস্থ্যখণ্ডৰ বহু অনিয়মৰ তথ্য ৷ কেনেদৰে চিকিৎসালয় নিৰ্মানৰ নামত কৌটি কৌটি টকাৰ অপচয় কৰা হৈছে , সেয়া প্ৰতিবেদনৰ পাতে পাতে উন্মোচিত হৈছে ৷ আনকি ব্ৰক্ষ্মপুত্ৰৰ বুকুত জাহাজ হাস্পতাল নিৰ্মানৰ নামতো পানীত পেলোৱা হ’ল ২ কৌটি ৪০ লাখ টকা ৷ কেগৰ প্ৰতিবেদনত প্ৰকাশ পোৱা মতে , ২০০৯ চনত ভাৰত চৰকাৰৰ পুঁজিৰে অসমত নিৰ্মান কৰিবলৈ লোৱা হৈছিল এখন জাহাজ হাস্পতাল ৷ “ব্ৰক্ষ্মপুত্ৰৰ বুকুত জাহাজ অস্পতাল নিৰ্মান “ এই প্ৰকল্পটোৰ বাবে ধাৰ্য কৰা ধনৰ পৰিমান আছিল মুঠ ৪ কৌটি টকা ৷ কিন্তু ২ কৌটি ৪০ লাখ টকা ব্যয় কৰাৰ পাছত প্ৰকল্পটো বছৰ বছৰ ধৰি অসম্পূৰ্ণ ৰূপত পেলাই থৈ দিয়া হ’ল ৷ অৰ্থাৎ জাহাজ অস্পতাল নিৰ্মানৰ ধনো ব্ৰক্ষ্মপুত্ৰৰ পানীতে উটি গ’ল ৷ কেগে এই প্ৰকল্পটোক অসম্পূৰ্ণ আৰু অফলপ্ৰসূ বুলি অভিহিত কৰি ৰাজ্য চৰকাৰক ক্ষিপ্ৰগতিত সম্পূৰ্ণ কৰি তুলিবলৈ পৰামৰ্শ আগবঢ়াইছে ৷

কি আছিল জাহাজ হাস্পতাল নিৰ্মান প্ৰকল্প ?

২০০৯ চনত ভাৰত চৰকাৰৰ ড’নাৰ মন্ত্ৰালয়ে ব্ৰক্ষ্মপুত্ৰ নদীত জাহাজ হাস্পতাল নিৰ্মানৰ এক অভিলাষী প্ৰকল্পৰ বাবে মুঠ ৪ কৌটি টকাৰ অনুমোদন দিছিল ৷ ইয়াৰে জাহাজ নিৰ্মানৰ বাবে আগবঢ়োৱা হৈছিল ৩ কৌটি টকা আৰু অন্যান্য সা- সজুলি ক্ৰয়ৰ বাবে ১ কৌটি টকা ৷ এই প্ৰকল্প ৰূপায়নৰ দায়িত্ব লাভ কৰিছিল ‘চেন্টাৰ ফৰ নৰ্থ ইষ্ট ষ্টাডীজ এণ্ড পলিচী ৰিচাৰ্চ ‘ নামৰ এন জি অ’ টোৱে ৷ প্ৰকল্পটোৰ নাম দিয়া হৈছিল আশা ৷ ২০০৯ চনৰ নৱেম্বৰ মাহত ‘চেন্টাৰ ফৰ নৰ্থ ইষ্ট ষ্টাডীজ এণ্ড পলিচী ৰিচাৰ্চ ‘ ৰ লগত ভাৰত চৰকাৰৰ যাৱতীয় চুক্তি স্বাক্ষৰ কৰা হয় ৷ ইয়াৰ পাছত ড’নাৰ মন্ত্ৰালয়ে ২০০৯ চনত প্ৰথম কিস্তিত ৪০ লাখ টকা আৰু ২০১২ চনত দ্বিতীয় কিস্তিত ২.২০ কৌটি টকা মোকলাই দিয়ে ৷ ড’নাৰ মন্ত্ৰালয়ৰ নথিত এই কথা অতি স্পষ্টকৈ উল্লেখ আছে ৷

কি অৱস্থাত আছে জাহাজ হাস্পতাল ?

ভাৰত চৰকাৰৰ পৰা ‘চেন্টাৰ ফৰ নৰ্থ ইষ্ট ষ্টাডীজ এণ্ড পলিচী ৰিচাৰ্চ ‘য়ে মুঠ ২.৪০ কৌটি টকা লাভ কৰাৰ ৮ বছৰ পাৰ হৈ গ’ল ৷ কিন্তু ৮ বছৰ পাছতো জাহাজ হাস্পতাল নিৰ্মানৰ কাম আধও সম্পূৰ্ণ নহ’ল ৷ ২০১৮ চনত ভাৰত চৰকাৰে অসম্পূৰ্ণ অৱস্থাতে প্ৰকল্পটোৰ নিৰ্মান বন্ধ কৰি দিয়া বুলি ঘোষণা কৰিছে ৷ কেগে নিজৰ প্ৰতিবেদনত ইয়াৰ কাৰণ হিচাপে উল্লেখ কৰিছে যে যোগ্যতা নিৰ্ণয় নকৰাকৈ এটা এন জি অ’ক কামৰ দায়িত্ব  প্ৰদান কৰাৰ বাবেই প্ৰকল্পটো আধৰুৱা হৈ ৰ’ল ৷

এন জি অ’ত কোন কোন আছে ?

‘চেন্টাৰ ফৰ নৰ্থ ইষ্ট ষ্টাডীজ এণ্ড পলিচী ৰিচাৰ্চ ‘ নামৰ এন জি অ’টোৱে লাভ কৰিছিল ব্ৰক্ষ্মপুত্ৰত জাহাজ হাস্পতাল নিৰ্মানৰ দায়িত্ব ৷ এই এন জি অ’টোৰ মুখ্য ন্যাসৰক্ষী হ’ল সঞ্জয় হাজৰিকা ৷ তেও দেশৰ এগৰাকী প্ৰখ্যাত সাংবাদিক ৷ কেবাখনো গুৰুত্বপূৰ্ণ গ্ৰন্থৰ লেখক ৷ আন আন ন্যাসৰক্ষীসকল হ’ল – ভাৰত চৰকাৰৰ প্ৰাক্তণ গৃহ সচিব জি কে পিল্লাই , নাগালেণ্ডৰ সমাজকৰ্মী নিকেতু ইৰালু , মেঘালয়ৰ সাংবাদিক পেট্ৰিছিয়া মুখীম , কটন কলেজৰ প্ৰাক্তণ অধ্যাপিকা মেহফুজা ৰহমান , ৰাজ্যিক তথ্য আয়ুক্ত এইচ এছ দাস আৰু জুবানৰ প্ৰাক্তণ কনছাল্টিঙ এডিটৰ প্ৰীতি গীল ৷

কেগৰ পৰামৰ্শ কি ?

ব্ৰক্ষ্মপুত্ৰৰ বুকুত জাহাজ হাস্পতাল  নিৰ্মানৰ ধন যদিও ভাৰত চৰকাৰৰ ড’নাৰ মন্ত্ৰালয়ে প্ৰদান কৰিছিল , প্ৰকল্পটো নীৰিক্ষণ কৰাৰ দায়িত্বত আছিল অসম চৰকাৰ ৷ কিন্তু অসম চৰকাৰৰ অমনোযোগিতাৰ বাবেই আজিও প্ৰকল্পটো আধৰুৱা হৈ ৰ’ল ৷ সেয়ে কেগে পৰামৰ্শ আগবঢ়াইছে যে ভাৰত চৰকাৰৰ নিৰ্দেশাৱলী ৰক্ষা কৰি অসম চৰকাৰে ক্ষিপ্ৰ গতিত প্ৰকল্পটোৰ ৰূপায়ন সম্পূৰ্ণ কৰিব লাগে ৷

আমাৰ প্ৰশ্ন –

• দেশৰ প্ৰখ্যাত সাংবাদিক , আমোলাৰ নাম জড়িত হৈ থকা বাবেই যোগ্যতা নিৰূপণ নকৰাকৈ এটা এন জি অ’ক অভিলাষী প্ৰকল্প ৰূপায়নৰ দায়িত্ব দিয়া হৈছিল নেকি ?
• নিজৰ প্ৰভাৱ আৰু ক্ষমতাৰ সুবিধা লৈ এন জি অ’টোৱে প্ৰকল্পৰ ধন আত্মসাৎ কৰাৰ অভিষন্ধি ৰচনা কৰিছিল নেকি ?
• কিয় অসম চৰকাৰে প্ৰকল্পটোৰ ৰূপায়নৰ কাম সঠিকভাৱে নীৰিক্ষণ নকৰিলে ?
• ২.৪০ কৌটি টকা পানীত পেলোৱা ‘চেন্টাৰ ফৰ নৰ্থ ইষ্ট ষ্টাডীজ এণ্ড পলিচী ৰিচাৰ্চ ‘ৰ বিৰুদ্ধে কি ব্যৱস্থা গ্ৰহণ কৰা হ’ব ?