আফগানিস্তানৰ পৰা ভাৰতক দু:শ্চিন্তাত পেলোৱা কি খবৰ আহিছে ?

ভাৰতক দু:শ্চিন্তাত পেলাই কাবুললৈ শিপা বিয়পাইছে আল –কায়দা আৰু পাকিস্তানৰ হক্কানি নেটৱৰ্কে ৷ খবৰ দিছে চোৰাংছোৱা সংস্থাই ৷ ২০ বছৰ পাছত তালিবান শাসনলৈ ঘূৰি অহাৰ পাছত এইটোৱে অৱধাৰিত ঘটনা আছিল ৷ যিয়ে ভাৰতৰ ৰক্তচাপ বঢ়াই তুলিছে ৷
কেন্দ্ৰীয় মন্ত্ৰীসভাৰ নিৰাপত্তা সংক্ৰান্তীয় সমিতিৰ বৈঠক বিগত দিদিন ধৰি অনুষ্ঠিত হৈছে ৷আফগানিস্তানৰ জংগী সংগঠনৰ সক্ৰিয়তা সন্দৰ্ভত সকলো তথ্য এই বৈঠকত দাঙি ধৰিছে ভাৰতীয় ৰাষ্ট্ৰদূত ৰুদ্ৰেন্দ্ৰ টেণ্ডনে ৷
চোৰাংছোৱাৰ খবৰ অনুসৰি , আফগানিস্তানৰ পৰা আমেৰিকান সেনা প্ৰত্যাহাৰৰ বিষয়টো আলোচনা হোৱাৰ লগে লগে লস্কৰ –ই-তৈবাৰ লগত তালিবানৰ আদান – প্ৰদান আৰম্ভ হয় ৷পাকিস্তানৰ হক্কানি নেটৱৰ্কো সক্ৰিয় হৈ উঠছে দেশখনত ৷ এই ঘটনাবোৰ এদিনতে সংঘটিত হোৱা নাই ৷ কাবুলত এনে সংগঠনৰ উপস্থিতি দেখা নগ’লেও কান্দাহাৰ , জালালাবাদ , হেৰাট আদি প্ৰদেশত তেওলোক সক্ৰিয় হৈয়ে আছিল ৷ এতিয়া ঘানি চৰকাৰৰ পতনৰ পাছত কাবুলতো এনে জংগী সংগঠনৰ প্ৰভাৱ স্পষ্ট হৈ পৰিব ৷
এই বিষয়টো ভাৰতৰ আভ্যন্তৰীণ নিৰাপত্তাৰ সৈতে জড়িত ৷ ভাৰতৰ নিৰাপত্তা সংস্থাসমুহৰ ধাৰণা যে সন্ত্ৰাসবাদী সংগঠনসমূহে কিছুদিন পাছৰে পৰা আফগানিস্তানক ‘লন্স পেড’ হিচাপে ব্যাৱহাৰ কৰিবলৈ ল’ব ৷ ইয়াৰ ফলত সীমান্তৰ সিপাৰৰ পৰা জন্মু- কাশ্মীৰৰ ওপৰত হোৱা আক্ৰমণ বৃদ্ধিৰ সম্ভাৱণা আছে ৷