চাপত বেইজিঙ : দক্ষিণ চীন সাগৰত ভাৰতৰ যুদ্ধজাহাজ

বিগত এবছৰ ধৰি ভাৰত – চীনৰ মাজত অব্যাহত আছে সীমাকেন্দ্ৰিক বিবাদ৷ তাৰ মাজতে এইবাৰ বেইজিঙক চাপত ৰখাৰ বাবে আন এক কৌশল হাতত লৈছে নতুন দিল্লীয়ে ৷ এই কৌশল অনুসৰি ভাৰতীয় নৌ-সেনাৰ ইষ্টাৰ্ণ ফ্লিটৰ টাস্ক ফোৰ্চক দক্ষিণ পূৱ এছিয়াৰ দক্ষিণ চীন সাগৰ আৰু প্ৰশান্ত মহাসাগৰীয় এলেকালৈ প্ৰেৰণ কৰা হৈছে ৷ আগষ্ট মাহৰ পৰাই অঞ্চলটোত একাধিক ভাৰতীয় যুদ্ধ জাহাজ মোতায়ন কৰা হৈছে ৷ ভাৰতীয় নৌ –সেনাই এক বিবৃতিত প্ৰকাশ কৰিছে যে এক্ট ইষ্ট পলিচী অনুসৰি একাধিক যুদ্ধ জাহাজ আৰু চাব মেৰিন প্ৰশান্ত মহাসাগৰীয় অঞ্চলত মোতায়ন কৰা হৈছে ৷ এই যুদ্ধ জাহাজৰ ভিতৰত আছে মিছাইল ডেষ্ট্ৰয়াৰ ৰণবিজয় , মিছাইল ফ্ৰিগেট শিবালিক আদিৰ লগতে আন কেবাখনো চাবমেৰিন ৷ অহা দুমাহলৈ উক্ত অঞ্চলত পহৰাৰ দায়িত্বত নিয়োজিত হৈ থাকিব এই যুদ্ধ জাহাজসমূহ ৷

যুটীয়া অনুশীলনৰ প্ৰস্তুতি:

ৰয়েল মালয়েছিয়ান নেভী , ভিয়েটনামৰ নৌ-সেনা , ছিংগাপুৰৰ নৌ –সেনা (ছিম্বেক্স) , ইন্দোনেছিয়াৰ নৌ-সেনা(সমুদ্ৰ শক্তি) আৰু অষ্ট্ৰেলিয়াৰ নৌ-সেনা (অছ-ইনডেক্স)ৰ সৈতে এক যুটীয়া অনুশীলনত অংশগ্ৰহণ কৰিব ভাৰতৰ নৌ-সেনাই ৷একেসময়তে জাপান , অষ্ট্ৰেলিয়া , মাৰ্কিন যুক্তৰাষ্ট্ৰৰ সৈতে প্ৰশান্ত মহাসগৰীয় অঞ্চলত মালাবাৰ -২১ নামেৰে এক যুটীয়া অনুশীলনৰ আয়োজনৰ কথাও চিন্তা কৰি আছে ভাৰতে ৷

জলযুদ্ধৰ আখৰা নেকি ?

ভাৰত – প্ৰশান্ত মহাসাগৰীয় অঞ্চলত বাৰম্বাৰ আধিপত্য বিস্তাৰৰ চেষ্টা চলাই আহিছে চীনে ৷ বিশেষকৈ দক্ষিণ চীন সাগৰত বিগত কেবাবছৰ ধৰি সামৰিক আন্ত:গাথঁনি নিৰ্মানৰ কাম কৰি আহিছে বেইজিঙে৷ সমগ্ৰ সাগৰীয় জলৰাশি নিজৰ বুলি দাবী কৰে চীনে ৷ আমেৰিকাইও উক্ত আঞ্চলত আণবিক শক্তি চালিত  যুদ্ধবিমানবাহী জাহাজ প্ৰেৰণ কৰি শক্তি প্ৰদৰ্শন কৰিছে ৷ ড্ৰেগনৰ দেশৰ সাগৰীয় আগ্ৰাসন যিকোনো মূল্যৰ বিনিময়ত প্ৰতিহত কৰিব বিচাৰে আমেৰিকাই ৷ প্ৰতিক্ৰিয়া হিচাপে জিনপিং চৰকাৰে কেৱল দক্ষিণ চীন সাগৰ নহয় , ভাৰত –প্ৰশান্ত মহাসাগৰীয় অঞ্চলতো কৰ্তৃত্ব স্থাপনৰ চেষ্টা চলাই আহিছে ৷ ইয়াৰ বাবে কেতিয়াবা জাপান , কেতিয়াবা আমেৰিকা , কেতিয়াবা ফিলিপাইনছৰ লগতো সংঘাতত লিপ্ত হৈছে বেইজিঙ ৷ তাৰ মাজতে চীনক চাপত ৰখাৰ নতুন কৌশল লৈছে ভাৰতে ৷ এয়া যুদ্ধৰ আগজাননী নহ’লেও , একপ্ৰকাৰ কূটনৈতিক ৰণনীতি বুলি নিশ্চয় অভিহিত কৰিব পাৰি ৷