এইবাৰ তৃণমূল কংগ্ৰেছত যোগদান কৰিব নেকি গান্ধী পৰিয়ালৰ সদস্যই ? এই লৈ দিল্লী আৰু কলকাতাত ব্যাপক চৰ্চা আৰম্ভ হৈছে ৷
অহা সপ্তাহত দিল্লী ভ্ৰমণ কৰিব তৃণমূল কংগ্ৰেছৰ নেত্ৰী তথা পশ্চিমবংগৰ মুখ্যমন্ত্ৰী মমতা বেনাৰ্জীয়ে ৷ মমতা বেনাৰ্জীৰ এই ভ্ৰমনক লৈ ৰাজনৈতিক মহলত এতিয়াৰে পৰা ব্যাপক চৰ্চা আৰম্ভ হৈছে ৷ চৰ্চা চলিছে যে সাংসদ বৰুণ গান্ধী আৰু বিজেপি নেতৃত্বৰ সম্পৰ্ক তিক্ততাপূৰ্ণ হৈ পৰিছে ৷ বৰুণ গান্ধী আৰু তেওৰ মাতৃ মেনকা গান্ধীক বিজেপিৰ ৰাষ্ট্ৰীয় কাৰ্যনিৰ্বাহকৰ পৰাও বাহিৰত ৰখা হৈছে ৷ তাৰ পাছৰে পৰা বিজেপি চৰকাৰৰ বিৰুদ্ধে পৰোক্ষভাৱে আক্ৰমনাত্মক হৈ আহিছে বৰুণ গান্ধী ৷ বিজেপিৰ ওপৰত অসন্তুষ্ট হ’লেও তেওৰ বাবে কংগ্ৰেছত যোগদান কৰাটোও এক আত্মসন্মানৰ প্ৰশ্ন ৷ এনে পৰিস্থিতিত বৰুণ গান্ধীয়ে বিকল্প ৰাজনৈতিক মঞ্চ হিচাপে তৃণমূল কংগ্ৰেছক বাছি ল’লেও আচৰিত হ’বলগীয়া একো নাই ৷ বৰুণ গান্ধীৰ লগতে উত্তৰ প্ৰদেশৰ বি এছ পি নেতা দানিছ আলিৰো তৃণমূল নেতৃত্বৰে আলোচনা চলি থকা বুলি খবৰ ওলাইছে ৷
