অখিলক লৈ তৃণমূলৰ কি বিশেষ পৰিকল্পনা : ‘আনন্দ বজাৰ পত্ৰিকা’ত সবিশেষ খবৰ

শিৱসাগৰৰ বিধায়ক তথা ৰাইজৰ দলৰ সভাপতি অখিল গগৈ আৰু তৃণমূল কংগ্ৰেছৰ মুৰব্বী মমতা বেনাৰ্জীৰ দুলানি বৈঠক সন্দৰ্ভত ৰাজ্যৰ ৰাজনীতিত ব্যাপক চৰ্চা চলিছে ৷ অখিল গগৈয়ে দুবাৰকৈ কলকাতালৈ গৈ তৃণমূলৰ নেতৃত্বৰে আলোচনাত মিলিত হোৱাৰ কথা ইতিমধ্যে স্বীকাৰ কৰিছে ৷ তেও আনকি এইবুলিও কৈছে যে মমতা বেনাৰ্জীৰ তৰফৰ পৰা তেওক অসমৰ তৃণমূল কংগ্ৰেছৰ দায়িত্ব লোৱাৰ প্ৰস্তাৱ দিয়া হৈছে ৷ এনে  ব্যাপক আলোচনা , জল্পনা – কল্পনাৰ মাজতে অখিল গগৈ আৰু তৃণমূলৰ বৈঠক সন্দৰ্ভত “আনন্দ বজাৰ পত্ৰিকা”ত প্ৰকাশ পাইছে এক ডাঙৰ খবৰ ৷ পশ্চিমবংগৰ সৰ্বাধিক প্ৰচলিত কাকতখনত প্ৰকাশিত বাতৰি অনুসৰি , তৃণমূল কংগ্ৰেছে উত্তৰ পূৰ্বাঞ্চলৰ বিজেপি শাসিত অঞ্চলসমূহত সংগঠন বিস্তাৰৰ কাম আৰম্ভ কৰিছে ৷ ত্ৰিপুৰাৰ পাছত এইবাৰ দলটোৱে চকু দিছে অসমত ৷ অসমত শিৱসাগৰৰ বিধায়ক অখিল গগৈক লৈ তৃণমূলে প্ৰস্তুত কৰিছে কেতবোৰ বিশেষ পৰিকল্পনা ৷কিন্তু কি এই পৰিকল্পনা ?

আনন্দ বজাৰ পত্ৰিকাৰ বাতৰি অনুসৰি অসমৰ কা বিৰোধী নেতাক দলত যোগদান কৰাব বিচাৰিছে তৃণমূল কংগ্ৰেছে ৷ সেই সূত্ৰে তৃণমূলৰ শীৰ্ষ নেতৃত্বই প্ৰস্তাব প্ৰেৰণ কৰিছে ৰাইজৰ দলৰ নেতা তথা শিৱসাগৰৰ বিধায়ক অখিল গগৈলৈ ৷ কেৱল প্ৰস্তাবতেই এয়া সীমাবদ্ধ হৈ ৰোৱা নাই ৷ ৰাইজৰ দলৰ প্ৰতিনিধিয়ে তৃণমূলৰ কালীঘাটত থকা কাৰ্যালয়লৈ গৈ দুবাৰকৈ  আলোচনাত মিলিত হৈছে ৷সেই বৈঠকত প্ৰথমতে অখিল গগৈক পোনপটীয়াকৈ তৃণমূল কংগ্ৰেছত যোগদান কৰাৰ প্ৰস্তাব দিয়া হৈছে ৷ সেয়া যদি সম্ভৱ নহয় , বিকল্প পথো সাজু কৰি ৰখা হৈছে ৷ বিকল্প পৰিকল্পনা অনুসৰি , যদিহে অখিল গগৈয়ে নিজে তৃণমূলত যোগদান নকৰে তেনেহ’লে অসমত জোটবন্ধনৰ মাধ্যমেৰে নিৰ্বাচনত অৱতীৰ্ণ ওৱাৰ প্ৰস্তাৱ দিয়া হৈছে ৷ ‘আনন্দ বজাৰ পত্ৰিকা’ৰ বাতৰিটোত লগতে কোৱা হৈছে যে অসমৰ ৰাজনীতিত অখিল গগৈ এটা পৰিচিত নাম ৷ যোৱা দুটা  দশক ধৰি অখিল গগৈ সমাজকৰ্মী হিচাপে সক্ৰিয় ৷ ‘ইণ্ডিয়া এগেইনষ্ট কৰাপছন”ৰ মাধ্যমেৰে তেও অসমত দুৰ্নীতি বিৰোধী ব্যাপক আন্দোলন গঢ়ি তুলিছিল ৷কৃষকসকলৰ দাবী সন্মুখত লৈ তেও কৃষক মুক্তি সংগ্ৰাম সমিতিৰ জড়িয়তেও সৰৱ ভূমিকা লৈ আহিছে ৷ইয়াৰ বাহিৰেও তথ্য জনাৰ অধিকাৰ কৰ্মী হিচাপেও তেও উল্লেখযোগ্য কাম কৰিছে ৷

অসমৰ ৰাজনীতিত অখিল গগৈৰ আত্মপ্ৰকাশ ‘কা’ বিৰোধী আন্দোলনৰ মাধ্যমেৰে ৷ আন্দোলনৰ নেতৃত্ব দি অখিল গগৈয়ে কাৰাবাসো খাটিবলগীয়া হৈছিল ৷ ২০২১ চনৰ নিৰ্বাচনত অসমৰ বহুকেইটা সমষ্টিত অখিল গগৈয়ে প্ৰাৰ্থী প্ৰক্ষেপ কৰিছিল ৷ শিৱসাগৰ সমষ্টিৰ পৰা তেও নিজে বিজয়ী হৈ আহিলেও আন কোনো সমষ্টিতে জয়লাভ কৰিবলৈ সক্ষম নহ’ল ৷ এনে পৰিস্থিতিত অসমৰ এজন জনপ্ৰিয় নেতাক দলত যোগদান কৰাব বিচাৰিছে তৃণমূল কংগ্ৰেছে ৷ ২০২৪ ৰ নিৰ্বাচনৰ আগে আগে অসমত শক্তিশালী সংগঠন গঢ়ি তোলাই তৃণমূল কংগ্ৰেছৰ মূল লক্ষ্য ৷

‘আনন্দ বজাৰ পত্ৰিকা’ৰ বাতৰিটোত এইদৰেও উল্লেখ কৰা হৈছে যে নাগৰিকত্ব সংশোধনী বিধেয়ক সংসদত উত্থাপন হোৱাৰ আগৰে পৰা তৃণমূল কংগ্ৰেছে এই বিধেয়কৰ বিৰোধিতা কৰি আহিছে ৷ তৃণমূলৰ শীৰ্ষ নেতৃত্বই আশা কৰে যে তেওলোকৰ এই ‘কা’ বিৰোধী অৱস্থান অসমৰ ৰাজনীতিত সহায়ক হ’ব ৷ তদুপৰি অখিল গগৈৰ দৰে সংগঠক পালে তৃণমূল কংগ্ৰেছৰ সংগঠন বিস্তাৰতো অধিক সুবিধা হ’ব ৷

এই মুহূৰ্তত অখিল গগৈ কেন্দ্ৰিক সকলোবোৰ কথা পৰিকল্পনাৰ পৰ্যায়তে আছে ৷ এই পৰিকল্পনা কিমানদূৰ সফল হয় , তাৰ বাবে আৰু কিছু দিন বাট চাব লাগিব ৷