Investigative reporting with dedication.
মহামাৰী কৰোনাৰ প্ৰভাৱ সমগ্ৰ বিশ্বতে স্পষ্ট হৈ পৰিছে ৷ মহামাৰীৰ সময়ত কৌটি কৌটি লোকে জীৱন জীৱিকা হেৰুৱাবলগীয়া হোৱাই নহয় , ব্যাপক খাদ্য সংকটৰো সন্মুখীন হৈছে ৷ ৰাষ্ট্ৰসংঘৰ ‘দ্য ষ্টেট অৱ ফুড চিকিউৰিটী এণ্ড নিউট্ৰিশ্যন ইন দ্য ৱৰ্ল্ড ২০২২’ শীৰ্ষক প্ৰতিবেদনত প্ৰকাশ পাইছে বিশ্বজুৰি ভোকাতুৰ মানুহৰ সংখ্যা বৃদ্ধি পোৱা সন্দৰ্ভত বহু উদ্বেগজনক তথ্য ৷
২০১৯ চনত সমগ্ৰ বিশ্বৰ ৬১.৮ কৌটি লোক ভোকৰ সন্মুখীন হৈছিল ৷ ২০২১ চনত এই সংখ্যা ৭৬.৮ কৌটিলৈ বৃদ্ধি পালে ৷ অৰ্থাৎ মাত্ৰ দুটা বছৰৰ ব্যৱধানত ভোকাতুৰ মানুহৰ সংখ্যা বৃদ্ধি পাইছে ১৫ কৌটি ৷ দুটা বছৰত ভোকাতুৰ মানুহৰ সংখ্যা ২৪.৩ শতাংশ বৃদ্ধি পোৱাটো নিশ্চয় বিশ্বৰ বাবেই অশনি সংকেত ৷ বিগত ১৫ বছৰ ধৰি ভোকাতুৰ মানুহৰ সংখ্যা বৃদ্ধি পাই আহিছে যদিও শেহতীয়া দুটা বছৰত এই সংখ্যা অতি দ্ৰুতগতিত বাঢ়িছে ৷
ৰাষ্ট্ৰসংঘৰ একেখন প্ৰতিবেদনত উল্লেখ পোৱা তথ্য অনুসৰি , ২০২১ চনত ভাৰতৰ পৰিপুষ্টিহীনতাত ভোগা লোকৰ সংখ্যা ২২.৪ কৌটি ৷ ২০০৪-০৬ চনত এই সংখ্যা আছিল ২৪ কৌটি ৷ ভোকাতুৰ মানুহৰ সংখ্যা হ্ৰাস পোৱাৰ ক্ষেত্ৰত ভাৰতৰ স্থিতি সামান্য উন্নত হৈছে যদিও এতিয়াও ২২.৪ কৌটি লোকে দুবেলা দুসাজ খাবলৈ নোপোৱা বা খাদ্যত ৫০ শতাংশও পুষ্টি নোপোৱাটো উদ্বেগৰ বিষয় ৷
ৰাষ্ট্ৰসংঘৰ প্ৰতিবেদন অনুসৰি , ২০২১ চনত ভাৰতত পুষ্টিসন্মত খাদ্য খাবলৈ এদিনত ২৩৫ টকা ব্যয় হয় ৷ আন আন চুবুৰীয়া দেশতকৈ এই দৰ কম ৷ এদিনত পুষ্টিসন্মত খাদ্য খাবৰ বাবে পাকিস্তানত ২৯১ টকা , শ্ৰীলংকাত ৩১০ টকা , বাংলাদেশত ২৪২ টকা , ভূটানত ৩৯৮ টকা আৰু নেপালত ৩৪৫ টকা ব্যয় হয় ৷ ইয়াৰ প্ৰভাৱ দেখা যায় ভোকৰ দ্বাৰা প্ৰভাৱিত জনসংখ্যাৰ ক্ষেত্ৰতো ৷ ভাৰতৰ ১৬.৩ শতাংশ , বাংলাদেশৰ ১৮.৮ শতাংশ , পাকিস্তানৰ ৩৭.২ শতাংশ জনসংখ্যা ভোকৰ দ্বাৰা প্ৰভাৱিত ৷
ভাৰতত এহাতে যদি ভোকাতুৰ মানুহৰ সংখ্যা বৃদ্ধি পাইছে , আনহাতে মেদবহুলতাত ভোগা ;লোকৰ সংখ্যাও বৃদ্ধি পাইছে ৷ ভাৰতৰ ১৫ ৰ পৰা ৪৯ বছৰ বয়সৰ ভিতৰৰ ৩.৪ কৌটি লোক ‘অভাৰৱেট’ কেটেগ’ৰীত আছে ৷ ৪ বছৰ পূৰ্বে ভাৰতৰ অভাৰৱেট জনসংখ্যা আছিল ২.৫ কৌটি ৷ আনহাতে , এনিমিয়াত আক্ৰান্ত মহিলাৰ সংখ্যাও বিগত দুটা বছৰত বৃদ্ধি পাইছে ৷ ২০১৯ চনত ভাৰতৰ এনিমিয়াত আক্ৰান্ত মহিলাৰ সংখ্যা আছিল ১৭.২ কৌটি ৷ ২০২১ ত এনিমিয়াত ভোগা মহিলাৰ সংখ্যা বৃদ্ধি পালে ১৮.৭ কৌটিলৈ ৷
