পেগাছাছ : এয়া অতি গুৰুতৰ অভিযোগ বুলি কিয় ক’লে উচ্চতম ন্যায়ালয়ে ?

পেগাছাছ ছফটৱেৰৰ চোৰাংছোৱাগিৰি সন্দৰ্ভত শুনানি গ্ৰহণ কৰি আজি উচ্চতম ন্যায়ালয়ৰ মুখ্য ন্যায়াধীশৰ বিচাৰপীঠে কয় যে যদিহে সংবাদ মাধ্যমত প্ৰকাশিত বাতৰি সঁচা হয় , তেনেহ’লে এয়া অতি গুৰুতৰ অভিযোগ  ৷ কিন্তু আজিয়েই ন্যায়ালয়ে চৰকাৰলৈ জাননী প্ৰেৰণ কৰিবলৈ অস্বীকাৰ কৰে আৰু পৰৱৰ্তী শুনানিৰ দিন অহা মঙলবাৰ ধাৰ্য কৰে ৷ লগতে বিচাৰপীঠে আবেদনকাৰীৰ আবেদনৰ এটা প্ৰতিলিপি চৰকাৰলৈও প্ৰেৰণ কৰিবলৈ কয় ৷ উল্লেখ্য যে মুখ্য ন্যায়াধীশ এন ভি ৰমনা আৰু ন্যায়াধীশ সূৰ্যকান্তৰ বিচাৰপীঠে আজি পেগাছাছ কাণ্ডৰ তদন্ত বিচাৰি কৰা আবেদনৰ শুনানি গ্ৰহণ কৰে ৷ ন্যায়ালয়ত জ্যেষ্ঠ সাংবাদিক এন ৰাম , শশী কুমাৰ , ৰুপেশ সিংহ , পৰাঞ্জয় গুহ ঠাকুৰতাকে ধৰি কেবাগৰাকীও বিশিষ্ট নাগৰিক আৰু এডিটৰছ গীল্ড অৱ ইণ্ডিয়াই পেগাছাছ চোৰাংছোৱাগিৰিৰ সঠিক অদন্ত বিচাৰি আবেদন দাখিল কৰিছিল ৷

কি ক’লে কপিল ছিব্বালে ?

জ্যেষ্ঠ অধিবক্তা কপিল ছিব্বালে উচ্চতম ন্যায়ালয়ত আজি কয় যে পেগাছাছ ছফটৱেৰ কেৱল চৰকাৰেহে ক্ৰয় কৰিব পাৰে ৷ এটা ছফটৱেৰৰ মূল্য হৈছে ৫৫ হাজাৰ ডলাৰ ৷ গতিকে পেগাছাছ ছফটৱেৰ ক্ৰয়ৰ নামত চৰকাৰে কিমান ধন ব্যয় কৰিছে , সেয়া সকলোৱে জনা উচিত ৷ তেও লগতে এইবুলিও কয় যে চৰকাৰে পেগাছাছৰ জড়িয়তে চোৰাংছোৱাগিৰি কৰাৰ কথা এতিয়ালৈকে অস্বীকাৰ কৰা নাই ৷এয়া নাগৰিকৰ ব্যক্তি স্বাধীনতাৰ বিষয় ৷ এি গুৰুত্বপূৰ্ণ বিষয়টোত চৰকাৰ কিয় নীৰৱ বুলিও তেও প্ৰশ্ন কৰে ৷

কি ক’লে শ্যাম দীবানে ?

আবেদনকাৰীৰ আন এজন অধিবক্তা শয়াম দীবানে ন্যায়ালয়ৰ মজিয়াত কয় যে এয়া ছোছিয়েল মেডিয়াত চৰ্চা হোৱা বিষয় নহয় ৷ ফ্ৰান্স আৰু আমেৰিকাৰ চৰকাৰে এই বিষয়টোক লৈ ইজৰাইলক সকীয়ণি দিছে ৷গতিকে ভাৰত  চৰকাৰে ইয়াৰ নিজাববীয়া তদন্ত কৰা উচিত ৷