সংবাদমাধ্যমৰ ভূমিকাক লৈ মুখ্য ন্যায়াধীশৰ ইমান আক্ষেপ কিয় ?

অৰূপ কলিতা

অপ্ৰত্যাশিতভাৱে মেডিয়াৰ কেনভাছৰ পৰা অনুসন্ধানমূলক সাংবাদিকতাৰ ধাৰণা অদৃশ্য হৈ পৰিছে ৷- এইদৰে আক্ষেপ কৰিছে দেশৰ সৰ্বোচ্চ ন্যায়ালয়ৰ মুখ্য ন্যায়াধীশ এন ভি ৰমানাই ৷ এখন গ্ৰন্থ উন্মোচনী সভাত ভাগ লৈ বৃহস্পতিবাৰে উচ্চতম ন্যায়ালয়ৰ মুখ্য ন্যায়াধীশগৰাকীয়ে কয় যে অতীতত আমি বাতৰিকাকতত দুৰ্নীতি – কেলেংকাৰি – অনিয়ম আদিৰ বাতৰি পঢ়িবলৈ পাইছিলো ৷ যাৰ গুৰুত্বপূৰ্ণ প্ৰভাৱ বা পৰিণাম আছিল ৷ কিন্তু শেহতীয়া কেইটামান বছৰত এটা বা দুটা বাদ দি আন কোনো বিশেষ উল্লেখযোগ্য বাতৰি চকুত পৰা নাই ৷ সকলোতে যেন ভালেই চলি আছে ৷ মুখ্য ন্যায়াধীশগৰাকীয়ে সাম্প্ৰতিক ভাৰতীয় সাংবাদিকতাৰ স্বৰূপ উললব্ধি কৰিয়েই নিশ্চয় এইদৰে আক্ষেপ কৰিবলগীয়া হৈছে ৷ সাংবাদিকে বাগিচাৰ চৌপাশে কেৱল গোলাপেই ফুলি থকা দেখিছে ৷ অনুসন্ধানমূলক সাংবাদিকতা অদৃশ্য হৈ পৰিছে ৷ ভাৰতীয় সংবাদ মাধ্যমৰ ক্ষেত্ৰত এই কথা বিশেষভাৱে সঁচা বুলি মন্তব্য কৰে মুখ্য ন্যায়াধীশ এন ভি ৰমানাই ৷ মুখ্য ন্যায়াধীশ এন ভি ৰমানাই নিজৰ কেৰিয়াৰ আৰম্ভ কৰিছিল “ইয়েনাডু” নামৰ এখন কাকতত সাংবাদিকতা কৰি ৷ সেয়া কেবা দশক আগৰ কথা ৷ কালক্ৰমত এন ভি ৰমানা দেশৰ মুখ্য ন্যায়াধীশৰ আসনত বহিল ৷ ভাৰতীয় সংবাদ মাধ্যমো অত্যাধুনিক প্ৰযুক্তিৰ পয়োভৰত জাকজমক হৈ পৰিল ৷ কিন্তু তাৰ মাজত সংবাদ জগতৰ পৰা যদি কিবা নোহোৱা হৈ গ’ল – সেয়া হৈছে অনুসন্ধান ৷ চৰকাৰী বিবৃতি , নেতাৰ শ্ৰুতলিপি এতিয়া খবৰৰ প্ৰধান উৎস ৷ সেয়া কোনে , কিমান ৰঙচঙীয়া কৰি প্ৰচাৰ কৰিব পাৰে , তাৰেই অঘোষিত প্ৰতিযোগিতা ৷কিন্তু অনুসন্ধানৰ ক্ষেত্ৰত আৰোপ কৰা হৈছে প্ৰতিবন্ধকতা ৷কোনো কথাৰ অনুসন্ধান নচলিব ৷ প্ৰধানমন্ত্ৰী , মুখ্যমন্ত্ৰী , মন্ত্ৰীয়ে কৈ থকা কথাবোৰেই সঁচা ৷ তাৰ কোনো সত্যাসত্য নিৰূপন নচলিব ৷ এয়া হৈছে ভাৰতীয় সাংবাদিকতাৰ আজিৰ দিনটোৰ নিৰ্মম সত্য ৷ যি কথা মুকলিকৈ কৈ গ’ল দেশৰ মুখ্য ন্যায়াধীশগৰাকীয়ে ৷

ভাৰতীয় সংবাদ মাধ্যমৰ এনে স্খলন আৰু পতনৰ মাজত ভবা হৈছিল যে অসমীয়া সংবাদ মাধ্যমে অন্তত: এতিয়াও শাসকৰ ওচৰত শিৰণত কৰা নাই ৷ জাতিৰ সংকটৰ সময়ত অসমীয়া সংবাদ মাধ্যম সদায় জনতাৰ পক্ষত থাকিব ৷ দুৰ্নীতিগ্ৰস্থ ৰাজনীতিকৰ মুখা খুলি দিয়াত কেতিয়াও ইতস্তত: নকৰিব ৷ কিন্তু আমাৰ এই সহজ – সৰল ধাৰণা ভুল প্ৰমানিত কৰিলে খোদ অসমৰ প্ৰতিটো সংবাদ গোষ্ঠীয়ে ৷ যোৱা ৯ ডিচেম্বৰৰ দিনটোত অসমীয়া জাতি এক নোহোৱা নোপোজা ঘটনাৰ সাক্ষী হৈ ৰ’ল ৷ অসমীয়া মূলসুঁতিৰ সংবাদ মাধ্যমৰ লজ্জাজনক আত্মসমৰ্পনৰ দৃশ্যই ব্যথিত কৰি তুলিলে স্বতন্ত্ৰ সংবাদ মাধ্যমত বিশ্বাসী , গণতন্ত্ৰত বিশ্বাসী প্ৰতিগৰাকী নাগৰিকক ৷ ঘটনাটো আপোনাৰ নিশ্চয় মনত আছে ৷ আমি দ্য ক্ৰছকাৰেন্ট আৰু দ্য ৱায়াৰে ৮ ডিচেম্বৰত প্ৰকাশ কৰিছিলো এক অনুসন্ধানমূলক প্ৰতিবেদন ৷ য’ত উল্লেখ কৰা হৈছিল মুখ্যমন্ত্ৰী ড: হিমন্ত বিশ্ব শৰ্মাৰ পত্নীৰ কোম্পেনীৰ এক বৃহৎ ভূমি কেলেংকাৰিৰ বিষয়ে ৷ মুখ্যমন্ত্ৰীৰ পত্নীৰ কোম্পেনীয়ে কিদৰে নীতি নিয়ম উলংঘা কৰি চৰকাৰী আৰু চিলিঙ চৰকাৰী ভূমি ক্ৰয় কৰিছিল , সেয়া পোহৰলৈ আহিছিল দ্য ক্ৰছকাৰেন্ট আৰু দ্য ৱায়াৰৰ তিনিমাহযোৰা অনুসন্ধানত ৷ সেই প্ৰতিবেদনৰ ভিত্তিতেই অসমৰ তিনিটা প্ৰধান বিৰোধী ৰাজনৈতিক দলে সংবাদমেল সম্বোধন কৰি এই কেলেংকাৰিৰ তদন্তৰ দাবী জনালে ৷ সিদিনা বিৰোধী দলৰ সংবাদ মেলৰ বাতৰি কোনো এটা টেলিভিছন চেনেলত সম্প্ৰচাৰ নহ’ল ৷ সকলোৱে আশা কৰিছিল যে পাছদিনা বাতৰি কাকতত সমগ্ৰ কেলেংকাৰিৰ বিষয়ে বিস্তৃত বাতৰি প্ৰকাশ পাব ৷ কিন্তু ৯ ডিচেম্বৰৰ পুৱা বাতৰি কাকত হাতত লৈ সকলো হতবাক হৈ পৰিল ৷ কাৰণ , অসমৰ বাতৰি কাকতত এই অনিয়মৰ বাতৰি বাদেই বিৰোধীৰ সংবাদমেলৰ বাতৰিও প্ৰকাশ নহ’ল ৷

ইয়াত পঢ়ক – ‘দ্য ক্ৰছকাৰেন্ট’ আৰু ‘দ্য ৱায়াৰ’ৰ বিশেষ অনুসন্ধানমূলক প্ৰতিবেদন

এয়া আছিল অসমৰ সংবাদ মাধ্যমৰ ইতিহাসত এক অভূতপূৰ্ব আৰু অপ্ৰত্যাশিত ঘটনা ৷ নিৰ্ভীক , নিৰপেক্ষ বুলি দাবী কৰা অসমৰ সংবাদ মাধ্যমে বিৰোধীৰ সংবাদমেল এখন প্ৰকাশ কৰাৰ সাহস দেখুৱাব নোৱাৰিলে ৷ এনে ঘটনা অসমবাসীয়ে দেখিব লাগিব বুলি কেতিয়াও ভবা নাছিল ৷কিন্তু  মালিকগোষ্ঠীয়ে নিজৰ ক্ষুদ্ৰ স্বাৰ্থ পূৰণৰ বাবে সম্পাদক , সাংবাদিকসকলক সমাজৰ সন্মুখত লজ্জানত কৰিলে ৷ কিন্তু অসমৰ সচেতন জনতাই সামাজিক মাধ্যমত এই অধ:পতনৰ বিৰুদ্ধে প্ৰবল প্ৰতিবাদ সাব্যস্ত কৰিলে আৰু প্ৰকৃত সত্যক পোহৰলৈ আনিবলৈ আপ্ৰাণ চেষ্টা চলালে ৷ চৰকাৰ আৰু মালিকগোষ্ঠীয়ে হত্যা কৰিব খোজা এটা বাতৰিক জীয়াই ৰাখিলে জনসাধাৰণে ৷ দ্য ক্ৰছকাৰেন্টৰ দৰে এটা সৰু সংবাদ ৱেবছাইটৰ বাবে এয়া গুৰুত্বপূৰ্ণ উপলব্ধি ৷ যিসময়ত দেশৰ মুখ্য ন্যায়াধীশে অনুসন্ধানমূলক সাংবাদিকতা অদৃশ্য হৈ পৰা বুলি আক্ষেপ কৰিছে , তেনেসময়তো আমি নিষ্ঠাৰে আমাৰ কৰ্তব্য পালনৰ চেষ্টা অব্যাহত ৰাখিছো ৷কিন্তু শেষ সত্যটো হ’ল সংবাদ মাধ্যম স্বতন্ত্ৰ হৈ থাকিবলৈ হ’লে প্ৰয়োজন আপোনালোকৰ সহযোগিতাৰ ৷ আপুনি টিভি চেনেল চাবৰ বাবে পইচা দিয়ে , বাতৰি কাকত কিনি পঢ়ে , কিন্তু ডিজিটেল সংবাদ মাধ্যমৰ সুবিধা লাভ কৰে বিনামূলীয়েকৈ ৷ আমি বাতৰিৰ নামত বেপাৰ কৰি মুনাফা আৰ্জিব খোজা নাই ৷ আমাৰ অনুসন্ধান , আমাৰ বিশ্লেষণ সকলোৰে বাবে বিনামূলীয়া কৰি ৰাখিব বিচাৰো ৷ কিন্তু তাৰ বাবে আপোনালোকৰ সহযোগিতা আমাৰ কাম্যই নহয় , একান্ত বাধ্যবাধকতা ৷ গণতন্ত্ৰৰ অন্ধকাৰ দিনবোৰত , অসমৰ সংবাদ মাধ্যমৰ আত্মসমৰ্পনৰ সময়ছোৱাত সংবাদ মাধ্যমৰ স্বতন্ত্ৰতা জীয়াই ৰখাৰ স্বাৰ্থত আমাক আপোনাৰ সহযোগিতাৰ অতিশয় প্ৰয়োজন ৷

স্বতন্ত্ৰতাৰ বাবে সহযোগিতাৰ প্ৰয়োজন ৷ আমাক আৰ্থিকভাৱে সহযোগ কৰিব পাৰে ইয়াত  ক্লিক কৰি –