আলফা(স্বা)ত যোগ দিবলৈ যোৱা নয়নমনি , সবিতা , শৰ্মিষ্ঠাৰ ঘৰ ক’ত ?

আলফা(স্বাধীন)য়ে ঘোষণা কৰা একপক্ষীয় যুদ্ধ বিৰতিৰ ম্যাদ উকলিবলৈ মাজত মাত্ৰ দুদিন সময় আছে ৷ কিন্তু তাৰ পূৰ্বে নিষিদ্ধ ঘোষিত সংগঠনটোৱে পুণৰ সদস্য ভৰ্তি অভিযান আৰম্ভ কৰিছে ৷ আলফা(স্বা)ত যোগ দিবলৈ ৰাজ্যৰ ভিন্ন প্ৰান্তৰ পাঁচগৰাকী যুৱতী ম্যানমাৰলৈ ৰাওনা হোৱাৰ খবৰে এতিয়া চাঞ্চল্যৰ সৃষ্টি কৰিছে ৷ যুৱতী কেইগৰাকী তিনিচুকীয়া , মাজুলী , লখিমপুৰ , ধেমাজি আৰু মৰিগাঁও জিলাৰ ৷ তেওলোকৰ মাজত আছে দুগৰাকী ৰাষ্ট্ৰীয় পৰ্যায়ৰ কিক বক্সিঙ খেলুৱৈ ৷ ইয়াৰে ধেমাজিৰ সবিতা চেতিয়াই যোৱা আগষ্ট মাহত গোৱাত অনুষ্ঠিত ৰাষ্ট্ৰীয় কিক বক্সিঙ প্ৰতিযোগিতাত ব্ৰঞ্জৰ পদক জয় কৰিবলৈও সক্ষম হৈছিল ৷ আনহাতে , তিনিচুকীয়াৰ চাংমাই গাওৰ নয়নমনি চেতিয়াও এগৰাকী ৰাষ্ট্ৰীয় পৰ্যায়ৰ কিক বক্সিঙ খেলুৱৈ ৷ তেওৰ এটি সন্তানো আছে ৷ খেলিবলৈ যাও বুলি কৈ দুদিনমান পূৰ্বে ঘৰৰ পৰা ওলাই অহা নয়নমনি চেতিয়াই আলফাত যোগ দিয়াৰ সন্দেহ ব্যক্ত কৰিছে পৰিয়ালৰ লোকে ৷ লখিমপুৰৰ লালুকৰ শৰ্মিষ্ঠা শইকীয়া নামৰ যুৱতীগৰাকীৰ নেতৃত্বতে তেওলোক ম্যানমাৰলৈ ৰাওনা হোৱাৰ সন্দেহ ব্যক্ত কৰিছে আৰক্ষীয়ে ৷ মৰিগাও আৰু মাজুলীৰ পৰা নিখোজ হৈ থকা যুৱতীকেইগৰাকীৰ পৰিচয় এতিয়াও ৰাজহুৱা হোৱা নাই ৷ নয়নমনি চেতিয়াই দুৰ্গম পাহাৰৰ মাজেৰে ম্যানমাৰলৈ ৰাওণা হোৱাৰ ভিডিও এতিয়া ভাইৰেল হৈ পৰিছে ৷