Investigative reporting with dedication.
দ্য ক্ৰছকাৰেন্ট আৰু দ্য ৱায়াৰৰ যৌথ অনুসন্ধানত ফাদিল হোৱা কোভিড ফাইলছ এতিয়া ৰাজ্যৰ ৰাজনীতিত প্ৰধান ইছ্যু হৈ পৰিছে ৷ কভিডকালত পি পি ই কীটৰ ঠিকা লৈ মুখ্যমন্ত্ৰীৰ পৰিয়াল দুৰ্নীতিত জড়িত হোৱাৰ অভিযোগ তুলি আজি ৰাজ্যজুৰি উত্তাল বিক্ষোভ কাৰ্যসূচী ৰূপায়ন কৰে আম আদমি পাৰ্টীয়ে ৷ তাৰ পাছতে দলটোৱে লতাশিক থানাত মুখ্যমন্ত্ৰী, মুখ্যমন্ত্ৰীৰ পত্নী আৰু তেওলোকৰ দুই ব্যৱসায়িক সহযোগীৰ বিৰুদ্ধে এজাহাৰ দাখিল কৰে ৷ দলটোৰ ৰাজ্যিক সম্পাদক ভিক্টৰ গগৈয়ে এই এজাহাৰ দাখিল কৰে ৷ এজাহাৰত কোভিডকালত হোৱা দুৰ্নীতিৰ বাবে ভাৰতীয় দণ্ডবিধিৰ ১২০(বি), ৪২০, ৪০৪, ৪০৯ ধাৰাৰ লগতে অবৈধ ধন সৰবৰাহ আইনৰ অধীনত গোচৰ ৰুজু কৰিবলৈ আবেদন জনোৱা হয় ৷
আম আদমি পাৰ্টীৰ আজিৰ কাৰ্যসূচী ৰূপায়নৰ পূৰ্বে অসমৰ সংবাদ মাধ্যমত এটা বাতৰি ব্যাপক ৰূপত প্ৰচাৰ কৰা হয় যে ৰাইজৰ দলৰ সভাপতি অখিল গগৈ আম আদমি পাৰ্টীত যোগদানৰ বাবে সাজু হৈছে ৷ এই বাতৰিক দুয়োটা পক্ষই ভুৱা আখ্যা দি নাকচ কৰাৰ পাছতো তাক লৈ সংবাদ মাধ্যমত চৰ্চা চলি থাকে ৷ আম আদমি পাৰ্টী আৰু ৰাইজৰ দলৰ সন্দেহ – মুখ্যমন্ত্ৰীৰ পৰিয়ালৰ বিৰুদ্ধে উত্থাপণ হোৱা দুৰ্নীতিৰ অভিযোগ লুকুৱাবলৈকে এই ভুৱা বাতৰি ব্যাপক ৰূপত প্ৰচাৰ কৰা হৈছে ৷
