পেট্ৰ’ল – ডিজেলৰ দাম আচলতে কিমান বাঢ়িল , কিমান কমিল ?

সৌ সিদিনালৈকে পেট্ৰ’ল – ডিজেলৰ দাম আছিল আন্ত: ৰাষ্ট্ৰীয় বিষয় ৷ শাসক দলৰ নেতা – কৰ্মীসকলৰ মতে ইয়াৰ লগত ভাৰত বা অসম চৰকাৰৰ একো কৰিবলগীয়া নাই ৷ কিন্তু বুধবাৰৰ দিনটোত কেন্দ্ৰ আৰু ৰাজ্য চৰকাৰৰ যুটীয়া উদ্যোগত অসমত পেট্ৰ’লৰ দাম একেকোবে ১২ টকা আৰু ডিজেলৰ দাম ১৭ টকাকৈ হ্ৰাস পালে ৷
প্ৰধানমন্ত্ৰী নৰেন্দ্ৰ মোদী নেতৃত্বাধীন কেন্দ্ৰীয় চৰকাৰে প্ৰতি লিটাৰ পেট্ৰ’লত ৫ টকা আৰু ডিজেলত ১০ টকা আবকাৰী কৰ ৰেহাইৰ কথা ঘোষণা কৰে বুধবাৰৰ সন্ধিয়া ৷ ইয়াৰ পাছতে নিশাৰ ভাগলৈ আন এটা টুইট কৰি অসমৰ মুখ্যমন্ত্ৰী ড: হিমন্ত বিশ্ব শৰ্মাইও পেট্ৰ’ল – ডিজেলত ৭ টকাকৈ মূল্য আৰোপিত কৰ অথবা ভেট ৰেহাইৰ কথা ঘোষণা কৰে ৷ইয়াৰ লগে লগে অসমত পেট্ৰ’লৰ দাম ১২ টকা আৰু ডিজেলৰ দাম ১৭ টকাকৈ হ্ৰাস পালে ৷
প্ৰশ্ন হ’ল , কিমান মূল্য বৃদ্ধিৰ পাছত কেন্দ্ৰীয় চৰকাৰে পেট্ৰ;ল – ডিজেলৰ ওপৰত আৰোপিত কৰ হ্ৰাস কৰাৰ সিদ্ধান্ত ল’লে ? বিগত ২০২০ চনৰ মে ‘ মাহৰ পৰা চলিত বছৰৰ অক্টোবৰ মাহলৈ প্ৰতিলিটাৰ পেট্ৰ’লত ৩৬ টকাকৈ আৰু প্ৰতিলিটাৰ ডিজেলত ২৬.৫০ টকাকৈ মূল্যবৃদ্ধি হৈছে ৷ পেট্ৰ’ল – ডিজেলৰ পৰা সংগৃহীত কৰে অভিলেখ সৃষ্টি কৰিছে ৷ তাৰ পাছত বুধবাৰে কেন্দ্ৰই পেট্ৰ’লত ৫ টকা আৰু ডিজেলত ১০ টকা কৰ হ্ৰাস কৰাৰ কথা ঘোষণা কৰে ৷ ধাৰণা কৰক – পেট্ৰ’ল – ডিজেলৰ দাম আচলতে কিমান বাঢ়িল আৰু কিমান কমিল ?
ইন্ধনৰ ব্যাপক মূল্যবৃদ্ধিৰ পাছতো মোদী চৰকাৰ ইমানদিনে নিৰ্বিকাৰ হৈ ৰৈছিল ৷ তেনেহ’লে এনে কি পৰিস্থিতি আহি পৰিল যে হঠাৎ পেট্ৰ’ল – ডিজেলৰ দাম কমাবলগীয়া হ’ল ? ইয়াৰ আচল কাৰণ হ’ল উপ – নিৰ্বাচন ৷ অহা বছৰ বিধানসভা নিৰ্বাচন অনুষ্ঠিত হ’বলগীয়া হিমাচল প্ৰদেশৰ চাৰিটা সমষ্টিৰ উপ – নিৰ্বাচনত শাসনাধিষ্ঠিত বিজেপি শোচনীয়ভাৱে পৰাজিত হৈছে ৷ ৰাজস্থানত তৃতীয় আৰু চতুৰ্থ স্থানলৈ অৱনমিত হৈছে ৷ আনহাতে উত্তৰ প্ৰদেশৰ সীমাত লাগি থকা মধ্য প্ৰদেশৰ এটা সমষ্টিৰ উপ – নিৰ্বাচনতো বিজেপি পৰাজিত হ’বলগীয়া হ’ল ৷ ইয়াৰ পাছত হিমাচলৰ খোদ বিজেপিৰ মুখ্যমন্ত্ৰী জয়ৰাম ঠাকুৰে মন্তব্য কৰিছে যে জনতাই নহয় , মূল্যবৃদ্ধিয়ে পৰাজিত কৰিছে বিজেপিক ৷ এই অপ্ৰিয় সত্য খোদ এগৰাকী বিজেপিৰ মুখ্যমন্ত্ৰীৰ মুখেৰে ওলোৱাৰ পাছতে কেন্দ্ৰীয় চৰকাৰখনে তৎকালে পেট্ৰ’ল – ডিজেলৰ দাম হ্ৰাস কৰাৰ সিদ্ধান্ত ল’লে ৷কাৰণ সন্মুখত ৫ ৰাজ্যৰ বিধানসভা নিৰ্বাচন ৷